މަސްވެރިންނަށް ފައިސާ ދިނުމުގައި އިސްކަންދިނުމަކީ މި ސަރުކާރުގެ އަމާޒެއްކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވަޢުދު ފުއްދުމާއި ގުޅިގެން ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ވަޒީރު މިވާހަކަ ވިދާޅުވިއެވެ.

ވަޒީރު ޝިޔާމް ވިދާޅުވީ، މީގެކުރިން މިފްކޯއަށް ލިބޭ އާމްދަނީން ޚަރަދުކުރާއިރު މަސްވެރިން އަންނަނީ ލިސްޓުގެ އެންމެ ފަހަތަށް ކަމަށެވެ. ނަމަވެސް މިހާރު މަސްވެރިން އަންނަނީ އެ ލިސްޓުގެ އެންމެ ކުރިއަށްކަމަށް ވަޒީރު ފާހަގަކުރެއްވިއެވެ. "ރައީސުލްޖުމްހޫރިއްޔާ މި ކުރެއްވި ކަމަކީ މަސްވެރިން ބާނާ މަހުން ލިބޭ އާމްދަނީ ނޫނިއްޔާ މިފްކޯގެ އާމްދަނީން އެންމެ އިސްކަން ދޭންޖެހެނީ މަސްވެރިންނަށްކަން. އެއަށްފަހުކަން މަސްވެރިކަން ކޮށްގެން ލިބޭ އާމްދަނީއަކުން އެހެން ކަންކަން އަންނަ ގޮތައް އެ ހަމަޖެއްސެވީ," ވަޒީރު ވިދާޅުވިއެވެ.

މި ސަރުކާރު ވެރިކަމާއި ހަވާލުވެވަޑައިގެންނެވިއިރު މަސްވެރިންނަށް 250 މިލިއަނަށްވުރެ ގިނަ ރުފިޔާ ދޭންޖެހިފައި އޮތްކަމަށާއި، ނަމަވެސް ކުޑަދުވަސްކޮޅެއްގެ ތެރޭގައި އެ ފައިސާ ދީ ޚަލާސްކުރިކަން ވަޒީރު ފާހަގަ ކުރެއްވިއެވެ. މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ ރައީސުލްޖުމްހޫރިއްޔާގެ ރިޔާސީ ވައުދެއްކަމަށާއި، އެ ވަޢުދު ފުއްދެވުމަށް ކަމާގުޅުންހުރި މުއައްސަސާތަކާއި ވަރަށް ގާތުން މަޝްވަރާކުރައްވައި މަސައްކަތް ކުރައްވާ ކަމަށްވެސް ވަޒީރު ވިދާޅުވިއެވެ.

މީގެ އިތުރުން، މިފްކޯ ހަރުދަނާކުރެއްވުމަށް ސަރުކާރުން ގިނަ މަސައްކަތްތަކެއް ކުރައްވާކަމަށް ވަޒީރު ވިދާޅުވިއެވެ. އެގޮތުން މިފްކޯ ހިންގެވުމަށް ފުރަތަމަ ފަހަރަށް ބޭރުގެ ސީއީއޯއެއް އައްޔަން ކުރައްވާފައިވާކަން ފާހަގަކުރެއްވިއެވެ. މިއީ ނުފޫޒުން އެއްކިބާވެ މިފްކޯގެ ހިންގުން ހަރުދަނާކުރެއްވުމަށް ކުރެއްވި މަސައްކަތެއްކަމަށް ސަރުކާރުން ވިދާޅުވެއެވެ.

ވަޒީރު ޝިޔާމް ނިންމާލަމުން ވިދާޅުވީ، މަސްވެރިންނަށް ލިބެންޖެހޭ ފައިސާ ނުލިބުމަކީ މަސްވެރިންގެ އެންމެ ބޮޑު ކަންބޮޑުވުން ކަމަށާއި، މިހާރު އެކަން ޙައްލުކުރެވި، މަސްވެރިންނަށް އިސްކަންދީގެން ކުރިއަށްދާކަމަށެވެ. "މީގެކުރިން މަސްވެރިން އަންނަނީ ފަހަތަށް އެހެންނަމަވެސް މިހާރު މިއައީ އެންމެ ކުރިއަށް. އެއީ އެންމެ މުހިންމު ކަމަކީ،" ވަޒީރު ވިދާޅުވިއެވެ.