އިންތިޚާބަކާއި ޖެހުނީމާ ވޯޓު ހޯދަން މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އަބަދުވެސް ޙައްޤުގެ ވާހަކަ ދައްކައެވެ. އިދިކޮޅުގައި އޮންނަ ކޮންމެ ފަހަރަކު ޙައްޤުުގެ ވާހަކަ ދައްކައެވެ. ޚާއްޞަކޮށް އަންހެނުންގެ ޙައްޤުތައް ޙިމާޔަތް ކުރާ ކަމަށެވެ. ނަމަވެސް އެމީހުންގެ ވެރިކަމުގައި އެ ޕާޓީގެ އަމަލުތަކުން ދައްކަނީ ތަފާތު ވާހަކައެކެވެ. ހައްގުތައް ކުރިއެރުވުމަށޭ ކިޔައި ފަރުދާގެ ފުރަގަހުގައި ތިބެގެން އެމްޑީޕީން ވަނީ އަންހެނުންގެ މިނިވަންކަން ނިޒާމީ ގޮތުން ފުނޑުފުނޑުކޮށް، ނަފްސާނީ ގޮތުންނާއި ޖަޒުބާތީ ގޮތުން ޒަހަމްކޮށްލާފަ އެވެ. ފާހަގަކޮށްލެވޭ މިސާލަކީ އެމީހުން ދުވާފަރު ދާއިރާގެ ކައުންސިލަރު މަރިޔަމް ޔަޝްފާ އަށް ދީފައިވާ ނަފްސާނީ އަނިޔާއެވެ. ދާދި ފަހުން ޔަޝްފާ ވަނީ އެމްޑީޕީގެ ޖަލްސާއެއްގައި ރައީސުލްޖުމްހޫރިއްޔާއަށް އަނިޔާވެރިވުމަށް ގޮވާލެއްވުމުން މައްސަލަތަކެއްގެ ތެރެއަށް ވައްޓާލާފައެވެ. ޔަޝްފާ ކަހަލަ އެތައް އަންހެނެއްގެ ސިކުނޑިތައް އެމްޑީޕީން ދޮބެލައިފިއެވެ. ނަތީޖާއަކީ އެމީހުންގެ ލަދުޙަޔާތް ކެނޑި ފާފަތަކުގެ ތެރެއަށް ގެނބިގެން ދިޔުމަށް މަގު ހުޅުވާލުމެވެ. އަބުރު ގެއްލި މީހުންގެ ނަފްރަތު އަންހެންވެރީންނަށް ލިބުމެވެ. މިއީ އެމްޑީޕީ ޒިންމާވާން ޖެހޭނެ ކަމެކެވެ. ޔަޝްފާ މާދަމާ މަރުވެ މަހްޝަރުގެ މައިދާނަށް އެންމެނާއެކު އެއްކުރެވޭއިރު، އެމްޑިޕިން ބުނެގެން ޔަޝްފާ ދެއްކި ވާހަކަތަކާއި ކުރި ކަންތަކަށް އެމްޑީޕީން ޒިންމާވާމެ ހެއްޔެވެ؟ މިއީ ހަމައެކަނި ވިސްނައި ފިކުރު ކޮށްލުމަށް ދޫކޮށްލާ ސުވާލެކެވެ.

ކޮންމެޔަކަސް، އެމްޑީޕީން ވަނީ އަންހެނުންގެ ޙައްޤުގެ ނަމުގައި އެކަނބަލުންގެ ޟަޢީފު ސިކުނޑިތައް ދޮވެލައި ބާޒާރުގައި އަންހެނުންނަކީ އަގެއް ނެތް ބަޔަކަށް ހަދާފައެވެ. އިސްވެ ދެންނެވުނު ޔަޝްފާއަށް ފުލުހުން ޗިޓް ފޮނުވިއިރު، އަސްލު މައްސަލަ އޮތީ އެމްޑީޕީން އެކަމަނާ އެމީހުންގެ ސިޔާސީ އެޖެންޑާއަށް ބޭނުންކުރި ގޮތާއި، ހަމައެކަނި އޭގެ ނަތީޖާއާ ކުރިމަތިލާން ދޫކޮށްލުމެވެ.

