ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހެނދުނު ދަރުބާރުގެއަށް ވަޑައިގެން، އަލިފާނުގެ ހާދިސާއާ ގުޅިގެން ވަގުތީގޮތުން އެތަނަށް ބަދަލުކުރެވުނު ތިން މިނިސްޓްރީގެ މަސައްކަތްތައް ބައްލަވާލައްވައި، އެ މިނިސްޓްރީތަކުގެ މުވައްޒަފުންނާ ބައްދަލުކުރައްވައިފިއެވެ.

ރައީސުލްޖުމްހޫރިއްޔާ ބައްދަލުކުރެއްވި މިނިސްޓްރީތަކަކީ މިނިސްޓްރީ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް، މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ، އަދި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއެވެ.

މުވައްޒަފުންނާއި މުޚާތަބުކުރައްވަމުން ރައީސުލްޖުމްހޫރިއްޔާ ވިދާޅުވީ، އަލިފާނުގެ ހާދިސާއިން ލިބުނީ އަގު ނުކުރެވޭވަރުގެ ބޮޑު ގެއްލުމެއް ކަމަށާއި، މުވައްޒަފުންގެ އަމިއްލަ ތަކެތި ގެއްލިގެން ދިއުމުން ކުރިމަތިވާނެ ދަތިތައް ތަސައްވަރުކުރަން އުނދަގޫވާނެ ކަމަށެވެ. އެހެންނަމަވެސް، މި ހާލަތުގައިވެސް މުވައްޒަފުންގެ ފަރާތުން ފެނިގެންދިޔަ އިޖާބީ ވިސްނުމާއި ކެތްތެރިކަން އަދި މަސައްކަތްތައް އަލުން ފެށުމަށް ދެއްވި އެއްބާރުލުން ރައީސް ފާހަގަކުރެއްވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، ވީހާވެސް އާންމު ހާލަތަކަށް އޮފީސް މާހައުލު ގެނައުމަށްޓަކައި ސަރުކާރުގެ މުއައްސަސާތަކާއި ގުޅިގެން މަސައްކަތްތަކެއް ކުރަމުންދާ ކަމަށެވެ. މީގެ ތެރޭގައި ފާޚާނާ އިތުރުކުރުމާއި، ކެފެޓީރިއާގެ ޚިދުމަތް ދިނުމާއި، އިލެކްޓްރޯނިކްސް އަދި ކޮމްޕިއުޓަރ ސިސްޓަމްފަދަ ތަކެތި ހޯދުމުގެ މަސައްކަތް ހިމެނެއެވެ.

އަލިފާނުގެ ހާދިސާގައި އަނދައިގެންދިޔަ ތިން މިނިސްޓްރީ ހިންގުމަށް ދާއިމީ ހައްލެއް ލިބެންދެން ތަނެއް ކުއްޔަށް ނުހިފުމަށް ނިންމާފައިވާކަން ރައީސް ފާހަގަކުރެއްވިއެވެ. އަދި ދާއިމީ ހައްލެއް ލިބެންދެން ސަރުކާރުގެ ތަނެއްގައި މިނިސްޓްރީތަކުން ޚިދުމަތް ދިނުމަށް ވިސްނާފައިވާ ކަމަށްވެސް ވިދާޅުވިއެވެ.

މީގެއިތުރުން، ރައީސުލްޖުމްހޫރިއްޔާ ވަނީ އަލިފާނުގެ ހާދިސާއާ ގުޅިގެން އެކުލަވާލެވުނު ޓާސްކް ފޯސްއާއި ބައެއް ކުންފުނިތަކުގެ ވެރިންނާ ބައްދަލުކުރައްވައި، މަސައްކަތްތަކުގެ އެންމެ ފަހުގެ މަޢުލޫމާތު ސާފުކުރައްވާފައެވެ. އަދި ސަރުކާރުގެ ކުންފުނިތަކުންނާއި އެކި މުއައްސަސާތަކުން މި ހާދިސާއާއި ގުޅިގެން ދެމުންދާ އެހީތެރިކަން ޝުކުރުވެރިކަމާއެކު ފާހަގަ ކުރައްވާފައި ވެއެވެ.

ރައީސުލްޖުމްހޫރިއްޔާގެ މި ޒިޔާރަތުގައި، ދަރުބާރުގެއަށް ވަޑައިގެންނެވުމަށްފަހު ސިޓީ ކައުންސިލްގެ ހުއްޓިފައިވާ ޚިދުމަތްތައް ދިނުމަށް ވަމުންދާ ތައްޔާރީތައް ބެއްލެވުމަށް ގަލޮޅު ސްކޫލަށްވެސް ޒިޔާރަތްކުރެއްވިއެވެ. އެތަނުގައި އެމަނިކުފާނު މުވައްޒަފުންނާއި ބައްދަލުކުރައްވައި، އެބޭފުޅުންގެ ބޭނުންތަކާއި މަސައްކަތްތައް ކުރިއަށްދާގޮތް ބައްލަވާލެއްވިއެވެ.