ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ބޭރު ފައިސާއާބެހޭ ބިލު ތަސްދީޤު ކުރައްވައިފިއެވެ. މި ބިލަކީ 2024 ޑިސެންބަރު 12 ވަނަ ދުވަހު ބޭއްވުނު ރައްޔިތުންގެ މަޖިލީހުގެ 2024 ވަނަ އަހަރުގެ ތިންވަނަ ދައުރުގެ 60 ވަނަ ޖަލްސާއިން ފާސްކުރެއްވި ބިލެކެވެ.

މި ބިލުގެ މައިގަނޑު މަޤްޞަދަކީ ދިވެހިރާއްޖޭގައި ބޭރު ފައިސާއިން ކުރެވޭނެ މުޢާމަލާތްތައް ކަނޑައެޅުމާއި، ބޭރު ފައިސާ ރާއްޖެއަށް އެތެރެކުރުމާއި ބޭރުކުރުމާއި، ބޭނުންކުރުމާއި، ޖަމާކުރުމާއި، މާރުކުރުމާބެހޭ އުސޫލުތައް ކަނޑައެޅުމެވެ. މީގެ އިތުރުން، ބޭރު ފައިސާއާ ގުޅޭ އެހެނިހެން މުޢާމަލާތްތަކާބެހޭ ހަމަތަކާއި އުސޫލުތައް ކަނޑައަޅައި، އެކަންކަން ހިންގުމަށް ބޭނުންވާ ހަރުދަނާ ޤާނޫނީ އޮނިގަނޑެއް އެކުލަވާލުމެވެ.

މި ބިލުގެ ދަށުން، ވަކި ޙާލަތްތަކެއްގައި މެނުވީ ރާއްޖޭގައި ކުރެވޭ މަނިޓަރީ އިލްތިޒާމްތަކާއި މުޢާމަލާތްތައް ދިވެހި ފައިސާ ފިޔަވައި އެހެން ބޭރު ފައިސާއަކުން ކުރުން މަނާކުރެވިފައިވެއެވެ. އަދި ދިވެހިރާއްޖޭގައި ދިވެއްސަކު ގަންނަ މުދަލާއި ހޯދާ ޚިދުމަތުގެ އަގު ބޭރު ފައިސާއިން އަދާކުރުމަށް ލާޒިމު ނުކުރެވޭނެއެވެ.

ބިލުގައި ބޭރު ފައިސާއިން އާމްދަނީ ލިބޭ ފަރާތްތަކުގެ ތެރެއިން ވަކި ގިންތިތަކަކަށް ފެތޭ ފަރާތްތަކުން، އެ ފަރާތްތަކަށް ލިބޭ ބޭރު ފައިސާގެ އާމްދަނީން ބައެއް ބޭންކަކަށް މާރުކުރަންޖެހޭ ގޮތަށް ކަނޑައަޅާފައިވެއެވެ. މީގެ ތެރޭގައި ޓޫރިޒަމް ދާއިރާގެ އެކި ބާވަތްތަކުގެ ވިޔަފާރިތަކާއި، އަހަރަކު 15 މިލިއަން އެމެރިކާ ޑޮލަރަށްވުރެ ގިނައިން ބޭރު ފައިސާއިން އާމްދަނީ ލިބޭ ފަރާތްތައް ހިމެނެއެވެ.

މި ޤާނޫނު ހިންގައި ތަންފީޛުކުރާނީ މޯލްޑިވްސް މަނިޓަރީ އޮތޯރިޓީންނެވެ. އަދި މި ޤާނޫނުގެ ދަށުން ހަދަންޖެހޭ ގަވާއިދުތައް، ޤާނޫނަށް ޢަމަލުކުރަން ފަށާތާ 2 މަސްދުވަހުގެ ތެރޭގައި އެމް.އެމް.އޭ އިން ހަދަންޖެހޭނެއެވެ.

ރައީސުލްޖުމްހޫރިއްޔާ މިއަދު މި ބިލު ތަސްދީޤުކުރެއްވުމާއި ގުޅިގެން، މި ޤާނޫނު ވަނީ ދިވެހި ސަރުކާރުގެ ގެޒެޓުގައި ޝާއިޢުކުރެވިފައެވެ. މި ޤާނޫނަށް ޢަމަލުކުރަން ފަށާނީ 1 ޖަނަވަރީ 2025 ގައެވެ. މި ޤާނޫނަށް ޢަމަލުކުރަން ފެށުމާއެކު، ކުރިން ޢަމަލުކުރަމުން އައި ބޭރު ފައިސާއާބެހޭ ގަވާއިދާއި މޯލްޑިވްސް މަނިޓަރީ އޮތޯރިޓީގެ ޤާނޫނުގެ ބައެއް މާއްދާ އުވިގެންދާނެއެވެ.