އަންހެނުންގެ ހައްގުތަކަށް އެމްޑީޕީން އަޅާނުލުން މިހާދިސާއަށް ވުރެ ވެސް މާ ފުޅާވެގެންދެއެވެ. އެބޭފުޅުންގެ ވެރިކަމުގައި އަންހެނުންގެ މިނިވަންކަމާއި ސާފުކޮށް ހިލާފު ސިޔާސަތުތަކެއް ލާޒިމުކުރިއިރު، އޭގެ ތެރޭގައި ދީނީ ގޮތުން ޚިޔާލުފާޅުކުރުމުގެ ހައްގު ވެސް ހިމެނެ އެވެ. ވަކިން ހާއްސަކޮށް ފާހަގަކޮށްލެވޭ މިސާލަކީ ތަޢުލީމު އުނގަންނައިދޭ ތަންތަނުގައި އަންހެން ޓީޗަރުންނާއި އަންހެން ދަރިވަރުން ނިވާކޮށްގެން އުޅުން މަނާކުރުމެވެ. ސަހަރޯއެވެ. މިއީ އެމްޑީޕީހެ ވެރިކަމުގައި ކުރި ކަމެކެވެ. މުސްލިމު އަންހެނުންތަކަކަށް ދެވޭނޭ އެންމެ ބޮޑު އެއް އަނިޔާއަކީ މިއެވެ. އެ ނުބައި ވެރިކަމުގައި ތައާރަފްކުރި ޓީޗަރުންގެ ސުލޫކީ މިންގަނޑުގައި ބުރުގާ އެޅުން މަނާކުރީ އެއީ ޕްރޮފެޝަނަލް މާހައުލަށް ބުރޫއަރާ ކަމެއް ކަމަށް ބުނެ އެވެ. މި ފާފަވެރި، އިސްލާމްދީނާއި ދުރު ސިޔާސަތުގެ ސަބަބުން ގިނަ އަންހެނުންނަށް ޖެހުނީ ކޮންމެވެސް އެކައްޗެއް އިޚްތިޔާރު ކުރާށެވެ. އެއީ ބުރުގާވިއްޔާ ބުރުގާއެވެ. ކިޔެވުން ނުވަތަ ވަޒީފާނަމަ އެކަމެވެ. ނެގޭނީ ކޮން،ެވެސް އެކައްޗެކެވެ. މާނައަކީ އެމްޑީޕީން މިއޮތީ ބާޒާރުގައި އަންހެނުންގެ ޢަޤީދާ ނީލަމަށް ލާފައެވެ. އެމީހުންގެ އެމީހުންގެ ދުސްތޫރީ ޙައްޤުތައް ނިގުޅައިގެންފައެވެ. މިވަރުގެ ނުބައި ނުލަފާ ބަޔަކު އިސްލާމީ ނަޒަރަކުން ވިސްނާލައިފިނަމަ ނުތިބޭނެކަން ޔަޤީނެވެ. މިއީ ސީރިއަސް މައްސަލައެކެވެ. މިކަން ފަހުމްވާނީ ވިސްނައި ފިކުރުކުރާ ބަޔަކަށެވެ. ބުރުގާއޭ މޫނުބުރުގާއޭ ކިޔާނެ ކަމެއް ނެތެވެ. އެއްޗަކީ ބުރުގާއެވެ. ހެދުމެވެ. އައުރައެވެ. އެއީ ފެޝަން ބުރުގާއަކަސް މުުޅި މޫނު ވިޔަސް އެއީ ހަމަ ބުރުގާއެވެ.

