މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ސީއީއޯގެ މަޤާމަށް ސުވިޒަރލޭންޑުގެ ބޭފުޅެއް ކަމަށްވާ ޑރ. ވިތާލީ ލުބިމޮފް ޢައްޔަންކުރައްވައިފިއެވެ. މިއީ މިފްކޯގެ ތާރީޚުގައި އެ ކުންފުނީގެ ސީއީއޯއަކަށް ބޭރުގެ ބޭފުޅެއް ޢައްޔަންކުރެވުނު ފުރަތަމަ ފަހަރެވެ.

ވިޔަފާރީގެ ދާއިރާގައި 20 އަހަރުގެ ތަޖުރިބާ ލިބިވަޑައިގެންފައިވާ ޑރ. ވިތާލީ، މާދަމާ ރަސްމީކޮށް މަސައްކަތާ ޙަވާލުވެވަޑައިގަންނަވާނެ ކަމަށް މިފްކޯއިން މަޢުލޫމާތު ދެއްވާފައިވެއެވެ.

މިފްކޯގެ ކުރީގެ ސީއީއޯ އަޙްމަދު ޝަމާހު ރަޝީދު އެ މަޤާމުން މެއި މަހުގެ ތެރޭގައި ވަކިކުރެއްވުމާ ގުޅިގެން، މިފްކޯއަށް އައު ސީއީއޯއެއް ހޯދުމަށް ދެ ފަހަރެއްގެ މަތިން އިޢުލާންކުރެވުނެވެ. އެހެންނަމަވެސް، ސަރުކާރުގެ ކުންފުނިތަކުގެ ބެލެނިވެރި ފަރާތްކަމުގައިވާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަދި ރަސްމީކޮށް ޑރ. ވިތާލީ މި މަޤާމަށް ޢައްޔަންކުރެއްވިކަން އިޢުލާންކުރައްވާފައެއް ނުވެއެވެ.

ކުރިން ކުރެވުނު އިޢުލާނުގައި ބަޔާންކޮށްފައިވާ ގޮތުން، ސީއީއޯގެ މަޤާމަށް ކުރިމަތިލާ ފަރާތްތަކަކީ މަދުވެގެން 8 އަހަރު މަސްވެރިކަމާ ގުޅުންހުރި ކުންފުންޏެއް ހިންގުމުގެ ތަޖުރިބާ ހުރި، އަދި މަދުވެގެން 4 އަހަރު މަސްވެރިކަމާ ގުޅުންހުރި ބައިނަލްއަޤްވާމީ ކުންފުންޏެއް ހިންގުމުގެ ތަޖުރިބާ ލިބިފައިވާ ފަރާތަކަށް ވާންޖެހެއެވެ.

1993 ވަނަ އަހަރު އުފައްދާފައިވާ މިފްކޯއަކީ ރާއްޖޭގެ މަސްވެރިކަމުގެ ސިނާޢަތް ކުރިއެރުވުމަށް މަސައްކަތްކުރާ ކުންފުންޏެކެވެ. ނަމަވެސް، މިހާތަނަށް އައިއިރު މިފްކޯއަކީ ދައުލަތަށް މާލީގޮތުން ބުރަ ބޮޑުވެފައިވާ ކުންފުންޏެކެވެ. އެހެންކަމުން، މިފްކޯގެ ހިންގުން ހަރުދަނާކުރުމަށް ސަރުކާރުން ގެންނަ އެންމެ މުހިންމު އެއް ބަދަލަކީ ހިންގުމުގެ ދާއިރާގެ ތަޖުރިބާ ލިބިފައިވާ ބޭރުގެ ބޭފުޅެއް ކުންފުންޏަށް ގެނައުމެވެ.