މީގެ 10 އަހަރު ކުރިން ވީނުވީއެއް ނޭނގި ގެއްލިފައިވާ މެލޭޝިއާ އެއާލައިންސްގެ ފްލައިޓް އެމްއެޗް370 ހޯދުމުގެ މަސައްކަތް އަލުން ފަށާނެ ކަމަށް މެލޭޝިއާގެ ޓްރާންސްޕޯޓް މިނިސްޓަރު އެންތޮނީ ލޯކޭ ވިދާޅުވެއްޖެ އެވެ .
2020ގައި އޮސްޓްރޭލިޔާގެ ނޫހެއްކަމަށްވާ ނިއު ކޯޕުން އެމެރިކާގެ އޯޝަން އިންފިނިޓީ ކުންފުންޏާއި މެލޭޝިޔާގެ ސަރުކާރާއި ގުޅިގެން ގެއްލިފައިވާ މަތިންދާބޯޓު ހޯދުމަށް އައު މަސައްކަތްތަކެއް އެ އަހަރުތެރޭގައި ފެށުމަށް މަޝްވަރާކުރިއެވެ. ލިބިފައިވާ އައު މަޢުލޫމާތުގެ މައްޗަށް ބިނާކޮށް، މަތިންދާބޯޓު ވެއްޓިފައިވަނީ އިންޑިޔާ ކަނޑުން ކުރިން ހޯދި ސަރަޙާއްދާއި އިންވެގެންވާ ސަރަހައްދަކަށްކަމަށް ބެލެވޭކަމަށް އެނޫހުން އޭރު ބުނެފައިވެއެވެ. ނަމަވެސް މެލޭޝިޔާގެ ދަތުރުފަތުރާއިބެހޭ ވުޒާރާއިން ބުނެފައިވަނީ މަތިންދާބޯޓު ހޯދުމުގެ މަސައްކަތް އަލުން ފަށަން ނިންމޭފަދަ އިތުރު ހެއްކެއް އޭރު ލިބިފައިނުވާކަމަށެވެ.
2014ވަނަ އަހަރުގެ މަރޗް މަހުގެ 8ވަނަ ދުވަހު 239 ފަސިންޖަރުންނާއެކު މެލޭޝިޔާގެ ވެރިރަށް ކުއަލަ ލަމްޕޫރުން ޗައިނާގެ ވެރިރަށް ބެއިޖިންގަށް ދަތުރުކުރި މެލޭޝިޔަން އެއަރލައިންސްގެ ފްލައިޓް އެމްއެޗް370އަށް ވީނުވީއެއް ނޭނގި ގެއްލުނެވެ. މެލޭޝިޔާއާއި ޗައިނާއާއި އޮސްޓްރޭލިޔާއިން 130 މިލިއަން ޑޮލަރު ޚަރަދުކޮށްގެން ދެއަހަރުދުވަސް ވަންދެން މަތިންދާބޯޓު ހޯދުމަށް ކުރި މަސައްކަތްވަނީ ނާކާމިޔާބުވެފައެވެ. އޭގެ ފަހުން އޯޝަން އިންފިނިޓީ އިސްވެ މަތިންދާބޯޓު ހޯދުމަށް ކުރި މަސައްކަތުންވެސް އެބޯޓުގެ ހިލަމެއްވެފައެއް ނުވެއެވެ.
ޗައިނާގެ 150 އަށް ވުރެ ގިނަ ފަސިންޖަރުން އެ ފްލައިޓުގައި ތިބިއިރު، އެމީހުންގެ ގާތްތިމާގެ މީހުން ވަނީ މެލޭޝިއާ އެއާލައިންސް އާއި ބޮއިންގް މަތިންދާބޯޓު އިންޖީނު އުފައްދާ ކުންފުނި ރޯލްސްރޮއިސް އާއި އެލިއަންޒް އިންޝުއަރެންސް ގްރޫޕުން ބަދަލު ހޯދުމަށް އެދިފަ އެވެ.
މެލޭޝިޔާއިން އިންޑިއާ ކަނޑުގެ ދެކުނު ބަލައިފާސްކުރުމަށް 2018 ވަނަ އަހަރު އޯޝަން އިންފިނިޓީއާ ގުޅި، ބޯޓު ފެނިއްޖެ ނަމަ 70 މިލިއަން ޑޮލަރުގެ ބަދަލު ދިނުމަށް ހުށަހެޅި ނަމަވެސް އެ ކުންފުނި ވަނީ ދެ ފަހަރެއްގެ މަތިން ނާކާމިޔާބުވެފަ އެވެ.
އެއަށްފަހު މެލޭޝިއާ، އޮސްޓްރޭލިއާ އަދި ޗައިނާއިން ވަނީ ދެކުނު އިންޑިއާ ކަނޑުގެ އަޑީގެ 120،000 އަކަކިލޯމީޓަރުގެ ސަރަހައްދެއް ބަލައިފާސްކޮށްފައެވެ.