އަސްލު އެހެން ހެދީ ކީއްވެ؟

ތަނެއް ފަސާދަކޮށްލަން އެންމެ ފަސޭހަވަނީ އެތަނެއްގައި ދިރިއުޅޭ އަންހެނުންގެ "ބޮލަށް ޗިޕް ޖަހައިހެންނެވެ"

މިއީ އިސްލާމްދީން ފޮހެލަން މަސައްކަތްކުރާ ހުޅަނގުގެ ޕްރޮފެސަރުން ޕްރެކްޓިސްކުރަމުން އަންނަ ގޮތެކެވެ. އެބޭފުޅުން ބުނާގޮތުން އަންހެނުންނަކީ ތަބީޢީ ގޮތުންވެސް ދަރިން ވިހައި ބޮޑުކުރުމުގެ މަސްއޫލިއްޔަތު އޮންނަ މީހުން ކަމަށްވުމުން އެމީހުންގެ ދަރީންނަށް ދަސްވާނީ މަންމަގެ ވިސްނުމެވެ. ހެންކަމުން އެމީހުންގެ ސިކުނޑިތައް ދޮވެލުމަށްޓަކައި އެ މަންމަ ނަމާދުކުރުންފަދަ އަޅުކަންތަކާއި ދުރުވެއްޖެނަމަ އޭނާގެ ދަރިންވެސް އެއާއި ދުރުވާނެތީވެ، އެފަދަ ކަންތަކަށް ފަރުވާތެރިވުމެވެ. (ޔަޣުނީ) އަންހެންވެރީންގެ ސިކުނޑިތަކާއި ކުޅެ، ކަންކަމުގައި ބިޒީ ކޮށްލުމެވެ. ދުލުގެ މިނިވަންކަމޭ ބުނެ އެ މަންމަ މީހުންނާއި ދިމާލަށް އެއްޗެހި ކިޔައި ޕޯޑިއަމްތަކަށް ހައްގު ހޯދުމުގެ ނަމުގައި އަރުވާނީއެވެ. އޭގެތެރޭގައި ބުރުގާއާއި ޚާއްޞަކޮށް ދުރުކުރުމުގެ ކެމްޕޭނުތައް ހިންގާނެއެވެ. ބުރުގާއާއި ދުރުވާނަމަ މުޖުތަމަޢު އޮންނާނީ މުސްތަޤުބަލުގައި އިސްލާމްދީނާއި މުޅިން ބީރެއްޓެހިވެފައެވެ. މިއީ ހުޅަނގުގެ ޕްލޭނެވެ. އެމްޑީޕީން ވެސް ކަންކުރީ މިހެންނެއް ނޫން ހެއްޔެވެ؟

ޙައްޤުތައް އޮތީ ޤުރުއާނާއި ސުންނަތުގައި ވަރަށް ފުޅާކޮށް އަންހެނުންނަށް ދީފައެވެ. ދުނިޔޭގެ އެކިކަންކޮޅުތަކުގައި އަންހެނުންނާއި އަންހެންކުދިން ރޭޕަށް ހުށަހެޅި މަގު ގެއްލިގެންދިޔުމުގެ އަސްލަކީ ޙައްގު ހޯދުމުގެ ނަމުގައި ސިޔާސީ ބަޔަކު އެމީހުންގެ އަމިއްލަ އެޖެންޑާ ޙާޞިލް ކުރުމަށްޓަކައި އަންހެންވެރިން ޔޫސްކޮށްލުމެވެ.

