ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަދު އދ. ހަންޏާމީދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ (އ.ތ.މ.) ކޮމިޓީއާ ބައްދަލުކުރައްވައި، އެރަށުގެ ތަރައްޤީއަށް ބޭނުންވާ މުހިންމު ކަންކަމާއި ގުޅޭގޮތުން މަޝްވަރާކުރައްވައިފިއެވެ. މި ބައްދަލުވުން ކުރިއަށް ގެންގޮސްފައިވަނީ އަރިއަތޮޅު ދެކުނުބުރީ އަތޮޅު ކައުންސިލް އިދާރާގައިއެވެ.

މި ބައްދަލުވުމުގައި ކައުންސިލުން ވަނީ ގޮނޑުދޮށް ހިމާޔަތްކުރުމާއި، ކުޅިވަރުގެ ދާއިރާ ކުރިއެރުވުމާއި، ސްކޫލުގެ ހާލަތު ރަނގަޅުކުރުމާއި، ޒަމާނީ ކުނިކޮށްޓެއް ތަރައްޤީކުރުމަށް އެދިވަޑައިގެންފައެވެ. އަދި ރަށުގެ ސަޤާފަތާއި ތަރިކަ ރައްކާތެރިކޮށް، އެކަމުން ރަށަށް މަންފާކުރާނެ ގޮތްތަކާއި، ދޯނި އެހެލާ ސަރަހައްދަށް ގެންނަން ބޭނުންވާ ބަދަލުތަކާ ބެހޭގޮތުންވެސް މަޝްވަރާކުރެވުނެވެ.

އ.ތ.މ ކޮމިޓީއިން ވަނީ ޕިކްނިކް ދާނެ ރަށެއް ހަންޏާމީދޫ ކައިރީގައި ނެތުމުގެ ކަންބޮޑުވުން ފާޅުކުރައްވައި، ރަށުގެ ހިނަވާގޭގެ މަސައްކަތް ނިންމުމަށް ސަރުކާރުގެ އެހީތެރިކަން ބޭނުންވާކަން ފާހަގަކުރައްވާފައިވެއެވެ.

އެގޮތުން، ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ހަންޏާމީދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ.

ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވައި، އެކަންކަން ކުރިއަށްގެންދިއުމުގައި ކައުންސިލުން ފާހަގަކުރެއްވި ގޮތަށް ކުރިއަށްދިއުމަށް މަސައްކަތްކުރައްވާނެ ކަމަށެވެ. އަދި ވަޢުދުވެވަޑައިގެންފައިވާ ކަންކަން ކުރިއަށްދާނެކަންވެސް އެމަނިކުފާނު ފާހަގަކުރެއްވިއެވެ.