އެމެރިކާގެ އަސްކަރިއްޔާއިން ޔަމަންގެ ވެރިރަށް ޞަންޢާއަށް ވައިގެ ޙަމަލާތަކެއް ދީފިއެވެ. މި ޙަމަލާތައް އަމާޒުކޮށްފައިވަނީ ޙޫޘީ ޖަމާޢަތުގެ ހަތިޔާރު ރައްކާކުރާ ގުދަންތަކާއި ކޮމާންޑު ސެންޓަރުތަކަށެވެ.
އެމެރިކާގެ ސެންޓްރަލް ކޮމާންޑުން ބުނެފައިވަނީ މި ޙަމަލާތަކުގެ ބޭނުމަކީ ޙޫޘީންގެ އަސްކަރީ ހަރަކާތްތަކަށް ހުރަސްއެޅުން ކަމަށެވެ. ނަމަވެސް، މަސްރަޙު ދިރާސާކުރާ ފަރާތްތަކުން ދެކޭގޮތުގައި މިއީ އިސްރާއީލަށް ޙޫޘީން ދާދިފަހުން ދިން މިސައިލް ޙަމަލާގެ ބަދަލު ހިފުމުގެ ގޮތުން ދީފައިވާ ޙަމަލާތަކެކެވެ.
ޙޫޘީންގެ މިސައިލް ޙަމަލާގައި އިސްރާއީލުގެ ޔާފާ ސަރަޙައްދުގައި 16 މީހުން ޒަޚަމްވެފައިވާ ކަމަށް އިސްރާއީލުގެ ޞިއްޙީ ޚިދުމަތްތެރިން ބުނެފައިވެއެވެ.
Advertisement
އެމެރިކާގެ އަސްކަރިއްޔާއިން ބުނެފައިވަނީ މި ޙަމަލާތަކުގައި މިސައިލް ރައްކާކުރާ ގުދަންތަކުގެ އިތުރުން އަސްކަރީ ޑްރޯނާއި ކްރޫޒް މިސައިލްތަކެއް ވެސް ނައްތާލާފައިވާނެ ކަމަށެވެ.
ޙޫޘީންގެ އަސްކަރީ އޮޕަރޭޝަންތައް ފެށިފައިވަނީ 2023 ވަނަ އަހަރުގެ އޮކްޓޯބަރު 7 ވަނަ ދުވަހު ޣައްޒާގައި ހިނގަމުންދާ ހަނގުރާމައާ ގުޅިގެންނެވެ. ޙޫޘީންގެ ބުނާ ގޮތުގައި އެމީހުންގެ އަމާޒަކީ ފަލަސްޠީނުގެ ރައްޔިތުންނަށް ވާގިވެރިވުމެވެ.
ޣައްޒާގައި ހިނގަމުންދާ ހަނގުރާމައިގައި މިހާތަނަށް ބައިލައްކައެއްހާ މީހުން ޝަހީދުވެފައިވާ ކަމަށް ޣައްޒާގެ އޮފިޝަލުން ބުނެފައިވެއެވެ. މީގެ ތެރޭގައި 17,000 އަށްވުރެ ގިނަ ކުޑަކުދިން ހިމެނެއެވެ.