އެމްޑީޕީގެ ވެރިކަމާއި މުޅިން ޚިލާފަށް ރައީސް ޑރ. މުޙައްމަދު މުޢިއްޒުގެ ސަރުކާރުން ބުނަނީ ބުރުގާ އެޅުމުގެ ހައްގު ހިމެނޭ ގޮތަށް އަންހެނުންނަށް އެމީހުންގެ ޙައްޤުތައް ޙިމާޔަތް ކުރުމަށް އިޚްތިޔާރާއި މިނިވަންކަން ދީފައިވާ ކަމަށެވެ. މަތީގައި އެވާ ފޭސްބުކް ޕޯސްޓަކީ ކުޑަކުޑަ މިސާލެކެވެ. އަލްމަދްރަސަތުލް އަރަބިއްޔަތުލް އިސްލާމިއްޔާ ފަދަ ސްކޫލްތަކުން މިހާރު ދަރިވަރުންނަށް ބުރުގާ އެޅުމުގެ ހުއްދަ އެއްވެސް ހުރަހެއް ނެތި ލިބެއެވެ. ކުރިން ދަރިންގެ ހައްގުތައް ހިމާޔަތް ކުރުމަށް ގާނޫނީ ފިޔަވަޅު އަޅަން މަޖުބޫރުވި ބެލެނިވެރިންނަށް މިހާރު މިނިވަންކަމާއެކު ލުއި ނޭވާއެއް ދޫކޮށްލެވޭއިރު، އަންހެން ދަރިންނަށް އެމީހުން ޗޫސްކުރަންވީ ދީނީ ޢަޤީދާތޯ ނުވަތަ އެމްޑީޕީގެ މުނާފިގު ފިކުރުތޯ ބުނެވޭނެ ޖާގައެއް މިހާރަކު ނެތެވެ. އެކުދިންގެ ޢަޤީދާއަށް ގެއްލުމެއް ނުދީ ސްކޫލަށް މިހާރު ވަދެވޭނެ އެވެ.

އެމްޑީޕީގެ ނިފާޤުކަން އިތުރަށް ސާފުވަނީ ރައްކާތެރިކަމުގެ ގޮތުން މާސްކާއި ހެލްމެޓް އާންމުކޮށް އަޅަން މަޖުބޫރުކުރިއިރު ވެސް ބުރުގާ މަނާކުރިކުރުމެވެ. އެހެންކަމުން، މިއަދު ހަމަހަމަކަމޭ ބުނެ ވެސް ވާހަކަ ދެއްކޭކަށް އެމްޑީޕީއަކަށް ނެތެވެ. "ހަމަހަމަކަން" މި ބަސް އެމްޑީޕީން ބޭނުންކުރަނީ ސިޔާސީ އެޖެންޑާ އަކަށެވެ. އިންސާނީ ހައްގުތަކާ މެދު އެމީހުން ޚިޔާރުކުރާ ގޮތް މިއޮތީ ފެންނާށެވެ.

އަންހެނުންގެ ހައްގުތަކުގެ މާނައަކީ އެމީހުންގެ އިޚްތިޔާރު ކުރުމުގެ މިނިވަންކަމަށް އިޙްތިރާމް ކުރުމެވެ. ބުރުގާ އަޅަން ބޭނުންވާ މީހުންނަށް އެކަން މަނާ ކޮށްގެން ނުވާނެއެވެ. އަޅައިގެން އުޅުނަސް ނުޖެހުނަސް، އަޅައިގެންއުޅޭ މީހުންނަށް ފިޔަވަޅު އަޅައި ތަފާތުކޮށްގެން ނުވާނެއެވެ. އެމްޑީޕީން މި މިނިވަންކަން ފިއްތާލިއެވެ އެހެންކަމުން، އަންހެނުންގެ މިނިވަންކަމާއި އަދި އެމީހުންނަށް ޙައްޤު ހޯދައިދިނުމުގެ ވާހަކަ ދައްކަން އެމްޑީޕީ ކުފޫ ހަމައެއް ނޫނެވެ. އަންހެނުންގެ ޙައްޤުތަކާއި ބެހޭ ގޮތުން މިހާރު އެމްޑީޕީން އެ ކުރަނީ ސީދާ ފުރައްސާރައެކެވެ.

މިހާރުގެ ސަރުކާރުގެ ސިޔާސަތުތަކުން ސާބިތުވާ ގޮތުގައި އަންހެނުން ބާރުވެރި ކުރެވޭނީ އަންހެނުންގެ ޢަޤީދާއަށް ގެއްލުމެއް ނުދީއެވެ. މިއީ އެމްޑީޕީން ވިސްނަންޖެހޭ ނަމޫނާއެކެވެ.