ޣައްޒާގެ މުސްލިމުންނާއި ދެކޮޅަށް ހިންގަމުންދާ ލާއިންސާނީ ޖަރީމާތައް ހުއްޓުވުމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕުގެ އިންތިޚާބީ ސަރުކާރާއެކު މަޝްވަރާތައް ކުރަމުންދާ ކަމަށް ޤަތަރުގެ ބޮޑުވަޒީރު އަދި ދާޚިލީ ވަޒީރު އަލް-ޝައިޚް މުޙައްމަދު ޢަބްދުއްރަޙްމާން އަލް-ޘާނީ ހާމަކުރައްވައިފިއެވެ.
ޤަތަރުގެ ވެރިރަށް ދޯހާގައި ބޭއްވުނު ބައްދަލުވުމެއްގައި ވާހަކަފުޅު ދައްކަވަމުން ބޮޑުވަޒީރު އަލް-ޘާނީ ވިދާޅުވީ، ޓްރަމްޕު ވެރިކަމުގެ ހުވައި ކުރެއްވުމުގެ ކުރިން އެއްބަސްވުމަކާއި ހަމައަށް އައުމަށް އެމެރިކާއިން ބޭނުންވާކަމުގެ އިޝާރާތްތައް ފެންނަމުންދާ ކަމަށެވެ. މިގޮތުން ފާއިތުވި ހަފުތާތަކުގައި އިންތިޚާބީ ސަރުކާރުގެ މަންދޫބުންނާއެކު މަޝްވަރާތައް ކުރިއަށް ގެންގޮސްފައިވާ ކަމަށް އޭނާ ވިދާޅުވިއެވެ.
2023 އޮކްޓޫބަރު 7 އިން ފެށިގެން ޣައްޒާގެ މުސްލިމުންނާއި ދެކޮޅަށް ހިންގަމުންދާ ލާއިންސާނީ ޢުދުވާނުގައި މިހާތަނަށް 44,000 އަށްވުރެ ގިނަ މީހުން ޝަހީދުވެފައިވާ ކަމަށް ވަނީ ރިޕޯޓުކުރެވިފައެވެ. ފާއިތުވި 14 މަސްދުވަހުގެ ތެރޭގައި ޣައްޒާގެ ބޮޑުބައެއް ސުންނާފަތިވެ ނެތިގޮސްފައި ވީ ނަމަވެސް، ޔަހޫދީ ފައުޖުގެ ލާއިންސާނީ ޢަމަލުތައް ދަނީ ހުއްޓުމެއްނެތި ކުރިއަށެވެ.
Advertisement
ޓްރަމްޕުގެ މެދުއިރުމަތީގެ މަންދޫބުން ވަނީ ޖަނަވަރީ މަހުގެ 20 ވަނަ ދުވަހު އޭނާ ރައީސްކަމުގެ ހުވައި ކުރެއްވުމުގެ ކުރިން ހަނގުރާމަ ހުއްޓައިލައި ރަހީނުން ދޫކޮށްލުމުގެ އެއްބަސްވުމަކާއި ހަމައަށް އައުމަށް މަޝްވަރާކުރުމަށް ޤަތަރަށާއި ޔަހޫދީ ދަޢުލަތަށް ދަތުރުކޮށްފައެވެ.
ޓްރަމްޕުގެ އައު ސަރުކާރުގައި މެދުއިރުމައްޗަށް ޚާއްސަ މަންދޫބުގެ މަޤާމާއި ޙަވާލުވެވަޑައިގަންނަވާ ސްޓީވް ވިޓްކޮފް ނޮވެމްބަރު މަހުގެ ފަހުކޮޅު ޔަހޫދީ ދައުލަތުގެ ބޮޑުވަޒީރު ބެންޖަމިން ނަތަންޔާހޫއާއި ބޮޑުވަޒީރު އަލް-ޘާނީއާ ވަކިވަކިން ބައްދަލުކުރައްވާފައިވާ ކަމަށް މަސްދަރުތަކުން ބުނެއެވެ. މި ބައްދަލުވުންތަކުގައި، 14 މަހުގެ މަސައްކަތަށް ފަހު ނާކާމިޔާބުވެފައިވާ މަޝްވަރާތަކުގެ އޮއިވަރު ބަދަލު ކުރުމަށް ވިޓްކޮފް މަސައްކަތް ކުރައްވާފައިވާ ކަމަށް ބައްދަލުވުންތަކުގެ މަޢުލޫމާތު އެނގޭ މަޞްދަރުތަކުން ހާމަކޮށްފައިވެއެވެ.
މި މަޝްވަރާތަކުގެ މައިގަނޑު މަޤްޞަދަކީ ޣައްޒާގައި ހިނގަމުންދާ އިންސާނީ ހަލާކު ހުއްޓުވުމާއި، ދެފަރާތުގެ މެދުގައި ވަގުތީ ހަނގުރާމަ ހުއްޓުމެއް ގެނައުމެވެ.
