އަލިފާނުގެ ހާދިސާއިން ގެއްލުން ލިބުނު ތިން ވުޒާރާގެ މަސައްކަތްތައް ވަގުތީގޮތުން ދަރުބާރުގެއަށް ބަދަލުކޮށް ޚިދުމަތް ދިނުމަށް ވަމުންދާ ތައްޔާރީތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭގެ ވަގުތެއްގައި ބައްލަވާލައްވައި، އެކަމަށް ބޭނުންވާ އިރުޝާދުތައް ދެއްވައިފިއެވެ.

ބުރާސްފަތި ދުވަހު ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާ ހިންގާ އިމާރާތުގައި ހިނގި އަލިފާނުގެ ހާދިސާގައި އެ ވުޒާރާއާއި އިމާރާތްކުރުމާއި ބިނާރާބެހޭ ވުޒާރާ ވަނީ ބޭނުންނުކުރެވޭ ވަރަށް އަނދާފައެވެ. އަދި އިންވެގެން ހުންނަ ގްރީން ބިލްޑިންގގައި ހިންގަމުން އަންނަ މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާއަށްވެސް ވަނީ އަލިފާނުގެ އަސަރުކޮށްފައެވެ.

މި ހާދިސާގެ ސަބަބުން ހުއްޓިފައިވާ ތިން ވުޒާރާގެ މަސައްކަތްތައް އަލުން ފެށުމަށްޓަކައި، އެ ވުޒާރާތަކުގެ މަސައްކަތް ދަރުބާރުގެއަށް ބަދަލުކުރުމުގެ މަސައްކަތް ސަރުކާރުން ވަނީ ފަށާފައެވެ. މި މަސައްކަތްތައް ކުރިއަށްދާގޮތް ބެއްލެވުމަށް ރައީސުލްޖުމްހޫރިއްޔާ ވަނީ ރޭ ދަރުބާރުގެއަށް ވަޑައިގެން، އެތަނުގައި ހަމަޖައްސަމުންދާ އިންތިޒާމުތައް ބައްލަވާލައްވާފައެވެ. އަދި އެކަމުގައި އަމަލުކުރަންވީ ގޮތްތަކާއި ގުޅޭ އިރުޝާދުތައް ރައީސް ވަނީ އެ ވުޒާރާތަކަށް ދެއްވާފައެވެ.

^{މާދަމާއަށް އޮފީސްތަކުގެ ޚިދުމަތް ދިނުމަށްޓަކައި ދަރުބާރުގޭގައި ކުރިޔަށްދާ މަސައްކަތްތަކުގެ ތެރެއިން / ފޮޓޯ. ބްރޭކިންގއެމްވީ}

ގެދޮރުވެރިކަމާބެހޭ ވަޒީރު ޑރ. އަލީ ހައިދަރު އަހުމަދު ވިދާޅުވި ގޮތުގައި، އާދީއްތަ ދުވަހުން ފެށިގެން ގެދޮރުވެރިކަމާއި ބިމާއި އުމްރާނީ ތަރައްގީއާބެހޭ ވުޒާރާގެ މަސައްކަތް އަލުން ފެށޭނެއެވެ. އެހެން ދެ ވުޒާރާގެ މަސައްކަތްތައްވެސް ވަގުތީގޮތުން ދަރުބާރުގެއަށް ބަދަލުކުރުމުގެ މަސައްކަތް ދަނީ ކުރިއަށެވެ.

މި ހާދިސާއާ ގުޅިގެން ސަރުކާރުން އަވަސް ފިޔަވަޅުތަކެއް އަޅަމުންދާކަން ފާހަގަކުރެވެއެވެ. ރައްޔިތުންނަށް ދެމުންދާ މުހިންމު ޚިދުމަތްތައް މެދުނުކެނޑި ފޯރުކޮށްދިނުމަށްޓަކައި، ވުޒާރާތަކުގެ މަސައްކަތްތައް ވީހާވެސް އަވަހަކަށް އަލުން ފެށުމަށް ސަރުކާރުން ދަނީ މަސައްކަތްކުރަމުންނެވެ.