ވަރުގަދަ ހަމަނުޖެހުންތަކެއް ހިނގަމުންދާ ދަނޑިވަޅެއްގައި ޣައްޒާގައި ޢަދާވާތްތެރިކަން އިތުރުވެ، ފަލަސްތީނުގެ އިތުރު 100 އަށް ވުރެ ގިނަ މީހުން ޝަހީދު ކޮށްލައިފިއެވެ. އިސްރާއީލުގެ ވައިގެ ހަމަލާތައް ވަނީ އެކި ތަންތަނަށް އަމާޒުކޮށްފައި ކަމަށާއި އޭގެ ތެރޭގައި މީހުން ދިރިއުޅޭ ސަރަހައްދުތަކާއި ގެދޮރު ގެއްލިފައިވާ ފަރާތްތަކުގެ ހިޔާވަހިކަން ވެސް ހިމެނޭ ކަމަށް މަސްދަރުތަކުން ބުނެއެވެ.

މި ޙަމަލާތަކުގައި ގެދޮރު ގެއްލިފައިވާ އާއިލާތައް ދިރިއުޅެމުން ދިޔަ ޚާން ޔޫނިސްގެ ސްކޫލަށް ވެސް އައިޑީއެފް (އިސްރާއީލް ޑިފެންސް ފޯސް) އިން ވަނީ އަމާޒު ކޮށްފައެވެ. އިސްރާއީލުން ދިން އެ ޙަމަލާތަކުގައި ކުޑަކުދިން ހިމެނޭ ގޮތަށް މަދުވެގެން 20 މީހުން ޝަހީދުވި ކަމަށް ޣައްޒާގެ ހެލްތު މިނިސްޓްރީއާއި ޙަވާލާދީ ރޮއިޓާސް އިން ބުނެއެވެ.

މިދިޔަ އަހަރުގެ އޮކްޓޯބަރު މަހު ޣައްޒާގައި ހަމަނުޖެހުން ބޮޑުވި ފަހުން ޣައްޒާގައި ޝަހީދުވާ މީހުންގެ އަދަދު މިހާރު ވަނީ ބައިލައްކަ އަށް ވުރެ މައްޗަށް ގޮސް، 106،000 އަށް ވުރެ ގިނަ މީހުން ޒަޚަމްވެފަ އެވެ.

ހަނގުރާމަ ހުއްޓާލުމުގެ ބްރޯކަރ ކުރުމުގެ މަސައްކަތްތައް ވަރުގަދަވެފައިވާއިރު، އެމެރިކާ، މިސްރު އަދި ގަތަރުގެ މެދުވެރިން ވަނީ މަޝްވަރާތަކުގައި ބައިވެރިވެފައެވެ. މި ޑިޕްލޮމެޓިކް މަސައްކަތްތައް ކުރި ނަމަވެސް އިސްރާއީލުގެ ވައިގެ ހަމަލާތައް މެދުކެނޑުމެއްނެތި ދެމުން ދެއެވެ.

ޣައްޒާގެ އިންސާނީ ހާލަތު އިތުރަށް ގޯސްވަމުންދާއިރު، ފުޅާދާއިރާއެއްގައި މީހުންގެ ގެދޮރުތައް ގެއްލި، ޒަރޫރީ ތަކެތީގެ ދަތިކަން އިންތިހާ ދަރަޖައަށް ވަނީ ކުރިމަތި ވެފައެވެ. މިކަމާއިމެދު ބައިނަލްއަގްވާމީ ޖަމިއްޔާތަކުން ވަނީ ކަންބޮޑުވުން ފާޅުކޮށްފަ އެވެ.