މިއަންނަ އަހަރު އެންމެ ފުރަތަމަ ފެށޭ އެޔާޕޯޓު އެޅޭ މަރުހަލާގައި އއ. އަތޮޅުގައި އެއާޕޯޓެއް އެޅުމުގެ މަސައްކަތް ފެށިގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އއ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި މަތިވެރީގައި އޮތް ޖަލްސާގައި އެމަނިކުފާނު ވިދާޅުވީ ސަރުކާރުން އެންމެ އިސްކަންދޭނީ ބޯހިޔާވަހިކަމަށާއި ތައުލީމަށާއި އަދި ސިއްޚީ ދާއިރާއަށެވެ.
އއ. އަތޮޅަކީ މިހާތަނަށް އެއަރޕޯޓެއް ނެތް މަދު އަތޮޅުތަކުގެ ތެރެއިން އެއް އަތޮޅުކަން ފާހަގަ ކުރައްވައި ރައީސް ވިދާޅުވީ، މަސައްކަތްކުރުމަށް މިއަހަރުގެ ބަޖެޓުގައި ދަތިތަކެއް ހުރިނަމަވެސް އަންނަ އަހަރުން ފެށިގެން ރައްޔިތުންނަށް އެމަނިކުފާނު ވެވަޑައިގެންފައިވާ ވަޢުދުތައް ފުއްދުމުގެ މަސައްކަތް ފެށޭނެއެވެ.
ރައީސް ވިދާޅުވީ ކުރިއަށް އޮތް ދެ އަހަރުގެތެރޭގައި އެ ވަޢުދުތަކުގެތެރޭގައި ހިމެނޭ މަޝްރޫޢުތައް ފެށި، އަދި ބައެއް މަޝްރޫޢުތައް ނިންމާތަން ޢަމަލީގޮތުން ފެންނާނެކަމަށެވެ.
މަތިވެރީގައި މިހާރު ވެސް 18 ގެސްޓުހައުސް ހުރިއިރު މުޅި ރާއްޖެ ދަތުރުފަތުރުން ގުޅާލާއިރު އެސަރަޙައްދުގައި ކޮންމެހެން ވެސް އެއާޕޯޓެއް އޮންނަން ޖެހެއެވެ.
ރައީސް ވިދާޅުވީ އެމަނިކުފާނަށް މުހިންމީ ނަތީޖާ ނެރުން ކަމަށާއި، މިހާރު މިއޮތީ އިގްތިސާދީގޮތުން ސްޓްރޯންގް ބޭސްއެއް ގާއިމްކުރެވިފައެވެ. ރައީސް އިތުރަށް ވިދާޅުވީ، ޕްރޖެކްޓުތައް ހިގަން ފެށީމަ އިގްތިސާދު ރަގަޅުވެގެންދާނެއެވެ.
ކުރީގެ ވެރިކަމުގައި ބޭރުގެ ސިފައިން ރާއްޖޭގައި ތިބިކަމަށް އިޝާރާތްކުރައްވަމުން ރައީސް ވިދާޅުވިއެވެ. "މިހާރު އެއްވެސް ބޭރު އަސްކަރީ ބޫޓު ޖޯޑެއް ރާއްޖެއިން ނުފެންނާނެ. ޓްރެއިނިންއެއް ފިޔަވާ ރާއްޖޭގައި އެހެން އެއްވެސް ބޭރު އަސްކަރީ ބަޔަކަށް އާދެވޭނީ ރައްޔިތުންގެ މަޖިލީހުން ފާސްކުރުމުން".
އެއާޕޯޓުގެ އިތުރުން މަތިވެރީގެ ތަރައްޤީގެ އެހެނިހެން މަޝްރޫޢުތަކަށް އަލިއަޅުއްވާލައްވަމުން ރައީސް ވިދާޅުވީ މަތިވެރީގެ ބިން ހިއްކައި ގޮނޑުދޮށް ވެސް ހިމާޔަތްކުރައްވާނެކަމަށާއި އަދި ސިއްޙީ މަރުކަޒަށް ޖާގަ އިތުރުކުރައްވައި ޚިދުމަތްތައް އިތުރަށް ފުޅާ ކުރައްވާނެ ކަމަށެވެ.
