ރާއްޖޭގެ މަސްވެރިކަމުގެ ދާއިރާގައި ހުރި އިންވެސްޓްމަންޓު ފުރުޞަތުތަކުގެ މަޢުލޫމާތު ފިޝަރީޒް މިނިސްޓްރީން ޗައިނާގެ ވިޔަފާރިވެރިންނާ އިއްޔެ ޙިއްސާކޮށްފިއެވެ.

ފިޝަރީޒް މިނިސްޓްރީން ބުނީ އިއްޔެ އެ އިދާރާގައި ބޭއްވި ބައްދަލުވުމެއްގައި ޗައިނާގެ ވިޔަފާރިވެރިންނަށް އެ މަޢުލޫމާތު ޙިއްސާކުރެއްވީ މިނިސްޓަރ އަހްމަދު ޝިޔާމް އާއި އެ މިނިސްޓްރީގެ އިސްވެރިން ކަމަށެވެ.

ރާއްޖޭގައި ހުރި އިންވެސްޓްމަންޓުގެ ފުރުޞަތުތަކާ ގުޅޭ މަޢުލޫމާތު ހޯދުމަށް ޗައިނާގެ ވިޔަފާރިވެރިންތަކެއް މިވަގުތު އަންނަނީ ރާއްޖެއަށް ޚާއްސަ ދަތުރެއް ކުރަމުންނެވެ.

އެ ވިޔަފާރިވެރިން މިނިސްޓަރާ އެކު ބޭއްވި ބައްދަލުވުމުގައި ރާއްޖޭގެ މަސްވެރިކަމުގެ ސިނާއަތުގައި މެރިކަލްޗާ އަދި ބްލޫ އިކޮނޮމީ ދާއިރާއިން ހުރި ފުރުޞަތުތަކުގެ މަޢުލޫމާތު ޙިއްްސާކޮށްފައިވާ ކަމަށް ފިޝަރީޒް މިނިސްޓްރީން ބުންޏެވެ.

މިނިސްޓްރީން ބުނީ ސަރުކާރުން މި ދާއިރާ ކުރިއެރުވުމަށް ކުރަމުން އަންނަ މަސައްކަތްތަކުގެ މަޢުލޫމާތާއި ސްޕޯޓްސް ފިޝިންގ ބަނދަރުތައް ތަރައްޤީކުރުމުގެ މަސައްކަތާއި މެރިކަލްޗާ ސިނާއަތުގެ ދާއިރާއިން މަސައްކަތްތައް ކުރަމުން އަންނަ ކަމަށް އެ ބައްދަލުވުމުގައި މިނިސްޓަރ ވިދާޅުވި ކަމަށެވެ.

މެރިކަލްޗާ ދާއިރާއިން ތަމްރީންތައް ހިންގުމަށާއި ގުޅިގެން ދިރާސާތައް ކުރުމާ ގުޅޭ ގޮތުން ޗައިނާގެ މިނިސްޓްރީ އޮފް ނެޗުރަލް ރިސޯސަސްގެ ފަސްޓް އިންސްޓިޓިއުޓް އޮފް އޮޝަނޮގްރަފީގެ ޓީމަކާ އެކު ވެސް ފިޝަރީޒް މިނިސްޓްރީން އިއްޔެ ވަނީ މަޝްވަރާކޮށްފައެވެ.

މި ސަރުކާރުން އަންނަނީ ރާއްޖޭގެ މަސްވެރިކަމުގެ ދާއިރާ ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އަދި މި ސަރުކާރު އައިސް، އެ ސިނާއަތުގައި ބޮއްސުންލާފައި ހުރި އެތައް ކަމެއް ވަނީ ޙައްލުކޮށްފައެވެ.