ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އަރިއަތޮޅު ދެކުނުބުރީގެ ތަރައްޤީއަށް އެންމެ މުހިންމު ކަންކަމާއި ގުޅޭގޮތުން އެ އަތޮޅުގެ އަތޮޅު ކައުންސިލާއި މަޝްވަރާކުރައްވައިފިއެވެ. މި ބައްދަލުކުރެއްވުން ކުރިއަށް ގެންދެވުނީ ރައީސުލްޖުމްހޫރިއްޔާ މިހާރު އެ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
މިއަދު ހެނދުނު ބޭއްވުނު މި ބައްދަލުވުމުގައި، އަރިއަތޮޅު ދެކުނުބުރީ ކައުންސިލުން ވަނީ ސްކޫލުތަކުގައި ސޯލާ ޕެނަލް ހަރުކުރުމާއި ގުޅޭގޮތުން މަޝްވަރާކުރައްވާފައެވެ. މީގެއިތުރުން، އަތޮޅު ކައުންސިލަށް އާމްދަނީ ހޯދުމަށް މަގުފަހިވާނެ ގޮތަކަށް އދ. ލޮނުބޯ ބޭނުންކުރެވޭނެ ގޮތް ހައްދަވައިދެއްވުމަށް ކައުންސިލުން އެދިވަޑައިގަތެވެ.
އަތޮޅު ކައުންސިލުން ވަނީ އެ އަތޮޅުގެ ޞިއްޙީ ޚިދުމަތް ތަރައްޤީކުރުމާއި، ދަތުރުފަތުރުގެ ނިޒާމު ހަރުދަނާކުރުމާއި، ފަތުރުވެރިކަން ފުޅާކުރުމަށް ބޭނުންވާކަން ފާހަގަކުރައްވާފައެވެ. އަދި އަތޮޅުގައި ޕިކްނިކް ދާނެ ރަށްތައް މަދުކަން ފާހަގަކުރައްވައި، އެކަން ފަހިކޮށްދެއްވުމަށް ވެސް އެދިވަޑައިގެންފައިވެއެވެ.
Advertisement
މި ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ދަތުރުފަތުރުގެ ޚިދުމަތް ފުޅާކުރުމަށް އާރް.ޓީ.އެލްގެ ޚިދުމަތް ކުރިއަށް ގެންދިއުމަށް މަސައްކަތް ކުރައްވަމުން ގެންދަވާ ކަމަށެވެ. އަދި ކައުންސިލުން ފާހަގަކުރެއްވި އެހެނިހެން ކަންކަންވެސް ބައްލަވާނެ ކަމުގައި އެމަނިކުފާނު ވިދާޅުވިއެވެ.
މި ބައްދަލުވުމުގައި އަރިއަތޮޅު ދެކުނުބުރީގެ ތަރައްޤީއަށް މުހިންމު ގިނަ ކަންކަމާއި ގުޅޭގޮތުން މަޝްވަރާކުރެވި، އަތޮޅުގެ ކުރިއެރުމަށް ބޭނުންވާ ކަންކަން ފާހަގަކުރެވުނެވެ. ރައީސުލްޖުމްހޫރިއްޔާގެ މި ދަތުރުފުޅަކީ އަތޮޅުގެ ތަރައްޤީއަށް އިތުރު ހިތްވަރަކަށް ވެގެންދާނެއެވެ.
