ރައްޔިތުންގެ ޙައްޤުގައި ޤާނޫނުއަސާސީއަށް ސަރުކާރުން ގެންނެވި އިޞްލާޙުތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަފްޞީލްކޮށްދެއްވައިފިއެވެ. އއ. މަތިވެރީ ރައްޔިތުންނާއި ބައްދަލުކުރެއްވުމަށްފަހު ދެއްކެވި ވާހަކަފުޅުގައި ރައީސް މުޢިއްޒު ވަނީ ޤާނޫނުއަސާސީއަށް އެންމެފަހުން ގެންނެވި އިޞްލާޙުތަކުގެ ބޭނުމާއި، އެކަންކަމުން ރައްޔިތުންނަށް ލިބިގެންދާނެ ފައިދާތައް ތަފްޞީލީ ގޮތެއްގައި ބަޔާންކޮށްދެއްވާފައެވެ.
ރައީސް މުއިއްޒު ވިދާޅުވިގޮތުގައި ޤާނޫނުއަސާސީއަށް ގެނެވުނީ މައިގަނޑު 5 އިޞްލާހެކެވެ. އޭގެ ތެރޭގައި ދިވެހިރާއްޖޭގެ ސަރަޙައްދާއި، ބޭރުގެ އެއްވެސް ފަރާތަކަށް ރާއްޖޭގެ ސަރަޙައްދުތައް މިލްކޮށްދިނުމާއި އަސްކަރީ ބޭނުމަށް ދިނުމާއި، ރައްޔިތުންގެ މަޖިލީހުގެ މެމްބަރުންގެ ޝަރުޠުތަކާއި ޤާނޫނުއަސާސީއަށް ބަދަލު ގެނައުމުގެ ކުރިން ރައްޔިތުންގެ ޚިޔާލު ހޯދުމާއި އަދި ރައީސުލްޖުމްހޫރިއްޔާގެ މަސްއޫލިއްޔަތުތަކާއި ގުޅޭ އިޞްލާޙްތައް ހިމެނެއެވެ.
ރައީސް މުޢިއްޒު ވިދާޅުވީ މި 5 އިޞްލާޙަކީވެސް ރައްޔިތުންގެ އަތަށް ބާރުތައް ލިބޭގޮތަށް ގެނެސްފައިވާ އިސްލާހުތަކެއްކަމަށެވެ. އެގޮތުން، މިހާރު ރާއްޖޭގެ ސަރަޙައްދަށް ބަދަލު ގެނެވޭނީ ރައްޔިތުންގެ ވޯޓަކާއި ރައްޔިތުންގެ މަޖިލީހުގެ ވޯޓަކުންކަމަށާއި، އަސްކަރީ ބޭނުމަކަށް ބޭރު ސިފައިންނަށް ރާއްޖޭގައި އޮޕަރޭޓް ކުރެވޭނީ މަޖިލީހުގެ އަޢުލަބިއްޔަތުން ފާސްކޮށްގެންކަމަށް ރައީސް ވިދާޅުވިއެވެ.
ރައްޔިތުންގެ މަޖިލީހުގެ މެންބަރުންގެ ޝަރުޠުތަކާއި ގުޅޭ މާއްދާއަށް ގެންނެވި އިޞްލާޙާއި ގުޅޭގޮތުން ރައީސް ވިދާޅުވީ އެއީވެސް ރައްޔިތުންގެ އަތްމައްޗަށް ބާރު އަނބުރާ ދިނުމަށް ގެންނެވި އިޞްލާޙެއް ކަމަށެވެ. އަދި ރައްޔިތުންގެ ފެންނަ ނުފެންނަ ވޯޓު ނެގުމާބެހޭގޮތުން ގެނެވުނު އިޞްލާޙާއެކު، ރައްޔިތުންގެ ވޯޓެއް ނުނަގަން މަޖިލީހުން ނިންމާނަމަ، އެކަމުގައިވެސް ރައްޔިތުންގެ ވޯޓެއް ބޭނުންވާނެކަން ރައީސް ފާހަގަކުރެއްވިއެވެ.
ރައީސް މުޢިއްޒު ވިދާޅުވީ މި އިޞްލާޙުތަކަކީ ޤައުމަށް ހަމަޖެހުމާއި ތަރައްޤީ ގެނެސް، ޤައުމުގެ މިނިވަންކަމާއި ސިޔާދަތު ރައްކާތެރިކުރުމަށްޓަކައި ގެންނެވި އިޞްލާޙުތަކެއްކަމަށެވެ. އަދި އެމަނިކުފާނު އަބަދުވެސް މަސައްކަތް ކުރައްވާނީ ރައްޔިތުންގެ ފަޅީގައި ހުންނަވައިގެން ރައްޔިތުންގެ ކުރިމަގާއި ޤައުމުގެ ތަރައްޤީއަށް ކުރަންޖެހޭކަންކަން ކުރުމަށް ކަމަށް ވެސް ރައީސް މުއިއްޒު ވިދާޅުވިއެވެ.
