މަސްވެރިންގެ ދުވަހާއި ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިވެހިރާއްޖޭގެ ހުރިހާ މަސްވެރިންނަށް އުފާވެރި ޚަބަރުތަކެއް ދެއްވައިފިއެވެ. ރައީސް ޑރ. މުޢިއްޒު ވިދާޅުވީ މަސްވެރިންގެ ހިތްވަރާއި މަސައްކަތުގެ އަގު ވަޒަންކުރުމަކީ ޤައުމީ ވާޖިބެއް ކަމަށެވެ. އެގޮތުން އިއްޔެއިން ފެށިގެން ރައީސްގެ ވަޢުދުފުޅާއި އެއްގޮތަށް، މަސްކިރުވާތާ 48 ގަޑިއިރު ތެރޭގައި މަސްވެރިންނަށް ފައިސާ ލިބޭނެ އިންތިޒާމު މިހާރު ވަނީ ހަމަޖެހިފައެވެ. އަދި ރާއްޖޭގެ ހަތަރު ސަރަޙައްދެއްގައި އެސްޓީއޯ ރޭޓުގައި މަސްވެރިންނަށް ތެޔޮ ލިބޭނެ އިންތިޒާމުވެސް ސަރުކާރުން ވަނީ ހަމަޖައްސާފައެވެ.
— Dr Mohamed Muizzu (@MMuizzu)
Advertisement
މީގެ އިތުރުން، މަސްވެރިކަމުގެ ސިނާޢަތުގައި ސަރުކާރުގެ ކޮންޓްރޯލް ދޫކޮށްލައްވައި، ބާރުވެރިކަން މަސްވެރިންނަށް ދެއްވާނެކަމަށް ރައީސް ވަނީ އިޢުލާންކުރައްވާފައެވެ. މިގޮތުން، ރާއްޖޭގެ އެއްވެސް އަތޮޅެއްގެ އެއްވެސް ކައުންސިލަކުން އަމިއްލަޔަށް މަސްވެރިންނާއި ގުޅިގެން އައިސް ޕްލާންޓް ހިންގަން ބޭނުންވާނަމަ އެ ފުރުސަތުތައް ވެސް ދެއްވާނެ ކަމަށްވެސް ރައީސް ވަނީ ވިދާޅުވެފައެވެ.
މީގެއިތުރުން، މިހަފްތާގައި ގެޒެޓްކުރާ މަސްވެރިންގެ ދަފްތަރާއި އެކު ސަރުކާރުގެ މައި ކުންފުނި ކަމަށްވާ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)އިން ވިއްކާ މުދާތައް ވެސް ކްރެޑިޓް ސްކީމްގެ ދަށުން ލިބުމުގެ ފުރުސަތު މަސްވެރިންނަށް އޮންނާނެއެވެ. މީގެ އިތުރުން، މަސްވެރިޔަކަށް ވީތީވެ ބޭންކް އޮފް މޯލްޑިވްސްގެ ލޯނުތައް ވެސް ލިބޭނެ ކަމުގެ ޔަޤީންކަން ވަނީ ދެއްވާފައެވެ. މި ލޯނުތައް އިތުރަށް ފުޅާ ކުރުމަށްޓަކައި އިސްލާމިކް ބޭންކާއި ވެސް މަޝްވަރާ ކޮށް އެ ބޭންކުގެ ލޯނު ސްކީމުގެ ފުރުޞަތު ވެސް މަސްވެރިންނަށް ހުޅުވޭނެ ގޮތް ހެދުމަށް ސަރުކާރުން މަސައްކަތް ކުރާނެ ކަމަށައި އެކަމުގެ ޔަޤީންކަން ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދެއްވާފައެވެ.
މަސްވެރިކަމުގެ ދާއިރާ އިތުރަށް ކުރިއަރުވައި، މަސްވެރިންގެ ދިރިއުޅުމުގެ ފެންވަރު މަތިކުރުމަށްޓަކައި ސަރުކާރުން ލޯނުތައް ހުޅުވައިލާނީ މިހަފްތާގައި މަސްބެރިންގެ ދަފްތަރު ގެޒެޓު ކުރުމަށްފަހުގައެވެ.
ސަރުކާރުން މި ގެންނަވާ ބަދަލުތަކަކީ މަސްވެރިންގެ ދިގު މުއްދަތުގެ ކަންބޮޑުވުންތަކަށް ޙައްލު ހޯދައިދިނުމަށް އެޅޭ މުހިންމު ފިޔަވަޅުތަކެއް ކަމުގައި މަސްވެރިން ދަނީ ބުނަމުންނެވެ.
