މަސްވެރިކަމުގެ ދާއިރާއިން މީހުން ބިނާކުރުމަށް މީގެ ކުރިން އެއްވެސް ސަރުކާރަކުން މަސައްކަތްނުކުރާ ވަރަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ދަނީ މަސައްކަތް ކުރަމުން ކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ މަސްވެރިންގެ ދުވަހާއި ގުޅިގެން މިއަދު ހުޅުމާލެ ސެންޓްރަލް ޕާކުގައި ބޭއްވި "މަސްވެރި ހަވީރު"ގެ ތެރެއިން މީޑިއާއާ ވާހަކަދައްކަވަމުންނެވެ.

މަސްވެރިކަމާއި ބެހޭ ވުޒާރާއާއި، މޯލްޑިވްސް ސީފުޑް ޕްރޮސެސާސް އެންޑް އެކްސްޕޯޓަރސް އެސޯސިއޭޝަން ގުޅިގެން ބޭއްވި މި ހަރަކާތް ހުޅުއްވައިދެއްވީ މަސްވެރިކަމާބެހޭ ވަޒީރު އަހުމަދު ޝިޔާމް އަދި މިފްކޯގެ ސީއީއޯ ވިތާލީ ލުބިމޯފާއި ރާއްޖެއިން މަސް އެކްސްޕޯޓް ކުރާ ފަރާތްތަކުގެ ޖަމިއްޔާގެ ރައީސް އުމަރު ޖަމާލްއެވެ.

ވަޒީރު ޝިޔާމް ވިދާޅުވީ މަސްވެރި ސިނާޢަތް ކުރިއެރުވުމަށް ސަރުކާރުން ގިނަ މަސައްކަތްތަކެއް ކޮށްފައިވާކަމަށެވެ. މިގޮތުން މަސްވެރިންނަށް ފައިސާ ދޫކުރުމާއި، ހެޔޮ އަގުގައި ތެޔޮ ފޯރުކޮށްދިނުމުގެ މަސައްކަތާއި، އައިސް ލިބުމުގެ ދަތިތައް ޙައްލުކުރުމަށް މަސައްކަތް ކުރައްވަމުންދާކަމަށް ވަޒީރު ވިދާޅުވިއެވެ.

"މީހުން ބިނާކުރުމަށް މީގެ ކުރިން އެއްވެސް ސަރުކާރަކުން ނުކުރާ ވަރަށް ވުޒާރާއިން އެ މަސައްކަތް އެބަކުރެވޭ. ރައީސުލްޖުމްހޫރިއްޔާގެ ތަޞައްވުރާއި އެއްގޮތަށް ދޯނިތަކުން ފޭބި ދިވެހިންނާއި ޒުވާނުން އަނބުރާ ދޯނިތަކަށް އެރުވުމަށް ގިނަ މަސައްކަތްތަކެއް ކުރެވޭ. ޒުވާނުން ޝައުޤުވެރިކުރުމަށް ފިޝަރީޒް ކޮލެޖް ޤާއިމްކޮށް، ދަފްތަރެއް އެކުލަވާލެވޭނެ. މި ބަދަލުތަކާއެކު މުސްތަޤުބަލުގައި މި ސިނާޢަތްވެގެންދާނީ ގިނަ ދިވެހިން ޝައުޤުވެރިވާ ސިނާޢަތަކަށް." ވަޒީރު ވިދާޅުވިއެވެ.

މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ގިނަ މަސައްކަތްްތަކެއް ކުރަމުންދާއިރު، މި ސިނާޢަތަށް މީހުން ބިނާކުރުމަށް މޯލްޑިވްސް ނޭޝަނަލް ޔުނިވާސިޓީއާ ގުޅިގެން މަސްވެރިކަމުގެ ކޮލެޖެއް ޤާއިމްކޮށް މަސްވެރިކަމުގެ ދާއިރާގެ ގިނަ ކޯސްތަކެއް ދަނީ ހިންގަމުންނެވެ.