ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ބޯޑުގެ ކުރީގެ ޗެއަރމަން އަޙްމަދު ޒުހޫރުގެ ސިޓީއެއް ލިބިވަޑައިނުގަންނަވާ ކަމަށާއި، އެފަދަ ސިޓީއެއް ލިބިވަޑައިގެންނެވިނަމަ ވަގުތުން ފިޔަވަޅު އެޅުއްވީސް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވެފައިވަނީ ރާއްޖޭގެ ބައެއް މީޑިއާތަކަށް ދެއްވި އިންޓަވިއުއެއްގައެވެ.
އެޗްޑީސީގައި ކޮރަޕްޝަނަށް މަގުފަހިވާ ގިނަ ކަންތައްތަކެއް އެ ކުންފުނީގެ މެނޭޖިންގ ޑިރެކްޓަރުގެ މަޤާމުގައި ކުރިން ހުންނެވި އިބްރާހީމް ފަޒުލް ރަޝީދާއި ބައެއް އިސްވެރިން ހިންގާ ކަމަށް، އެޗްޑީސީގެ ޗެއަރމަނަކަށް މި ސަރުކާރުން އެންމެ ފުރަތަމަ އައްޔަންކުރެއްވި އަޙްމަދު ޒުހޫރު ވަނީ ތުހުމަތުކުރައްވާފައެވެ. އަދި އެ ތުހުމަތުތައް ބަޔާންކުރާ ސިޓީއެއް ރައީސުލްޖުމްހޫރިއްޔާއަށް ފޮނުއްވެވި ކަމަށް ބުނާ ވާހަކަތަކެއް ސޯޝަލް މީޑިއާގައި ވަނީ ދައުރުވެފައެވެ.
Advertisement
ޒުހޫރުގެ އެ ތުހުމަތުތަކާއި، އެޗްޑީސީއަށް އަމާޒުވެފައިވާ ކޮރަޕްޝަންގެ މައްސަލައާ ގުޅޭގޮތުން ރައީސުލްޖުމްހޫރިއްޔާ މިވަނީ ފުރަތަމަ ފަހަރަށް ވާހަކަފުޅު ދައްކަވާފައެވެ. ރައީސުލްޖުމްހޫރިއްޔާ ވިދާޅުވީ، އެޗްޑީސީގެ ކުރީގެ ޗެއަރމަން ޒުހޫރުގެ ސިޓީއެއް އެމަނިކުފާނަށް ލިބިވަޑައި ނުގަންނަވާ ކަމަށެވެ. އަދި އެފަދަ ސިޓީއެއް ލިބިވަޑައިގެންނެވިނަމަ ވަގުތުން ފިޔަވަޅު އަޅުއްވަން ފަސްޖެހިވަޑައިނުގަންނަވާނެ ކަމަށްވެސް ރައީސް ވަނީ ވިދާޅުވެފައެވެ.
"ކޮރަޕްޝަންގެ ޢަމަލެއް ނުވަތަ ޤަވާޢިދާ ޚިލާފަށް ކުރާ ކަމެއް ހުއްޓުވުމަށް ފަހަތަކަށް ނުޖެހޭނަން. މިއަދާ ހަމައަށްވެސް ހުންނާނީ އެކި ކަންކަމުގައި މަޢުލޫމާތު ލިބުނީމަ އެކަމަކަށް ފިޔަވަޅު އަޅަން ދަންނަވާފައި. އަޅުގަނޑު ބޭނުންވަނީ އަޅުގަނޑުމެންގެ ސަރުކާރަކީ ކޮރަޕްޝަނާއި ނުގަވާއިދުން ހިންގާ ކަންކަމާ ދުރުވެފައި އޮންނަ ސަރުކާރަކަށް ހަދަން. އެއީ އަޅުގަނޑުމެން ވަޢުދުވީ ގޮތަކީވެސް. ސިޓީއެއް ލިބި އަޅުގަނޑު އެއަށް ޢަމަލު ނުކޮށް އޮތް ވާހަކައަކީ ޙަޤީޤަތާ ޚިލާފު ވާހަކައެއް. އަޅުގަނޑަށް ކަންކަން އެނގުނު ހިސާބުން ފިޔަވަޅު އަޅާފައިވަނީ." ރައީސުލްޖުމްހޫރިއްޔާ ވިދާޅުވިއެވެ.
