ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި އޮކިއުޕޭޝަނަލް ތެރަޕީ އެސޯސިއޭޝަން މޯލްޑިވްސް ގުޅިގެން އޮކިއުޕޭޝަނަލް ތެރަޕިސްޓުން ތަމްރީނުކުރުމަށް އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގައި ސޮއިކުރެއްވީ އެމްއެންޔޫގެ ވައިސް ޗާންސެލަރ ޑރ. އާއިޝަތު ޝެހެނާޒް އާދަމް އާއި އޮކިއުޕޭޝަނަލް ތެރަޕީ އެސޯސިއޭޝަންގެ ޗެއަރޕާސަން އާމިނަތު ތޫހާ އަދުލީއެވެ.
އެމްއެންޔޫގެ ފެކަލްޓީ އޮފް ހެލްތް ސައިންސަސްގެ ޑީން، ޑރ. އައިޝަތު ޝަނޫރާ ވިދާޅުވީ މިވަގުތު ރާއްޖޭގައި އޮކިއުޕޭޝަނަލް ތެރަޕިސްޓުންގެ ގޮތުގައި ހަރަކާތްތެރިވަނީ މަދު އަދަދެއްގެ ދިވެހިންކަމަށާއި، އެހެންކަމުން އެފަދަ ފަންނީ ޚިދުމަތްތެރިން ތަމްރީނުކުރުމަށް ޤައުމީ ޔުނިވަރސިޓީން ޚާއްސަ އިސްކަމެއްދީގެން މަސައްކަތްކުރާ ކަމަށެވެ.
މި ކޯހަކީ 4 އަހަރުގެ ޑިގްރީ ފެންވަރުގެ ކޯހެއް ކަމަށާއި، ދާއިރާގެ ފަންނީ ބޭފުޅުންގެ ލަފަޔާއެކު އިންޓަނޭޝަނަލް ޔުނިވަރސިޓީތަކާއި ބެންޗްމާކް ކޮށް، ވޯލްޑް ފެޑެރޭޝަން އޮފް އޮކިއުޕޭޝަނަލް ތެރަޕީގެ މިންގަނޑުތަކާއި އެއްގޮތަށް އެކުލަވާލާފައިވާ ކޯހެއްކަން ފާހަގަކޮށްފައިވެއެވެ. މި ކޯސް އަންނަ އަހަރުގެ 2 ވަނަ ސެމިސްޓަރގައި ފެށުމަށް ވަނީ ހަމަޖެހިފައެވެ.
Advertisement
އޮކިއުޕޭޝަނަލް ތެރަޕިސްޓުންނަކީ އުފެދުމުގައި ހުންނަ ކަމަކުން ނުވަތަ އަނިޔާވެފައިވާ ނުވަތަ ބަލިވެފައިވާ ނުވަތަ ނުކުޅެދުންތެރިކަމެއް ލިބިފައިވާ ފަރާތްތަކަށް އާންމު ދިރިއުޅުމުގެ ކަންކަމުގައި ނުވަތަ އެމީހަކު ކުރާ މަސައްކަތްތައް މިނިވަންކަމާއެކު ކުރުމަށް ލުއިފަސޭހަ ގޮތްތައް އުނގަންނައިދިނުމުގެ މަސްއޫލިއްޔަތު އަދާކުރާ ފަންނީ ޚިދުމަތްތެރިންނެވެ.
އޮކިއުޕޭޝަނަލް ތެރަޕީ އެސޯސިއޭޝަން އޮފް މޯލްޑިވްސްގެ ޗެއަރޕާސަން އާމިނަތު ތޫހާ އަދުލީ ވިދާޅުވީ މި ކޯހަކީ ކާމިޔާބު ޕްރޮގްރާމަކަށް ވެގެންދިއުމަށް އުއްމީދުކުރައްވާ ކަމަށެވެ. އަދި އޮކިއުޕޭޝަނަލް ތެރަޕީގެ ދާއިރާއަކީ މިހާރަށްވުރެ ފުޅާ ދާއިރާއެއްގައި ދިވެހި ކުދިން ނިކުމެ މަސައްކަތްކުރެވޭނެ ދާއިރާއަކަށް ވެގެންދިއުމަކީ އެކަމަނާގެ އުއްމީދު ކަމުގައި ވިދާޅުވިއެވެ.
މި ކޯހަކީ މޯލްޑިވްސް އެލައިޑް ހެލްތު ކައުންސިލާއި ވޯލްޑް ފެޑެރޭޝަން އޮފް އޮކިއުޕޭޝަނަލް ތެރަޕީ އަދި މޯލްޑިވްސް ކޮލިފިކޭޝަން އޮތޯރިޓީން ޤަބޫލުކުރާ ކޯހަކަށް ވާނެ ކަމަށް އެމްއެންޔޫއިން ބުނެފައިވެއެވެ. އަދި މި ކޯހުގެ ސަބަބުން އިންޑަސްޓްރީއާ ގާތް ގުޅުމެއް އުފެދި، އަމަލީ ތަޖުރިބާ ހޯދަން ފަހި ފުރުސަތުތަކެއް ލިބޭނެ ކަމަށާއި، ވަޒީފާގެ މާހައުލަށް ލޯހުޅުވިފައިވާ މިންވަރު އިތުރުވެގެންދާނެ ކަމަށްވެސް ފާހަގަކޮށްފައިވެއެވެ.
އޮކިއުޕޭޝަނަލް ތެރަޕިސްޓުން އާންމު ގޮތެއްގައި މަސައްކަތްކުރަނީ ހޮސްޕިޓަލުތަކާއި ރިހެބިލިޓޭޝަން ސެންޓަރުތަކާއި، ނަރސިންގ ފެސިލިޓީތަކުގެ އިތުރުން ސްކޫލް މާހައުލުގައެވެ. މި ފަދަ ތެރަޕިސްޓުންގެ މައިގަނޑު މަސައްކަތަކީ އެހީތެރިކަން ބޭނުންވާ މީހުންނަށް އެމީހުންގެ ބަލިން ނުވަތަ އަނިޔާއިން ނުވަތަ ނުކުޅެދުންތެރިކަމާއެކު އާންމު ދިރިއުޅުމުގައި މިނިވަންކަމާއެކު އުޅުމަށް ބޭނުންކުރެވޭނެ ފަސޭހަ ގޮތްތަކާއި ހުނަރުތައް ދަސްކޮށްދީ، ދިރިއުޅުމާއި މަސައްކަތްތެރިކަމުގައި ގެންގުޅެވިދާނެ އުކުޅުތައް ދަސްކޮށްދިނުމެވެ.
