އަރިއަތޮޅު ދެކުނުބުރީ ދަނގެތީގެ ބަނދަރުގެ ދަތިކަމަކީ ރައްޔިތުންނަށް ދިމާވެފައިވާ އެންމެ ބޮޑު އެއް މައްސަލަ ކަމަށާއި، ރައްޔިތުން އެދޭގޮތަށް ބަނދަރު ތަރައްޤީކުރުމުގެ ޢަމަލީ މަސައްކަތް މި ފެށޭ އަހަރު ފަށްޓަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މިރޭ ދަނގެތީ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް ވިދާޅުވީ، ދަނގެތި ކައުންސިލާއެކު ބޭއްވެވި ބައްދަލުވުމުގައި ރަށަށް އެންމެ މުހިންމު ކަމެއްގެ ގޮތުގައި ފާހަގަކުރެވިފައިވަނީ ބަނދަރުގެ މައްސަލަ ކަމަށެވެ. އެމަނިކުފާނު ވިދާޅުވީ ބަނދަރުގެ ދަތިކަމަކީ ޒަމާންވީ ބޮޑު މައްސަލައެއް ކަމަށާއި، ދަނގެތީގެ އިޤްތިޞާދު ކުރިއެރުމަށާއި، ރަށުގެ އިޖުތިމާޢީ އަދި ލަފާފުރުމުގެ މައްސަލައަށް ހައްލެއް ގެނެސްދެއްވާނެ ކަމަށެވެ.
"ފެށޭ އަހަރު ދަނގެތީގެ ލޮބުވެތި ރައްޔިތުން އެދޭގޮތަށް އެހުރިހާ މައްސަލައެއް ހައްލުވާ ގޮތަށް ބަނދަރު ހަދައިދޭނަން،" ރައީސް ވިދާޅުވިއެވެ. އަދި އަންނަ އަހަރު ބަނދަރުގެ ޢަމަލީ މަސައްކަތް ފަށްޓަވައި، 2026 ވަނަ އަހަރު މަޝްރޫޢު ނިންމަވާނެކަމަށްވެސް އެމަނިކުފާނު ވިދާޅުވިއެވެ.
ދަނގެއްޗަކީ ލޯކަލް ޓޫރިޒަމް ފުޅާވަމުން އަންނަ ރަށެއްކަން ފާހަގަކުރައްވައި، މިވަގުތު 18 ގެސްޓް ހައުސް ހިންގަމުންދާކަމަށް ރައީސް ވިދާޅުވިއެވެ. އަދި ކުރިއަށް އޮތް ދެ އަހަރު ދުވަހުގެ ތެރޭގައި ޓޫރިޒަމްގެ އެނދުގެ އަދަދު އެރަށުގައި 600 އަށް އަރާނެކަމަށް ލަފާކުރެވޭ ކަމަށްވެސް ވިދާޅުވިއެވެ.
ރައީސް އިތުރަށް ވިދާޅުވީ، ބަނދަރު ތަރައްޤީކުރާނީ ރަށްގިރުމުގެ މައްސަލައަށް ވެސް ޙައްލު ގެނެވޭނެ ގޮތަށް ކަމަށެވެ. މީގެ އިތުރުން، އަންނަ އަހަރުގެ ފަހުކޮޅު ނުވަތަ 2026 ވަނަ އަހަރު ދަނގެތީގެ ބިން ހިއްކައި ބޯހިޔާވަހިކަމުގެ މަޝްރޫޢު ހިންގަވާނެކަމަށް ވެސް އެމަނިކުފާނު ވިދާޅުވިއެވެ.
ރައްޔިތުންގެ އެދުމުގެ މަތިން ޘަޤާފީ ސެންޓަރެއް ޤާއިމްކުރުމާއި، ރައްކާތެރިގޮތުގައި ކުނި ނައްތާލެވޭނެ ނިޒާމެއް ޤާއިމްކޮށްދެއްވާނެ ކަމަށްވެސް ރައީސް ވިދާޅުވިއެވެ.
