އަލަށް އިންތިހާބުވެވަޑައިގެންނެވި އެމެރިކާގެ ރައީސް ޑޮނަލްޑް ޓްރަމްޕް އަންނަ މަހު ބާއްވާ ހުވާކުރުމުގެ ރަސްމިއްޔާތުގައި ބައިވެރިވުމަށް ޗައިނާގެ ރައީސް ޝީ ޖިންޕިންއަށް ދައުވަތު ދެއްވައިފިއެވެ.

ރޮއިޓާސް އިން ބުނާ ގޮތުގައި އެމެރިކާގެ ނޫސް އެޖެންސީ ސީބީއެސް ނިއުސް އިން ރިޕޯޓްކޮށްފައިވާ ގޮތުގައި ޖެނުއަރީ 20 ވަނަ ދުވަހު ވޮޝިންޓަންގައި ބާއްވާ އިވެންޓަށް ދައުވަތު ފޮނުވީ ނޮވެމްބަރު މަހުގެ ކުރީކޮޅު ނަމަވެސް އެކަން ބަލައިގަތް ކަމެއް ސާފެއް ނުވެ އެވެ.

ޑޮނަލްޑް ޓްރަމްޕް ހުކުރު ދުވަހު އެންބީސީ ނިއުސްއަށް ދެއްވި އިންޓަވިއުއެއްގައި ވިދާޅުވީ ޝީ ޖިންޕިންއާ އެކު "ރަނގަޅު ގުޅުމެއް" އުފެދިފައިވާ ކަމަށެވެ.

ފާހަގަ ކޮށްލަން ޖެހޭ ކަމަކީ ނޮވެމްބަރު މަހުގެ ފަހުކޮޅު ޗައިނާގެ ދައުލަތުގެ މީޑިއާތަކުން ޑޮނަލްޑް ޓްރަމްޕަށް އިންޒާރު ދީފައި ވަނީ ޗައިނާގެ މުދަލުން އިތުރު ޓެރިފް ނަގަން އޭނާ ގެންގުޅުއްވާ ފިޔަވަޅަކީ ދުނިޔޭގެ އެންމެ ބޮޑު ދެ އިގްތިސާދު ފަނާކުރަނިވި 'ޓެރިފް ހަނގުރާމައަކަށް' ދަމައިގަނެވޭނެ ކަމެއް ކަމަށެވެ.

ޗައިނާގެ މުދަލުން ޓެރިފް ނަގާ މިންވަރު އިތުރުކޮށްފިނަމަ ޗައިނާއިން އެމެރިކާ ޑޮލަރުން ވިޔަފާރިކުރުން ހުއްޓާލަން ޖެހިދާނެ ކަމަށް ބުނެ ވަރުގަދަ އިންޒާރެއް ވެސް ވަނީ ދީފައެވެ.

ޗައިނާ އާއި އެމެރިކާއާ ދެމެދު ޖެހިފައިވާ ވިޔަފާރީގެ މައްސަލަތައް ހައްލު ކުރުމަށް ބެއިޖިން އޮތީ ތައްޔާރަށް ކަމަށް ބުނެ ޗައިނާގެ ރައީސް ވަނީ ސިޓީއެއް ފޮނުވާފައެވެ.

ޗައިނާގެ ރައީސްގެ ސިޓީގައި ދެގައުމުގެ ސަޕްލައި ޗޭން ވަކިކޮށްގެން ނުވާނެ ކަމަށް ވެސް ބުނެފައި ވެއެވެ.