ވޮލީ ބޯލް އެސޯސިއޭޝަން އޮފް މޯލްޑިވްސްގެ ހެޑް ކޯޗް ސޮފްވާން އަހުމަދު ކުޅުންތެރިއަކަށް ޖިންސީ ގޯނާ ކުރިކަމަށް ތުހުމަތުކުރާ މައްސަލައެއް ފުލުހުން ބަލަން ފަށައިފި އެވެ.

މި މައްސަލައާ ގުޅިގެން ފުލުހުން ބުނީ ރާއްޖޭގެ ކުޅިވަރު އެސޯސިއޭޝަނެއްގައި އެތްލީޓުން ތަމްރީނުކުރުމުގެ ޒިންމާ އޮތް ފަރާތެެއްގެ މައްޗަށް ތުހުމަތުކުރެވޭ ޖިންސީ ކުށުގެ މައްސަލައެއް އެ އިދާރާގެ ސަމާލުކަމަށް އައުމާ ގުޅިގެން އެ މައްސަލަ ތަހުގީގު ކުރަމުންދާ ކަމަށެވެ. އަދި މި މައްސަލާގައި މިހާތަނަށް މީހަކު ހައްޔަރުކޮށްފައި ނުވާ ކަމަށް ފުލުހުން ބުންޏެވެ.

ސޮފްވާންގެ މައްޗަށް ކުރެވޭ ތުހުމަތާ ގުޅިގެން ވޮލީބޯލް އެސޯސިއޭޝަނުން މިދިޔަ އޮކްޓޯބަރު މަހު ވަނީ އޭނާ ފަސް އަހަރަށް ސަސްޕެންޑުކޮށްފަ އެވެ. އަދި އަންހެން ޓީމުގެ ކޯޗުގެ މަގާމުން ސޮފްވާން ވަަކިކުރުމަށާއި އެ ފަދަ މަގާމަކަށް ކުރިއަށް އޮތް ފަސް އަހަރު ނުނެގުމަށާއި އެ އެސޯސިއޭޝަނުން އިންތިޒާމްކުރާ އެއްވެސް މުބާރާތެއްގައި ސޮފްވާނަށް ކުރިއަށް އޮތް ފަސް އަހަރު ބައިވެރިނުވެވޭ ގޮތަށް ނިންމުމުގެ އިތުރުން، އެސޯސިއޭޝަންގެ ރެފްރީން ފޮނުވައިގެން ކުރިއަށްދާ އެއްވެސް މުބާރާތެއްގައި ސޮފްވާނަށް މަސައްކަތް ނުކުރެވޭ ގޮތަށްވެސް ވަނީ ނިންމާފަ އެވެ.

މީގެ އިތުރުން، އެސޯސިއޭޝަންގެ ހިންގާ ކޮމިޓީގެ މެމްބަރު ކަމުން ސޮފްވާން ވަކިކުރުމަށް ފަހު، ކުރިއަށް އޮތް ފަސް އަހަރު، އެ އެސޯސިއޭޝަންގެ އިންތިހާބީ އެއްވެސް މަގާމަކަށް ސޮފްވާނަށް ނާދެވޭ ގޮތަށް އަދަބު ދޭންވެސް ވަނީ ނިންމައިފަ އެވެ.