ސައިބަރ ކްރައިމްތައް ހިމެނޭ ގޮތަށް ޤާނޫނުލްއުގޫބާތަށް ގެނެވުނު އިސްލާހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީޤު ކުރެއްވުމާއެކު، މި އިސްލާހަށް އަމަލުކުރަން މިއަދު ފަށައިފިއެވެ.

މިއީ މިދިޔަ ޑިސެންބަރު 9 ވަނަ ދުވަހު ބޭއްވި ރައްޔިތުންގެ މަޖިލީހުގެ 2024 ވަނަ އަހަރުގެ ތިންވަނަ ދައުރުގެ 58 ވަނަ ޖަލްސާއިން ފާސްކުރެއްވި ބިލެކެވެ.

މި އިސްލާހުގެ މައިގަނޑު މަޤްޞަދަކީ ސައިބަރ ކްރައިމްތައް ޤާނޫނީ ގޮތުން ކުށެއްގެ ގޮތުގައި ކަނޑައަޅައި، އެފަދަ ކުށްތައް ޤާނޫނުލްއުގޫބާތަށް އިތުރުކުރުމެވެ. މި ބަދަލާއެކު، ހުއްދަ ނެތި ކޮމްޕިއުޓަރ ސިސްޓަމަކަށް އެކްސެސްވުމާއި، ކުށެއް ކުރުމަށް މަގުފަހިކުރުމުގެ ނިޔަތުގައި ހުއްދަ ނެތި ކޮމްޕިއުޓަރ ސިސްޓަމަކަށް އެކްސެސްވުން ވަނީ ކުށެއްގެ ގޮތުގައި ކަނޑައަޅާފައެވެ.

މީގެ އިތުރުން، ހުއްދަ ނެތި ކޮމްޕިއުޓަރ ޑޭޓާ އިންޓަސެޕްޓް ކުރުމާއި، ހުއްދަ ނެތި ކޮމްޕިއުޓަރ ސިސްޓަމަކަށް އިންޓަފިއަރ ކުރުމާއި، ނަހަމަ ގޮތުގައި ޑިވައިސްތައް ބޭނުންކުރުމާއި، ސައިބަރ ވަޔަލަންސްގެ ޢަމަލުތައްމަލުތައްވެސް ވަނީ ކުށުގެ ގޮތުގައި ކަނޑައަޅާފައެވެ. އަދި ކޮމްޕިއުޓަރާ ގުޅުންހުރި ފޯޖަރީގެ ޢަމަލުތަކާއި، އޮޅުވާލުމުގެ ޢަމަލުތަކާއި، ކޮޕީރައިޓާއި އެއާ ގުޅޭ އެހެނިހެން ޙައްޤުތަކަށް އަރައިގަތުމުގެ ޢަމަލުތައްވެސް ވަނީ ކުށެއްގެ ގޮތުގައި ކަނޑައަޅާފައެވެ.

މިއަދު ރައީސް ވަނީ ޖިނާއީ އިޖުރާއަތުގެ ޤާނޫނަށް ގެނެވުނު އިސްލާހުވެސް ތަސްދީޤު ކުރައްވާފައެވެ. މި އިސްލާހުގެ ދަށުން، ސައިބަރ ކްރައިމްތަކާއި ކޮމްޕިއުޓަރ ސިސްޓަމް މެދުވެރިކޮށް ކުރާ ކުށްތައް ތަޙުޤީޤުކޮށް ދައުވާ އުފުލުމުގައި ޢަމަލުކުރާނެ އިޖުރާއީ އުސޫލުތައް ކަނޑައަޅައި، ޤާނޫނު ތަންފީޒުކުރާ އިދާރާތަކަށް ލިބިދޭންޖެހޭ ބާރުތައް ލިބިދީފައިވެއެވެ.