ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އަރިއަތޮޅު ދެކުނުބުރީ މަންދޫ ކައުންސިލާއި އެރަށު އަންހެނުންގެ ތަރައްޤީއަށް މަސައްކަތްކުރާ (އ.ތ.މ.) ކޮމިޓީއާ ބައްދަލުކުރައްވައި، އެރަށުގެ ތަރައްޤީއަށް ބޭނުންވާ މުހިންމު ކަންކަމާ ގުޅޭގޮތުން މަޝްވަރާކުރައްވައިފިއެވެ.

އދ. ދަނގެތި ކައުންސިލް އިދާރާގައި މިއަދު ކުރިއަށްދިޔަ މި ބައްދަލުވުމުގައި، ކައުންސިލުން ވަނީ ފާއިތުވި އަހަރުތަކުގައި އެކި ސަރުކާރުތަކުން މަންދޫގައި މަޝްރޫޢުތައް ހިންގާފައިވާލެއް މަދުކަން ފާހަގަކުރައްވައި، މިހާރުގެ ސަރުކާރުން ގިނަ މަޝްރޫޢުތައް ކުރިއަށް ގެންދެވުމަށް އެދިވަޑައިގެންފައެވެ. އަދި ރަށަށް އެންމެ ބޭނުންވާ ކަންކަމުގެ ތެރޭގައި ސުކޫލަށް އިތުރު ކްލާސްރޫމް، ޞިއްޙީ މަރުކަޒުގެ ޚިދުމަތް ތަރައްޤީކުރުން، ބަނދަރު ތަރައްޤީކުރުން، އޭ.ޓީ.އެމްގެ ޚިދުމަތް ރަށުން ލިބުން އަދި މާލެއަށް ފަސޭހަކަމާއެކު ދަތުރުކުރެވޭނެ އިންތިޒާމެއް ހަމަޖެއްސުން ހިމެނޭކަމަށް ކައުންސިލުން ފާހަގަކުރައްވާފައިވެއެވެ.

މި ބައްދަލުވުމުގައި ރައީސް ވިދާޅުވީ ވަޢުދުވެވަޑައިގެންފައިވާ ކަންކަން ކުރިއަށްދާނެ ކަމަށެވެ. އަދި މުޅި ރާއްޖޭގައި އޭ.ޓީ.އެމްގެ ޚިދުމަތް ތަޢާރަފުކުރުމުގެ މަޝްރޫޢު ފެށިފައިވާކަން ވެސް އެމަނިކުފާނު ފާހަގަކުރެއްވިއެވެ.

މީގެއިތުރުން، ރައީސްގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ މަންދޫގެ ތަރައްޤީއަށް ކުރިޔަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ޙިއްޞާކުރައްވާފައެވެ. އަދި ކައުންސިލުން ފާހަގަކުރެއްވި އެކި މަޝްރޫޢުތަކުގެ އެންމެ ފަހުގެ މަޢުލޫމާތު ވެސް ކަމާގުޅޭ ވަޒީރުން ޙިއްޞާކުރެއްވިއެވެ.

މި ބައްދަލުވުމަކީ ރަށުގެ ތަރައްޤީއަށް ބޭނުންވާ ކަންކަން ފާހަގަކޮށް، ސަރުކާރުގެ ސަމާލުކަމަށް ގެނައުމަށް ލިބުނު މުހިންމު ފުރުޞަތެއްކަމަށް މަންދޫ ކައުންސިލުން ފާހަގަކުރެއްވިއެވެ.