މާލެ އަތޮޅުގެ ހުރިހާ ރަށެއްގެ އުފެއްދުންތަކާއި މަސައްކަތްތެރިކަން އެއްތަނަކުން ދެއްކުމަށްޓަކައި "ކ. އެކްސްޕޯ" ގެ ނަމުގައި ޚާއްޞަ އެކްސްޕޯއެއް ބޭއްވުމަށް މާލެ އަތޮޅު ކައުންސިލުން ނިންމައިފި ކަމަށް އެ ކައުންސިލުން ބުނެފިއެވެ. މި އެކްސްޕޯ އޮންނާނީ އަންނަ އަހަރުގެ ފެބްރުއަރީ މަހުގެ 6 އިން 8 އަށް ދަރުބާރުގޭގައެވެ.
މާލެ އަތޮޅު ކައުންސިލްގެ ރައީސް އަޙްމަދު އަނީސް ޕީއެސްއެމްއަށް ދިން އިންޓަވިއުއެއްގައި ވިދާޅުވީ މި އެކްސްޕޯގައި މާލެ އަތޮޅުގެ ކޮންމެ ރަށަކަށް ޚާއްޞަ ސްޓޯލެއް ހުންނާނެ ކަމަށެވެ. އެ ސްޓޯލްތަކުން އެ ރަށްރަށުން އުފައްދާ ކާބޯތަކެއްޗާއި ތަފާތު ފަންނުވެރި އުފެއްދުންތައް ގަނެވެން ހުންނާނެއެވެ. މީގެ އިތުރުން އެ ރަށްރަށުގައި ހުރި ފަތުރުވެރިކަމުގެ ފުރުޞަތު ތަކާއި ގެސްޓްހައުސްތަކުގެ މަޢުލޫމާ ތުވެސް މި އެކްސްޕޯއިން ލިބޭނެއެވެ.
އެކްސްޕޯ ބާއްވަނީ ރަމަޟާން މަހާއި ދިމާކޮށް ކަމަށްވުމުން އެ މަހާއި ގުޅުންހުރި ހަވާދުފަދަ ބާވަތްތައް ވެސް އެކްސްޕޯގައި ހުންނަ ސްޓޯލްތަކުން ގަނެވެން ހުންނާނެ ކަމަށް އަނީސް ވިދާޅުވިއެވެ. މި އެކްސްޕޯ ހިންގައިދޭން ބޭނުންވާ ފަރާތްތަކަށް ބީލަން ހުށައެޅުމުގެ ފުރުޞަތު މާލެ އަތޮޅު ކައުންސިލުން މިހާރު ވަނީ ހުޅުވާލާފައެވެ.
