ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބޭއްވި މިއަހަރުގެ އިންޓަ ސްކޫލު ވޮލީބޯޅަ މުބާރާތުގެ އެންމެ ކާމިޔާބު އަތޮޅަކަށް ފ. އަތޮޅު ވެއްޖެއެވެ.

ނޮވެމްބަރު 23 ވަނަ ދުވަހުން ފެށިގެން ޑިސެމްބަރު 7 އާއި ހަމަޔަށް ކުރިޔަށްދިޔަ ފޯރިގަދަ މުބާރާތުގައި ގިނަ މެޗުތަކެއް ކުޅުނުއިރު، މިއަހަރުގެ މުބާރާތް ކުރިޔަށްދިޔައީ ތިން އުމުރުފުރައަކަށް ބަހާލައިގެންނެވެ. އެއީ 14 އަހަރުން ދަށާއި 16 އަހަރުން ދަށުގެ އިތުރުން 19 އަހަރުން ދަށެވެ. ކޮންމެ އުމުރުފުރާއަކުން ވެސް އަންހެން އަދި ފިރިހެން ޑިވިޝަނުގެ ކުޅުން ކުރިޔަށްދިޔަ އެވެ.

މުބާރާތުގެ 14 އަހަރުން ދަށުގެ އަންހެން ޗެމްޕިއަންކަން ހޯދާފައިވަނީ ފާފު އަތޮޅު މަދަރުސާ އެވެ. މީގެ އިތުރުން މުބާރާތުގެ 16 އަހަރުން ދަށުގެ އަންހެން ޗެމްޕިއަންކަން ފާފު އަތޮޅު މަދަރުސާ ހޯދިއިރު، 19 އަހަރުން ދަށުގެ އަންހެން ޗެމްޕިއަންކަން ހޯދާފައިވަނީ ފާފު އަތޮޅު ތައުލީމީ މަރުކަޒެވެ. މިއީ އިންޓަސްކޫލް ވޮލީބޯޅަ މުބާރާތުގެ 14 އަހަރުން ދަށުގެ އަންހެނުންގެ ކެޓަގަރީގެ ޗެމްޕިއަންކަން ފ. އަތޮޅު މަދަރުސާއިން ޖެހިޖެހިގެން ހޯދި ތިންވަނަ ފަހަރެވެ. އެއާއެކު އެ ޓީމަށް މުބާރާތުގެ މި ޑިވިޝަނުގެ ތަށި ވަނީ މިލްކުވެފައެވެ.

މުބާރާތުގެ 14 އަހަރުން ދަށުގެ ފިރިހެން ޑިވިޝަނުގެ ޗެމްޕިއަންކަން މަޑިފުށި ސްކޫލް ހޯދިއިރު، 16 އަހަރުން ދަށުގެ ފިރިހެން ޗެމްޕިއަން ޓީމަކީ ކުނބުރުދޫ ސްކޫލެވެ. އަދި ރޭ ކުޅުނު މުބާރާތުގެ އެންމެ ފަހު ފައިނަލް ކަމަށްވާ 19 އަހަރުން ދަށުގެ ފިރިހެން ޗެމްޕިއަންކަން ހޯދާފައިވަނީ ސީއެޗްއެސްސީ ބަލިކޮށް އިހަވަންދޫ ސްކޫލެވެ.

އިހަވަންދޫ ސްކޫލުން ޗެމްޕިއަންކަން ހޯދި މެޗަށްފަހު މުބާރާތުގެ ތިން ކެޓަގަރީގެ އަންހެން އަދި ފިރިހެން ޑިވިޝަނުގެ ވަނަވަނައަށް ދިޔަ ޓީމުތަކާއި، އަދި ހަ ކެޓަގަރީގެ ތެރެއިން ކޮންމެ ކެޓަގަރީއަކުން އެންމެ އަންހެން އަދި ފިރިހެން ހަ ކުޅުންތެރިން ހިމެނޭ ޑްރީމް ޓީމެއް ވަނީ ހޮވާފައެވެ.