ރައްޔިތުންނަށް ދޭންޖެހޭ ޚިދުމަތްތައް މެދުނުކެނޑި ދިނުމަކީ ސަރުކާރުގެ އެންމެ ބޮޑު އަމާޒުކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ބުރާސްފަތި ދުވަހު ހިނގި އަލިފާނުގެ ހާދިސާގައި މާލޭ ސިޓީ ކައުންސިލްގެ ދެ ސެކްޝަނެއް އަނދައިގެން ދިއުމާ ގުޅިގެން، މިއަދު ގަލޮޅު މަދަރުސާގައި ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ. މި ބައްދަލުވުމުގައި ވަޒީރު ވަނީ އަލިފާނުގެ ހާދިސާގައި ގެއްލުން ލިބުނު ވައިޓަލް ރެޖިސްޓްރޭޝަނާއި، ލޭންޑް އެންޑް ބިލްޑިންގ ޑިޕާރޓްމަންޓުގެ މަސައްކަތް އަލުން ފެށުމުގެ މުހިންމުކަން ފާހަގަކުރައްވާފައެވެ.

"މިހާދިސާ ހިނގި ހިސާބުން ފެށިގެން ވެސް ތިޔަ ބޭފުޅުން ވަރަށް ޒިންމާދާރު ގޮތެއްގައި ވަރަށް ރަނގަޅަށް ފަރުވާތެރި ކަމާއެކު މަސައްކަތްތައް ކުރިއަށް ގެންދާކަން އަޅުގަނޑު ފާހަގަކުރަން. އަދި ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ނަންފުޅުގައި ތިޔަ ބޭފުޅުންނަށް ޝުކުރު ދަންނަވަން" ވަޒީރު އާދަމް ޝަރީފު ވިދާޅުވިއެވެ.

ވަޒީރު ވަނީ އަލިފާނުގެ ހާދިސާގައި ގެއްލުން ލިބުނު 3 ވުޒާރާއާއި، މާލޭ ސިޓީ ކައުންސިލްގެ ޢިމާރާތަކީ މުހިންމު ޚިދުމަތްތަކެއް ދެމުން އަންނަ ތަންތަންކަން ފާހަގަކުރައްވާފައެވެ. އެހެންކަމުން އެތަންތަނަށް ބޭނުންވާ ކަންކަން ފުރިހަމަކޮށްދިނުމަށް ރައީސް ޚާއްސަ ސަމާލުކަމެއް ދެއްވާކަމަށް ވަޒީރު ވިދާޅުވިއެވެ.

ބައްދަލުވުމަށްފަހު، ވަޒީރު ވަނީ އަލިފާނުގެ ހާދިސާގައި ގެއްލުންވި ޢިމާރާތްތައް ސާފުކުރުމުގެ މަސައްކަތް ސިޓީސް މިނިސްޓްރީގެ ޕަބްލިކްވޯރކްސް ޑިޕާރޓްމަންޓުން ކުރިއަށް ގެންދާ ގޮތް ބައްލަވައިލައްވާފައެވެ.