އެމްޑީޕީން ޓެކްސީ ޑްރައިވަރުންގެ ޤާނޫނާ ޚިލާފު ޢަމަލުތައް ހިމާޔަތްކުރުމަށް މަސައްކަތްކުރާކަމަށް ބެލެވޭ ނޫސްބަޔާނެއް ނެރެފިއެވެ. މި ނޫސްބަޔާނުގައި ޓެކްސީ ޑްރައިވަރުންގެ އިހުތިޖާޖަށް ހުރަސްއަޅައި ޑްރައިވަރުން ހައްޔަރުކޮށް، އިހުތިޖާޖުގައި ބައިވެރިވި ޑްރައިވަރުންގެ ޓެކްސީތައް ހިފަހައްޓާފައިވާތީ އެކަން ކުށްވެރިކޮށްފައިވެއެވެ.
ނަމަވެސް، ޓެކްސީ ޑްރައިވަރުން ކުރި އިހުތިޖާޖަކީ ޓެކްސީ ޤާނޫނާއި އެއްގަމު ދަތުރުފަތުރުގެ ޤާނޫނާ ޚިލާފު ޢަމަލެއްކަން ފާހަގަކުރެވެއެވެ. މި މުޒާހަރާ ހިންގާފައިވަނީ ހުޅުމާލެއާއި މާލެ ގުޅުވާފައިވާ ސިނަމާލެ ބްރިޖްގައެވެ. މިކަމުގެ ސަބަބުން ބްރިޖް ބޭނުންކުރަން ބޭނުންވި އާންމު ރައްޔިތުންނަށް ބޮޑެތި ދަތިތަކާ ކުރިމަތިލާން ޖެހުނެވެ.
ފުލުހުންނަށް ޓެކްސީތައް ޓޯކުރުމުގެ ޙައްޤު ޤާނޫނީގޮތުން ލިބިގެންވެއެވެ. ފުލުހުން ސުލްޙަވެރި ގޮތުގައި މަސައްކަތްކޮށް ނަސޭހަތްތެރިވިނަމަވެސް، ޓެކްސީ ޑްރައިވަރުން ޢަމަލުކުރީ އެމީހުން ބޭނުން ގޮތަކަށެވެ. މިއީ ރައްޔިތުންގެ ދަތުރުފަތުރަށް ހުރަސްއެޅުމުގެ އިތުރުން، ޤައުމުގެ އިޤްތިޞާދަށް ނޭދެވޭ އަސަރުކުރުވާނެ ކަމެކެވެ.
ޤާނޫނުއަސާސީގައި އިހުތިޖާޖުކުރުމުގެ ޙައްޤު ލިބިދީފައިވީނަމަވެސް، އެކަން ކުރަންވާނީ ޤާނޫނުއަސާސީއާ ޚިލާފުނުވާ ގޮތުގެމަތިންނެވެ. އެމްޑީޕީން މި ނޫސްބަޔާނުގައި ޤާނޫނާއި ޚިލާފަށް ކުރެވުނު ޢަމަލުތަކެއް ހިމާޔަތްކުރަން މަސައްކަތްކޮށްފައިވާކަން ފާހަގަކުރެވެއެވެ. މިއީ ޒިންމާދާރު ސިޔާސީ ޕާޓީއަކުން ކުރަންވާނެ ކަމެއް ނޫނެވެ.
މި ނޫސްބަޔާނުގައި އެމްޑީޕީން ސަރުކާރުގެ ޓެކްސީ ޚިދުމަތް ތަޢާރަފުކުރުމާ ދެކޮޅަށް ވާހަކަދައްކާފައިވާއިރު، އެއީ ރައްޔިތުންނަށް ފައިދާހުރި ކަމެއްކަން ފާހަގަކޮށްފައެއް ނުވެއެވެ. އަދި ޓެކްސީ ޑްރައިވަރުންގެ ޤާނޫނާ ޚިލާފު ޢަމަލުތަކަށް ތާއީދުކޮށް، އެކަން ހުއްޓުވުމަށް ފުލުހުން ކުރި މަސައްކަތް ކުށްވެރިކޮށްފައިވެއެވެ.
ސަރުކާރުން ޓެކްސީގެ ޚިދުމަތް ތަޢާރަފުކުރުމަކީ ރައްޔިތުންނަށް ލުއިފަސޭހަ، އަގުހެޔޮ ދަތުރުފަތުރުގެ ނިޒާމެއް ޤާއިމުކުރުމަށް އެޅޭ މުހިންމު ފިޔަވަޅެކެވެ. ނަމަވެސް އެމްޑީޕީން މިކަމާ ދެކޮޅުހަދައި، ޤާނޫނާއި ޚިލާފަށް މަގުމަތި ބަންދުކުރި ފަރާތްތަކަށް ތާއީދުކުރީއެވެ. ނުސީދާ ގޮތެއްގައި އެމްޑީޕީން ދޭން ބޭނުންވާ މެސެޖަކީ ޓެކްސީ ޑުރައިވަރުން ވެސް އަދި އެހެން މީހުން ވެސް ޤާނޫނަށް ބޯ ނުލެނބުމަށެވެ. އެ ނޫން ދެން ކޮން އެއްޗެއް ތޯއެވެ؟ ޓްރެފިކް ވަޔަލޭޝަނަކީ އަދަބު ކަނޑައެޅިފައިވާ ކުށެކެވެ. ނަމަވެސް އެޑީޕީން މިބުނަނީ ކުށް ކުރިޔަސް އަދަބު ނުދީ ދޫކޮށްލާށެވެ.
