ރައްޔިތުންނަށް ލިބެމުންދާ އާސަންދައާއި، ޕެންޝަންގެ ސްކީމް ނުވަތަ ސަބްސިޑީއަށް ބަދަލުތަކެއް ގެނެސް އެ ޚިދުމަތްތައް ކަނޑާލުމަށް އެއްވެސް މަސައްކަތެއް ކުރަމުން ނުދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ، ރައީސް މިހެން ވިދާޅުވީ، އއ. އަތޮޅަށް ކުރައްވަމުންދާ ދަތުރުފުޅުގެ ތެރެއިން މަތިވެރީގައި ބޭއްވެވި ޖަލްސާގައެވެ.
ރައީސް ވިދާޅުވީ، ސަރުކާރުގެ އަމާޒަކީ މިހާރަށް ވުރެ ރަނގަޅު ޚިދުމަތެއް ރައްޔިތުންނަށް ދިނުން ކަމަށެވެ. އަދި ސަރުކާރުގެ ސިޔާސަތުތަކާއި ގުޅުވައި ބައެއް ފަރާތްތަކުން ފަތުރަމުން ދަނީ ޙަޤީޤަތެއް ނެތް ވާހަކަތަކެއް ކަމަށް ވެސް ރައީސް ވިދާޅުވިއެވެ.
"އެއްގޮތަކަށް ވެސް އާންމު ރައްޔިތުންގެ އާސަންދައަކުން އެއްވެސް އެއްޗެއް އުނި ނުވާނެ... އެހެންވީމަ މިގޮތަށް އާސަންދަ ރިފޯމު މި ކުރަނީ... އޭގެ ބަދަލުގައި ނާޖާއިޒު ގޮތުގައި ކުރަމުންދާ ޚަރަދުތައް ހުއްޓާލައި އުނިކުރަމުން ދާނީ," ރައީސް ވިދާޅުވިއެވެ.
ރައީސް ވިދާޅުވީ، ދައުލަތުގެ ބޭކާރު ބޮޑެތި ޚަރަދުތައް ހިނގާ ބާބުތައް ފޫބައްދައި، ނާޖާއިޒު ގޮތުގައި ކުރަމުންދާ ޚަރަދުތައް ވެސް އުނި ކުރައްވާނެ ކަމަށެވެ. މިސާލެއްގެ ގޮތުން، އާސަންދައިގެ ދަށުން އަގުބޮޑުކޮށް ބޭސް ވިއްކަމުންދާ މައްސަލަ ރައީސް ފާހަގަކުރެއްވިއެވެ.
ސަރުކާރުން ކުރަމުންދާ ރިފޯމް މަސައްކަތުގެ ސަބަބުން، ރައްޔިތުން ކުރަން ޖެހޭ އެއްވެސް ހޭދައެއް ނެތްކަމަށާއި، އަދި ދޭ ޚިދުމަތްތައް ކުޑަވެގެން ވެސް ނުދާނެކަމަށް ރައީސް ވިދާޅުވިއެވެ. ބޭހުގެ އަގު ދައްކަން ޖެހި ނުވަތަ އާސަންދައިގެ ދަށުން ލިބެމުން އައި ބޭސްތަކަށް ވެސް އެއްވެސް ބަދަލެއް ގެނެވިފައި ނުވާކަމަށް ރައީސް ވިދާޅުވިއެވެ.
އަންނަ އަހަރަށް ލަފާކޮށް ފާސްކުރި 56.6 ބިލިއަން ރުފިޔާގެ ބަޖެޓުގައި ޖުމްލަކޮށް ފާހަގަކޮށްފައި ވަނީ، ރާއްޖޭގެ މާލީ ޙާލަތު ހުރި ގޮތުން އަރައިގަނެ ޤައުމުގެ ތަރައްޤީއަށް މިވަގުތު ކުރިޔަށް ގެންދަން ހުރި މަޝްރޫޢުތަކެވެ. އަދި ބަޖެޓުގައި ހިމަނާފައި ހުރި ރިފޯމްތަކުގެ ތެރޭގައި އާސަންދައާއި، ސަބްސިޑީ އަދި ޕެންޝަން ސްކީމަށް ގެންނަ ބަދަލުތައް ފާހަގަކުރެވެއެވެ.
