ދިވެހިރާއްޖެއާއި އިންޑިއާއާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރުން ފާހަގަކުރުމުގެ ގޮތުން، ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) ގެ ފެކަލްޓީ އޮފް އާޓްސް އާއި ރާއްޖޭގައި ހުންނަ އިންޑިއާ ހައިކޮމިޝަން ގުޅިގެން ހާއްސަ ސެމިނާއެއް ބާއްވައިފި އެވެ.
މި ސެމިނާ ޝަރަފުވެރިކޮށްދެއްވާފައިވަނީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖީ. ބާލަސުބްރަމާނިއަން އެވެ. ސެމިނާ ޝަރަފުވެރިކޮށްދެއްވައި ދެއްކެވި ވާހަކަގައި ސަފީރު ވަނީ ދެ ގައުމުގެ ދެމެދުގައި އޮތް ޒަމާންވީ ގާތް ގުޅުމުގެ މައްޗަށް އަލިއަޅުއްވާލައްވައި، މި ގުޅުން އިތުރަށް ބަދަހިވަމުންދާކަން ފާހަގަކުރައްވާފަ އެވެ.
މި ބައްދަލުވުމުގެ ތެރެއިން، ވޭތުވެދިޔަ 60 އަހަރުގެ ތެރޭގައި ރާއްޖެއާއި އިންޑިއާއާ ދެމެދު އޮތް ތާރީހީ ގުޅުމުގެ މައްޗަށް ބިނާކޮށް ތައްޔާރުކޮށްފައިވާ ޕްރެޒެންޓޭޝަނެއް ހުށަހަޅާފައިވެ އެވެ. މި ޕްރެޒެންޓޭޝަންގައި މޫސުމަށް އަންނަ ބަދަލުތަކާއި، ދެމެހެއްޓެނިވި ތަރައްގީއާއި، ތާރީހީ އަދި ސަގާފީ ގުޅުންތަކުގެ އިތުރުން ސިއްހީ ހިދުމަތުގެ ދާއިރާއިން ދެ ގައުމުގެ ދެމެދުގައި އޮތް އެއްބާރުލުމާ ގުޅޭގޮތުން މައުލޫމާތު ދީފައިވެ އެވެ.
ރާއްޖެއާއި އިންޑިއާގެ ގުޅުމަށް 60 އަހަރު ފުރުން ފާހަގަކުރުމަށް ބޭއްވި ހާއްސަ ސެމިނާ ތެރެއިން/ ފޮޓޯ: އެމްއެންޔޫ
މީގެއިތުރުން، އިގްތިސާދީ ތަރައްގީއާއި ވިޔަފާރި، ތައުލީމީ ދާއިރާ، އިންސާނީ ވަސީލަތްތައް ތަރައްގީކުރުން، ބައިނަލްއަގްވާމީ ގުޅުންތައް އަދި އުމްރާނީ ތަރައްގީގެ ދާއިރާއިން ދެ ގައުމުގެ ދެމެދުގައި ކުރެވިފައިވާ މަސައްކަތްތަކާ ގުޅޭގޮތުންވެސް މި ސެމިނާގައި ވަނީ ފުޅާދާއިރާއެއްގައި މަޝްވަރާކޮށްފަ އެވެ.
މި ސެމިނާގައި އެމްއެންޔޫގެ އިސްވެރިންނާއި، އިންޑިއާ ހައިކޮމިޝަނުގެ އިސް އޮފިޝަލުންގެ އިތުރުން އެމްއެންޔޫގައި ތައުލީމު ހާސިލުކުރަމުންދާ ގިނަ އަދަދެއްގެ ދަރިވަރުން ބައިވެރިވެފައިވެ އެވެ. މިފަދަ ސެމިނާއެއް ބޭއްވުމުގެ މައިގަނޑު މަގްސަދަކީ ދެ ގައުމުގެ ދެމެދުގައި އޮތް ޒަމާންވީ ގުޅުމުގެ ތާރީހާއި، އެކި ދާއިރާތަކުން ގާއިމުވެފައިވާ އެއްބާރުލުން އަންނަން އޮތް ޖީލުތަކަށް އޮޅުންފިލުވައިދިނުމެވެ.
