ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހެނދުނު އއ. ތޮއްޑޫއަށް ކުރެއްވި ދަތުރުފުޅުގައި، އެރަށުގައި ޑޮލަރު އޭޓީއެމްއެއް ޤާއިމްކުރެވޭނެ ކަމަށް އިޢުލާންކުރައްވައިފިއެވެ. މިއީ މާލެ އަތޮޅާއި އަރިއަތޮޅު އުތުރުބުރީގެ ރަށްތަކަށް ކުރައްވާ ދެ ދުވަހުގެ ދަތުރުފުޅުގެ ތެރެއިން ފުރަތަމަ ވަޑައިގެންނެވި ރަށެވެ.

ތޮއްޑޫއަށް ވަޑައިގަތުމުން ރައީސް ޑރ. މުޢިއްޒަށް ވަނީ ހޫނު މަރުޙަބާއެއް ދަންނަވާފައެވެ. ރައީސް އެރަށުގެ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއި ބައްދަލުކުރެއްވިއެވެ. އަދި ރަށުގެ ރައްޔިތުންނާ ވެސް ބައްދަލު ކުރެއްވިއެވެ.

ޑޮލަރުގެ ކަޅު ބާޒާރު އުފެދިގެން އުޅެނީ މަހުޖަނުން އެމްއެމްއޭއަށް ޑޮލަރު މާރު ނުކުރާތީއެވެ. ސަރުކާރުން ދަނީ ޑޮލަރު ނުލިބޭ މައްސަލައިގައި ރައްޔިތުންނަށް އެހީތެރިވުމަށް މަސައްކަތް ކުރަމުން ކަމަށް ވާއިރު، ޑޮލަރު ބްލެކްމާކެޓް ކޮންޓްރޯލް ކުރަނީ އިދިކޮޅު ވިޔަފާރިވެރިންނެވެ.

ޑޮލަރު މައްސަލަ ޙައްލުކޮށް ތޮއްޑޫ ރައްޔިތުން ފަތުރުވެރިކަމުން ހޯދާ ޑޮލަރު އެރަށު ރައްޔިތުންނަށް އޭޓީއެމް މެދުވެރިކޮށް ލިބޭނެ ގޮތް ހެއްދެވުމަކީ ރައީސް ނުހަނު ބޭނުންފުޅުވެވަޑައިގަންނަވާ ކަމެއް ކަމަށް ވިދާޅުވިއެވެ.

ރައީސް ވަނީ ތޮއްޑޫގެ ތަރައްޤީއަށް ގިނަ ވަޢުދުތަކެއް ވެވަޑައިގެންފައެވެ. މީގެ ތެރޭގައި 2025 ވަނަ އަހަރުގެ ބަޖެޓުގައި ފެނާއި ނަރުދަމާ އަދި މަގު ހެދުމުގެ މަޝްރޫޢު ހިމެނުމާއި، ސިއްޙީ މަރުކަޒު އަޕްގްރޭޑް ކުރުން ހިމެނެއެވެ. އަދި ކުނި މެނޭޖްކުރުމަށް ރީޖަންތަކަށް ބަހާލައިގެން ކުރިއަށް ގެންދާނެ ކަމަށްވެސް ވިދާޅުވިއެވެ.

ރައީސްގެ މި ދަތުރުފުޅުގެ މައިގަނޑު މަޤްޞަދަކީ ރަށްރަށުގެ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި ބައްދަލުކޮށް، އެފަރާތްތަކުގެ ޝަކުވާތައް އަޑުއެއްސެވުމާއި، ރަށްރަށުގައި ކުރިއަށްގެންދާ އަދި ކުރިއަށްގެންދަން ބޭނުންވާ މަޝްރޫޢުތަކާ ބެހޭ މަޢުލޫމާތު ހޯއްދެވުމެވެ. މި ދަތުރުފުޅުގައި ރައީސް ވަޑައިގަންނަވާނީ އއ. އަތޮޅުގެ 3 ރަށަކަށާއި ކ. އަތޮޅުގެ 3 ރަށަކަށެވެ.

ރައީސް ދެން ވަޑައިގަންނަވާނީ ރަސްދޫއަށެވެ.