މޫސުމީ ބަދަލުތަކާއި ގުޅޭ ސިޔާސަތުތައް އެކުލަވާލުމަށް ސައްހަ ޑޭޓާ މުހިންމުކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއިބެހޭ ވަޒީރު ޠާރިޤު އިބްރާހިމް ވިދާޅުވެއްޖެއެވެ. ވަޒީރު މިހެން ވިދާޅުވީ ރިޔާޟުގައި ބޭއްވުނު ޔޫއެންސީސީޑީ ކޮޕް 16 ގައި ވާހަކަފުޅު ދައްކަވަމުންނެވެ.
ވަޒީރު ޠާރިޤު އިބްރާހިމް ވިދާޅުވި ގޮތުގައި، 2024 ވަނަ އަހަރުގެ ޖަނަވަރީ މަހު ރާއްޖެއިން ރަސްމީކޮށް ގްރޫޕް އޮން އާރތް އޮބްޒަރވޭޝަންސްއާއި ގުޅި، ތިމާވެށި ރައްކާތެރިކުރުމުގެ ޤާބިލުކަން އިތުރުކުރުމަށް މަސައްކަތްތަކެއް ކުރަމުންދެއެވެ. މި ގުޅުމުގެ ސަބަބުން، ތިމާވެށި މޮނިޓަރކުރުމުގެ ޤާބިލުކަން އިތުރުވެ، ގްލޯބަލް ނެޓްވޯކެއްގެ އެހީގައި އައު ހައްލުތައް ހޯދުމަށް މަގުފަހިވާނެ ކަމަށް ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވި ގޮތުގައި، މި ޕާޓްނަރޝިޕްގެ ސަބަބުން ޒަމާނީ ޓެކްނޮލޮޖީތަކާއެކު ޤައުމަށް މުހިންމު އިކޯސިސްޓަމްތައް ރައްކާތެރިކޮށް އަލުން އާލާކުރެވޭނެއެވެ. އަދި ތިމާވެށި ރައްކާތެރިކުރުމާއި މޫސުމަށް އަންނަ ބަދަލުތަކާ ގުޅޭ ސިޔާސަތުޭ ސިޔާސަތުތައް އެކުލަވާލުމަށް އިތުބާރުހުރި އަދި ފެންވަރު ރަނގަޅު ޑޭޓާ މުހިންމުކަން ފާހަގަކުރެއްވިއެވެ.
Advertisement
މީގެއިތުރުން، "އާރތު އިންޓެލިޖެންސް" އާއި އެހެނިހެން އައު ގޮތްތައް ބޭނުންކޮށްގެން ޑޭޓާ އެއްކުރުމުގެ ޤާބިލުކަން އިތުރުކުރުމަށް ރާއްޖެއިން މަސައްކަތް ކުރަމުންދާކަން ވަޒީރު ފާހަގަ ކުރެއްވިއެވެ. އަދި މި މަސައްކަތްތައް ކުރިއަށް ގެންދިއުމަށް ބޭރުގެ ފަރާތްތަކުގެ އެހީތެރިކަމަށް މަރުޙަބާ ކިޔާ ކަމަށް ވެސް ވިދާޅުވިއެވެ.
މި ބައްދަލުވުމުގައި ދިވެހިރާއްޖެއިން ބައިވެރިވެ، ތިމާވެށި ރައްކާތެރިކުރުމާއި މޫސުމަށް އަންނަ ބަދަލުތަކާ ގުޅޭ ގޮތުން ރާއްޖެއިން ކުރަމުންދާ މަސައްކަތްތަކުގެ މަޢުލޫމާތު ހިއްސާކޮށް، މި ދާއިރާގައި ބައިނަލްއަޤްވާމީ އެހީތެރިކަން ހޯދުމަށް މަސައްކަތްކޮށްފައިވެއެވެ.
