ތުރުކީވިލާތުގެ ބްލިކެސިރް ސަރަޙައްދުގައި ހުރި ހަނގުރާމައިގެ އާލާތްތައް އުފައްދާ ފެކްޓްރީއެއްގައި މިއަދު ހިނގި ނުރައްކާތެރި ޙާދިސާއަކާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ތުރުކީގެ ރައީސް ރަޖަބް ޠައްޔިބު އުރްދުޣާނަށް ތަޢުޒިޔާގެ މެސެޖެއް ފޮނުއްވައިފިއެވެ.

މި ޙާދިސާގައި އެއްޗެއް ގޮވުމުގެ ސަބަބުން 12 މީހުން މަރުވެ، ގިނަ ބަޔަކު ޒަޚަމްވެފައިވާކަމަށް ވަނީ ރިޕޯޓުކޮށްފައެވެ.

ރައީސްގެ ތަޢުޒިޔާ މެސެޖުގައި މި ޙާދިސާގެ ޚަބަރު އަޑުއެއްސެވީ ފުން ހިތާމައާއެކު ކަމަށް ވިދާޅުވިއެވެ.

މީގެ އިތުރުން ތުރުކީގެ ރައީސަށާއި، އެ ޤައުމުގެ ރައްޔިތުންނަށް، އަދި ޙާދިސާގައި މަރުވި މީހުންނާއި ޒަޚަމްވި މީހުންގެ ޢާއިލާތަކަށް ރައީސް ވަނީ ތަޢުޒިޔާ ވިދާޅުވެފައެވެ. އަދި ދިވެހި ސަރުކާރާއި ދިވެހި ރައްޔިތުންގެ ފަރާތުން، މި ޙާދިސާގައި ޒަޚަމްވި އެންމެންނަށް އަވަސް ޝިފާއަކަށް އެދިވަޑައިގަންނަވާކަމަށްވެސް ރައީސްގެ މެސެޖުގައި ވިދާޅުވިއެވެ.