ރައީސް ޑރ. މުޙައްމަދު މުޢިއްޒުގެ ވަޢުދުފުޅާއި އެއްގޮތަށް މަސްވެރިންނަށް 48 ގަޑިއިރުގެ ތެރޭގައި ފައިސާޖަމާކުރަން ފަށައިފިއެވެ. މިފްކޯއިން މަޢުލޫމާތު ދިންގޮތުގައި މިމަހުގެ 8 ވަނަ ދުވަހު މިފްކޯއަށް މަސްވެރިން ކިރުވާފައިވާ 172 މެޓްރިކް ޓަނަށްވާ 2،045،823 ރުފިޔާ މިއަދު ވަނީ މަސްވެރިންނަށް ޖަމާކޮށްފައެވެ.

މިފްކޯއިން މަސްވެރިންނަށް 48 ގަޑިއިރުގެ ތެރޭގައި ފައިސާޖަމާކުރަން ފެށުމާއި ގުޅިގެން ފިޝަރީޒް މިނިސްޓަރ އަހުމަދު ޝިޔާމް ވިދާޅުވީ މިއީ ތާރީޚީ ދުވަހެއް ކަމަށެވެ. މިއަދު ފާހަގަކުރަމުންދާ 44 ވަނަ މަސްވެރިންގެ ދުވަހާއި ގުޅިގެން ސޯޝަލް މީޑިއާ ޕްލެޓްފޯމް އެކްސްގައި ޝިޔާމް ކުރެއްވި ޕޯސްޓެއްގައި ވިދާޅުވީ މަސްވެރިންގެ އަދި މަސްވެރި ސިނާޢަތުގައި ހުރި ޒަމާންވީ ބޮޑެތި ގޮންޖެހުންތަކަށް ރައީސުލްޖުމްހޫރިއްޔާ ގެންދަވަނީ ޖުމްލަ ހައްލުތަކެއް ހޯއްދަވައި ދެއްވަމުންކަަމަށެވެ.

ޑިސެމްބަރ 8 ވަނަ ދުވަހު މަސްވެެރިން މިފްކޯއަށް ކިރި މަހަށްވާ 2،045،823.37ރ މިއަދު މިފްކޯއިން މަސްވެރިންނަށް ޖަމާކޮށްފި. މިއީ އިއްޔެ މަސްވެރިންގެ ޕޭމަންޓުގެ ބެކްލޮގު ސާފުކުރިއިރު ޑިސެމްބަރު 7 ވަނަ ދުވަހު ބޭނިމަހުގެ ޕޭމަންޓު ހިމެނޭގޮތަށް ދެއްކި ޕޭމަންޓުގެ ފަހުން ފުރަތަމަ ފަހަރަށް… pic.twitter.com/2MzZXWeTXR

މަސްވެރިން ކިރުވާ މަހަށް 48 ގަޑިއިރު ތެރޭގައި ފައިސާ ދިނުމަކީ ރައީސް މުޢިއްޒުގެ ރިޔާސީ ވަޢުދުފުޅެކެވެ. ވެރިކަމާއި ހަވާލުވުމަށްފަހު ރައީސް ވަނީ މި ވަޢުދު ފުއްދެވުމަށްޓަކައި މިފްކޯގެ ހިންގުން ހަރުދަނާ ކުރައްވައި، މަސްވެރިންނަށް ނުދެވި ހުރި ފައިސާ ވީއެންމެ އަވަހަކަށް ޖަމާކުރުމަށް ބޮޑު އިސްކަމެއް ދެއްވާފައެވެ.

މި އައު އުސޫލުގެ ދަށުން މަސްވެރިންނަށް ލިބޭ ފައިސާ އަވަސްވުމުގެ އިތުރުން، މަސްވެރިކަމުގެ ދާއިރާއަށް އިތުރު ކުރިއެރުންތަކެއް ލިބޭނެ ކަމަގައި ރައީސް ވަނީ އިއްޔެ ކ. ގާފަރަށް ކުރި ރަސްމީ ދަތުރުފުޅުގައި އެ ޔަޤީންކަން ދެއްވާފައެވެ.