މަސްވެރިންގެ ދުވަސް ފާހަގަކުރުމަށް މިއަހަރު ފުރަތަމަ ފަހަރަށް ބޭއްވި "ރަހަވަރު" ކެއްކުމުގެ މުބާރާތް ކުރިއަށް އޮތް ތަނުގައި އަތޮޅުތަކުގައި ވެސް ބޭއްވުމުގެ ވިސްނުން ގެންގުޅުއްވާ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ އިއްޔެ ބޭއްވުނު "ރަހަވަރު" ކެއްކުމުގެ މުބާރާތް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވަޒީރު ވިދާޅުވީ އަންނަ އަހަރު ސްކޫލް ދަރިވަރުންނަށް އަމާޒުކޮށްގެން މުބާރާތް ބޭއްވުމަށްވެސް ރޭވިފައިވާ ކަމަށެވެ.

"މިއަހަރު ކެއްކުމުގެ މުބާރާތް ޢާންމުންނަށް ހުޅުވާލައިގެން ބޭއްވި ނަމަވެސް، އަންނަ އަަހަރު ސްކޫލް ދަރިވަރުން އަމާޒުކޮށްގެން މުބާރަތް ބޭއްވުމުގެ ވިސްނުންފުޅު ގެންގުޅެން. އަދި ކުރިއަށްއޮތްތަނުގައި ވީހާވެސް ގިނަ ބަޔަކު ބައިވެރިވާގޮތަށް، އަތޮޅުތެރޭގެ ރަށްތަކުގައިވެސް ބޭއްވުމުގެ ވިސްނުން ގެންގުޅެން," ވަޒީރު ވިދާޅުވިއެވެ.

މަސްވެރިކަމާބެހޭ ވުޒާރާއިން ބުނީ މި މުބާރާތް ބޭއްވުމުގެ މަޤްޞަދަކީ އެކި ބާވަތުގެ ކަނޑު މަހުން އުފައްދާ އުފެއްދުންތައް އިތުރުކުރުމަށް ބާރުއަޅައި، އެކަމަށް ލޯބި ޖެއްސުން ކަމަށެވެ. އަދި މަސްވެރިކަމުން އުފައްދާ ކާނާގެ ބާވަތްތައް އިތުރުކުރުމަކީ މަސްވެރިކަމުގެ ސިނާޢަތް ސިންދަފާތުކުރުމަށް މުހިންމު ކަމެއްކަންވެސް އެ ވުޒާރާއިން ފާހަގަކުރިން ފާހަގަކުރިއެވެ.

މިއަހަރުގެ މުބާރާތުގައި 7 ޓީމަކުން 35 އަށްވުރެ ގިނަ މީހުން ބައިވެރިވިއެވެ. މުބާރާތުގައި ކެއްކި ތަކެތި ތައްޔާރުކޮށްފައިވަނީ ފަރުމަހާއި މުށިމަސް ބޭނުންކޮށްގެންނެވެ. މުބާރާތުން 1 ވަނަ ލިބުނީ ފަތްމިނި ކަމަނަ ޓީމަށެވެ. "ޓީމް ފުޑް ބަޑީސް"އަށް ދެވަނަ ލިބިފައިވާއިރު 3 ވަނަ ލިބުނީ "ޓީމް ނޯޑިކް ބައިޓްސް"އަށެވެ.

މީގެއިތުރުން، މިއަހަރުގެ މަސްވެރިންގެ ދުވަސް ފާހަގަކުރުމަށް އިތުރު ހަރަކާތްތަކެއް ރާވާފައިވާކަން ވަޒީރު ހާމަކުރެއްވިއެވެ.

"މިއަހަރުގެ މަސްވެރިންގެ ދުވަސް ފާހަގަކުރުމަށް އާރޓް އެގްޒިބިޝަނެއް ވަނީ ބާއްވަން ހަމަޖެހިފައި. އަދި މަސްވެރިންގެ ގުންޒަރާއި މަސްރޭސްވެސް އޮންނާނެ. ޖަލްސާ އޮންނަނީ އަންނަ ހުކުރު ދުވަހުގެ ރޭ ދަރުބާރުގޭގައި," ވަޒީރު ވިދާޅުވިއެވެ.

މަސްވެރިންގެ ދުވަސް ފާހަގަކުރަނީ ކޮންމެ އަހަރެއްގެވެސް ޑިސެންބަރުމަހުގެ 10 ވަނަ ދުވަހުއެވެ. މަސްވެރިންގެ ދުވަހުގެ ރަސްމީ ޖަލްސާ ރާއްޖޭގެ އެކި ސަރަހައްދުތަކުގައި ބާއްވަމުން އަންނައިރު، މިއަހަރުގެ މަސްވެރިންގެ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ މާލޭގައެވެ.

މުބާރާތުގެ 1 ވަނައަށް އައި ޓީމަށް ފައިސާގެ އިނާމްގެ ގޮތުގައި 10،000 ރުފިޔާ ދީފައިވާއިރު ދެވަނައަށް 7،000 ރުފިޔާ އަދި 3 ވަނައަށް 5،000 ރުފިޔާވަނީ ދީފައެވެ.