ކުޑަކުދިން ބޭނުންކޮށްގެން މަސްތުވާތަކެތީގެ ވިޔަފާރިކޮށް، މަސްތުވާތަކެއްޗާއިބެހޭ ގާނޫނުގައި ބަޔާންކޮށްފައިވާ އެއްވެސް އަމަލެއް ކުރުވާނަމަ އެކަން ވަކި ބާވަތެއްގެ ކުށެއްގެ ގޮތުގައި ގާނޫނުގައި ކަނޑައެޅިފައި އޮންނަން ޖެހޭ ކަމަށް މަނަދޫ ދާއިރާގެ މެންބަރު ހުސްނީ މުބާރިކް ވިދާޅުވެއްޖެއެވެ.

މެންބަރު ހުސްނީ މިހެން ވިދާޅުވީ މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި މަސްތުވާތަކެއްޗާއިބެހޭ ގާނޫނަށް މިހާރު ހުށަހަޅާފައިވާ އިސްލާހަށް ބަހުސް ކުރައްވަމުންނެވެ.

ޖަލްސާގައި ވާހަކަ ދައްކަވަމުން މެންބަރު ވިދާޅުވީ މިއަދާއި ހަމައަށް މި ގާނޫނަށް ދެ އިސްލާހެއް ގެނެވިފައި ވީނަމަވެސް، ގާނޫނުގައި އޮތް ބާގަނޑެއްގެ ސަބަބުން މަސްތުވާތަކެއްޗާއި ދެކޮޅަށް ކުރަމުންދާ މަސައްކަތްތަކަށް ހުރަސްތަކަކާއި ކުރިމަތި ވަމުންދާ ކަމަށެވެ.

ހުސްނީ ވިދާޅުވީ ރާއްޖޭގައި މަސްތުވާތަކެއްޗާއި ދެކޮޅަށް އެންމެ ބޮޑު ހުރަހަކަށް ވެފައިވަނީ ކުޑަކުދިން ބޭނުން ކޮށްގެން މަސްތުވާތަކެތީގެ ވިޔަފާރި ކުރުން ކަމަށެވެ. ކުށުގެ ޒިންމާ އުފުލަން ނުޖެހޭ ކުޑަކުދިން އެކަމުގެ ތެރެއަށް ވަދެ، އެ ކުދިން ހަލާކު ކުރެވެމުން ދާކަން ފާހަގަ ކުރައްވައި މެންބަރު ވަނީ އެ ބިލުގައި ބަޔާން ކުރާ ކުށެއް ކުރުމުގައި ކުޑަކުދިން ބޭނުން ކުރާނަމަ ވަކި ބާވާތެއްގެ ކުށެއްގެ ގޮތުގައި ގާނޫނުގައި ކަނޑައެޅުމަށް އެދިވަޑައިގެންފައެވެ.

ގާނޫނަށް މިހާރު ހުށަހެޅިފައިވާ އިސްލާހުތަކަކީ އެ ހުރަސްތައް ނައްތާލުމަށް މަގުފަހިވެގެންދާނެ ކަމެއް ކަމަށް އޭނާ ވިދާޅުވިއެވެ. އެގޮތުން، ފަސޭހައިން ދައުވާ ކުރެވޭނެހެން އަލަށް ބޭނުންކުރަމުންދާ މަސްތުވާތަކެތީގެ ބާވަތްތައް ޖަދުވަލުތަކުގައި ހިމަނާފައިވާ ކަމަށާއި، މަސްތުވާތަކެތި އުފެއްދުމަށް ބޭނުންކުރެވިދާނެ އާލާތްތައް ވެސް ވަކި ޖަދުވަލެއްގައި ހިމަނާފައިވާކަން އޭނާ ފާހަގަ ކުރެއްވިއެވެ.

މީގެއިތުރުން، ނެޝަނަލް ޑްރަގް ކައުންސިލުން ދޭ ލަފާގެ މަތީން ރައީސުލްޖުމްހޫރިއްޔާގެ ގަރާރަކުން އެއީ މަސްތުވާ އެއްޗެއްގެ ގޮތުގައި ހިމަނާ އެކަން މަޖިލީހަށް ހުށަހަޅާ ގޮތަށް ބިލުގައި ހިމަނާފައިވާކަން ވެސް މެންބަރު ފާހަގަކުރެއްވިއެވެ.

މެންބަރު ވިދާޅުވީ ބިލު ފާސްކުރެވިގެންދާއިރު، ކޮމިޓީ މަރުހަލާގައި އެ ކަންކަމަށް ރިއާޔަތްކޮށް މިހާރު ކުރިމަތިވެފައިވާ ގޮންޖެހުންތަކަށް ހައްލު ލިބޭފަދަ ގޮތަކަށް މި ގާނޫނު ބައްޓަން ކުރެވިގެންދާނެ ކަމަށް ގަބޫލު ކުރައްވާ ކަމުގައެވެ.

"އަޅުގަނޑު ގަބޫލުކުރާ ގޮތުގައި ކޮންމެހެން ރައްޔިތުންގެ މަޖިލީހަށް އެ ހުށަހަޅަން ޖެހޭ ހާލަތަކަށް ނާދޭ. މަޖިލީހަށް ހުށަނޭޅި ނަމަވެސް ކައުންސިލުން ދޭ ލަފާގެ މަތިން ރައީސްގެ ގަރާރަކުން އެހެން އޮތުމުން އަވަސް ހައްލެއް ލިބިގެންދާނެ ކަމަށް އަޅުގަނޑު ގަބޫލު ކުރަނީ" ހުސްނީ މުބާރަކް ވިދާޅުވިއެވެ.