ކީރިތި ޤުރްއާނަކީ اللهُ سُبْحَانَهُ وَتَعَالَى ބާވައިލެއްވި އިލާހީ މުޢުޖިޒާތެއްކަމަށް މިއަދުގެ ހުކުރު ޚުޠުބާގައި ބުނެފިއެވެ.

ޚުޠުބާގައި ބުނީ ކީރިތި ޤުރްއާނަކީ ޖިބްރީލްގެފާނު މެދުވެރިކުރައްވައި އެންމެ ފަހުގެ ނަބިއްޔާ مُحَمَّدٌ ﷺ ގެ މައްޗަށް ﷲ ތަޢާލާ ބާވައިލެއްވި މުޢުޖިޒާތެއްކަމަށެވެ.

ޚުޠުބާގައި ބުނީ ކީރިތި ޤުރްއާނުގެ ލަފްޒާއި މާނަ އައިސްފައިވަނީ اللهُ سُبْحَانَهُ وَتَعَالَىގެ ޙަޟްރަތުންކަަމަށެވެ. އަދި އެއީ ސޫރަތުލް ފާތިޙާއިން ފެށިގެން ސޫރަތުއްނާސްގެ ނިޔަލަށް ކިޔެވުން އަޅުކަމެއްކަމުގައި ލައްވައި، ﷲ ތަޢާލާ ބާވައިލައްވާފައިވާ އެކަލާނގެ ޝަރީޢަތެވެ. މި ފޮތް މުސްލިމުންނާ ހަމައަށް އައިސްފައިވަނީ ތަވާތުރުކޮށް، ކަލިމަތަކާއި އަކުރުތައް ރިވާވެފައިވާ ގޮތަށް، އެއްވެސް ބަދަލެއް ނައިސް، ސަނަދު ގުޅިގެންކަމަށް ޚުޠުބާގައި ބުންޏެވެ.

ޚުޠުބާގައި ބުނީ، ކީރިތި ޤުރްއާނަކީ ﷲގެ ކަލާމްފުޅުކަމާއި، އެ ފޮތް މުސްލިމުންނާ ހަމައަށް އައިސްފައިވާ ގޮތާއި، އަދި އެ ފޮތުގައި ކުށެއް ނެތްކަމާ މެދު ޝައްކެއް ނެތްނަމަވެސް، މި ކަންކަމުގައި ޝައްކުތަކާއި ޝުބުހަތައް އުފައްދަން ބަޔަކު މަސައްކަތްކުރާކަމަށެވެ. މި ފަދަ މަސައްކަތްތައް އެ ފޮތް ބާވައިލެއްވުނީއްސުރެ މިއަދާ ހަމައަށް ވެސް ދެމިގެންދާކަން ޚުޠުބާގައި ފާހަގަކުރިއެވެ.

އެގޮތުން، ކީރިތި ޤުރްއާނަކީ އިންސާނުންނަށް އުފެއްދޭނެ އެއްޗެއް ނޫންކަން ސާބިތުކޮށްދިނުމަށް ﷲ ތަޢާލާ ގޮންޖައްސަވާފައިވާކަން ޚުޠުބާގައި ބަޔާންކުރިއެވެ. އެގޮތުން، ކީރިތި ޤުރްއާނާ އެއްފަދަ ފޮތެއް ގެނެސްގަތުމަކީ އިންސީންނާއި ޖިންނީން ގުޅިގެން މަސައްކަތް ކުރިޔަސް ކުރެވޭނެ ކަމެއް ނޫންކަމުގައި ﷲ ތަޢާލާ ވަޙީކުރައްވާފައިވާކަން ޚުޠުބާގައި ފާހަގަކުރިއެވެ.

ޚުޠުބާގައި ބުނީ ކީރިތި ޤުރްއާނުގައި ހިމެނޭ ޢިލްމީ ހެކިތަކުގެ ތެރެއިން، މައިމީހާގެ ބަނޑުގައި ދަރިފުޅު އުފެދިގެން އަންނަ ގޮތުގެ ތަފްޞީލު ބަޔާންކޮށްދީފައިވާކަމަށެވެ. މިއީ އެ ޒަމާނުގައި އިލާހީ ވަޙީގެ ޒަރީޢާއިން ނޫން ގޮތަކަށް، އެއްވެސް މީހަކަށް އެނގޭނެ މަޢުލޫމާތެއް ނޫންކަމަށް ޚުޠުބާގައި ބުންޏެވެ.

ޚުޠުބާގައި އިތުރަށް ބުނިގޮތުގައި، އިސްލާމްދީން ނައްތާލުމަށް ކާފިރުން މަސައްކަތްކުރަމުންދާއިރު، މުސްލިމުން ދީނުގެ ކަންކަން މޮޅަށް އުނގެނި، އެފަދަ ރޭވުންތަކަށް ހޭލުންތެރިވެ ތިބެންޖެހެއެވެ. ކާފިރުން މަސައްކަތްކުރަމުން އަންނަނީ މުސްލިމުން އެ މީހުންގެ ދީނާ ދުރުކުރެވޭތޯކަމަށާއި ނަމަވެސް މުސްލިމުންގެ އަޒުމަކަށް ވާންވާނީ މަރުދުވަހަށް ދާންދެން އިސްލާމް ދީންމަތީ ސާބިތުވެ ތިބުންކަމަށް ޚުޠުބާގައި ބުންޏެވެ.

ކީރިތި ރަސޫލާ ޙަދީޘްކުރައްވައިފައި ބަސްފުޅެއް ގައިވެއެވެ. "ތިމަންކަލޭގެފާނު ތިޔަބައިމީހުންގެ ތެރެއަށް ދެއެއްޗެއް ދޫކުރައްވައި ވަޑައިގަންނަވަމެވެ. އޭގައި ހިފައިފި ހިނދަކު ހަމަހިލާ ތިޔަބައިމީހުން މަގުފުރެދިގެން ނުދާނެތެވެ. އެއީ، ﷲ ސުބުޙާނަހޫ ވަތަޢާލާގެ ފޮތާއި އެކަލާނގެ ނަބިއްޔާ مُحَمَّدُ رَسُوْلُ اللهِ صَلَّى اللهُ عَلَيْهِ وَسَلَّمَ ގެ ސުންނަތެވެ."

ޚުޠުބާގައި ވަނީ ކީރިތި ޤުރްއާނުގެ މަތިވެރިކަމާއި، އެއީ ﷲ ތަޢާލާގެ ކަލާމްފުޅުކަން އަދި އޭގެ މުޢުޖިޒާތްތެރިކަން ހާމަކޮށްދެއްވުމާއެކު، މުސްލިމުން އެ ފޮތުގައި ހިފަހައްޓައި، އޭގެ މައްޗަށް ޢަމަލުކުރުމުގެ މުހިންމުކަން ފާހަގަކޮށްފައެވެ. އަދި އިސްލާމްދީނުގެ ދުޝްމަނުންގެ ރޭވުންތަކަށް ހޭލުންތެރިވެ، ދީނުގައި ސާބިތުވެ ތިބުމަށް ޚުޠުބާގައި ނަސޭހަތްތެރިވިއެވެ.