ރިސޯޓްތަކުގެ މެދުގައި ބޭއްވި ފޯރިގަދަ ވޮލީ މުބާރާތުގެ ފައިނަލް މެޗު، ދިވެހިރާއްޖޭގެ ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ޝަރަފުވެރިކޮށްދެއްވައިފިއެވެ.
ވަން އެންޑް އޮންލީ ރީތި ރަށް މޯލްޑިވްސްގައި ކުރިއަށްގެންދިޔަ މި މެޗު ފެއްޓުމުގެ ކުރިން ރައީސުލްޖުމްހޫރިއްޔާގެ ނައިބު ވަނީ، ލެކްނޯ ރިޒޯޓް ވޮލީ ޗެމްޕިއަންޝިޕް 2026 ގެ ޓްރޮފީ ތަޢާރަފުކޮށްދެއްވާފައެވެ. އަދި އެމަނިކުފާނު ވަނީ، މެޗުގައި ބައްދަލުކުރި ދެ ޓީމު، ވަން އެންޑް އޮންލީ ރީތި ރަށް ރިޒޯޓާއި ބަނޑޮސް އައިލެންޑް ރިޒޯޓުގެ ކުޅުންތެރިންނާއި މެޗުގެ އޮފިޝަލުންނާ ސަލާމްކުރައްވާފައެވެ.
ފޯރިގަދަ ކުޅުމަކަށް ފަހު، ސީދާ 3 ސެޓުން މެޗު ކާމިޔާބުކޮށް، މުބާރާތުގެ ތަށި ދިފާޢުކޮށްފައިވަނީ، ވަން އެންޑް އޮންލީ ރީތި ރަށް ރިޒޯޓުގެ ޓީމުންނެވެ.
Advertisement
މި މެޗަށް ފަހު ޗެމްޕިއަން ޓީމަށް ވާދައިގެ ތައްޓާއި މެޑަލް ހަވާލުކޮށްދެއްވާފައި ވަނީ ރައީސުލްޖުމްހޫރިއްޔާގެ ނައިބެވެ.
މި މުބާރާތުގެ ފައިނަލް މެޗު ކުޅުނީ ސޯޝަލް ސެންޓަރުގެ އިންޑޯ ކޯޓުގައެވެ. މި މެޗު ބައްލަވާލެއްވުމަށް ނައިބު ރައީސްގެ އަރިހުގައި ސަރުކާރުގެ ބައެއް އިސްވެރިންނާއި ކުޅިވަރަށް ލޯބިކުރާ ގިނަ އަދަދެއްގެ ބަޔަކު ވަނީ ބައިވެރިވެފައެވެ.
މި މުބާރާތަކީ ރިސޯޓްތަކުގައި މަސައްކަތްކުރާ މުވައްޒަފުންގެ މެދުގައި އެކުވެރިކަން އާލާކުރުމާއި، ވޮލީގެ ހުނަރު އިތުރުކުރުމުގެ މަޤްޞަދުގައި ކުރިއަށްގެންދިޔަ މުބާރާތެކެވެ. މެޗު ނިމުމުން، މުބާރާތުގެ ވަނަވަނައަށް ދިޔަ ޓީމުތަކަށާއި މޮޅު ކުޅުންތެރިންނަށް މެޑެއްޔާއި ތަށި ބަހައްޓަވައިދެއްވީ ނައިބު ރައީސް ޙުސައިން މުޙައްމަދު ލަޠީފެވެ.
މި ސަރުކާރުން ކުޅިވަރު ކުރިއެރުވުމަށް ދޭ އަހައްމިއްޔަތުކަމުގެ ދަށުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ މަތިން ކުޅިވަރުގެ ދާއިރާއަށް ބޮޑެތި އެހީތެރިކަން ފޯރުކޮށްދެމުންދާކަން ފާހަގަކުރެވެއެވެ.
