ރާއްޖޭގައި ހުރި ޒަމާންވީ މައްސަލަތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައްލު ހޯއްދަވައިދެއްވަނީ ހިކުމަތްތެރިކަމާއި ހުޝިޔާރުކަމާއެކުގައި ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު އަޙްމަދު ޠާރިޤު ވިދާޅުވެއްޖެއެވެ.

ޠާރިޤު މިހެން ވިދާޅުވީ ރައީސުލްޖުމްހޫރިއްޔާ އަރިއަތޮޅު ދެކުނުބުރިއަށް މިހާރު ކުރައްވަމުން ގެންދަވާ ދަތުރުފުޅުގައި މަހިބަދޫއަށް ވަޑައިގެން ރައްޔިތުންނާއި ބައްދަލުކުރެއްވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

މެންބަރު ޠާރިޤު ވިދާޅުވީ ރައީސުލްޖުމްހޫރިއްޔާ ނިންމަވާ ނިންމެވުންތަކަކީ ރާއްޖޭގައި ހުރި ޒަމާންވީ މައްސަލަތަކަށް ހައްލު ހޯދައިދިނުމަށް މުހިންމު ނިންމެވުންތަކެއް ކަމަށެވެ. އަދި މާލީ ގޮތުންނާއި ޒުވާނުންނާއި ގުޅުންހުރި މައްސަލަތަކުގައި ކަންކަން ނިންމުމަކީ ސިޔާސީގޮތުން އުނދަގޫކަމެއް ކަމަށާއި، ނަމަވެސް ރައީސް ނިންމެވުންތައް ނިންމަވަނީ ހިކުމަތްތެރިކަމާއި ކެތްތެރިކަމާއި ހުޝިޔާރުކަމާއެކުގައި ކަމަށް ވިދާޅުވިއެވެ.

"ރާއްޖޭގެ ރައީސުލްޖުމްޙޫރިއްޔާ، ރާއްޖޭގެ އިގްތިސާދާއި ޒުވާނުންގެ ދުޅަހެޔޮކަމަށް ނިންމަވާފައިވާ ބޮޑެތި ސިޔާސަތުތަކަކީ ކުރިއަށް އޮތް ޖީލުތަކުގައި ދިވެހި ރައްޔިތުންނަށް އެކަމުގެ ފައިދާ ފެނިގެންދާނެ ކަންކަން ކަމުގައި އަޅުގަނޑު ފާހަގަކުރަން," ޠާރިޤް ވިދާޅުވިއެވެ.

މީގެއިތުރުން، ޠާރިޤު ވިދާޅުވީ، "މަހިބަދޫ ރާއްޖޭގެ އަރބަން ސެންޓަރުގެ ގޮތުގައި ކަނޑައަޅުއްވައި، މިރަށާއި މިއަތޮޅުގެ މި ސަރަހައްދު ތަރައްގީކުރެއްވުމަށްޓަކައި ސިޔާސަތު ކަނޑައަޅުއްވާފައިވާތީ" ރައީސަށް ޝުކުރު އަދާކުރައްވާ ކަމަށެވެ.

ވެރިކަމުގެ ފުރަތަމަ އަހަރު، ކުރީ ސަރުކާރުގެ ދަރަނިތައް ދެއްކުމާއި އަސާސީ ޚިދުމަތްތައް ފޯރުކޮށްދިނުމަށް މަސައްކަތްކުރި ކަމަށް ފާހަގަކުރައްވައި، ކުރިއަށް އޮތް އަހަރަކީ އުއްމީދީ އަހަރެއް ކަމަށާއި ތަރައްގީގެ ބޮޑެތި މަޝްރޫއުތައް ފެށިގެންދާނެ ކަމުގެ ޔަގީންކަން އެބައޮތް ކަމަށްވެސް ޠާރިޤް ވިދާޅުވިއެވެ.