ގައުމެއްގެ ކުޑަބޮޑުމިނަށް ބެލުމެއްނެތި، ކޮންމެ ދައުލަތަކަށްވެސް އަމިއްލަ މުސްތަގްބަލް ބައްޓަންކުރުމުގެ ފުރިހަމަ އިހްތިޔާރާއި ގާބިލުކަން ލިބެންޖެހޭނެކަމުގައި ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުހައްމަދު ލަތީފް ވިދާޅުވެއްޖެއެވެ.

ނިއުޔޯކުގައި ކުރިއަށްދާ އދ. ގެ އާންމު މަޖިލީހުގެ 81 ވަނަ ބައްދަލުވުމުގައި ވާހަކަފުޅުދައްކަވަމުން އެމަނިކުފާނު ވިދާޅުވީ، މިއަދު ކުދި ގައުމުތަކަށް ކުރިމަތިވެފައިވާ ނުރައްކާތައް ބަދަލުވެފައިވާކަމަށެވެ. އެގޮތުން ސަޕްލައި ޗެއިންތަކާއި، މާލީ ބާޒާރުތަކާއި، ޑިޖިޓަލް ނެޓްވޯކްތަކުގެ އިތުރުން ކުރިއަރަމުން އަންނަ ޓެކްނޮލޮޖީގެ ޒަރީއާއިންވެސް ބޭރުގެ ނުފޫޒުތައް ފެތުރެމުންދާކަމަށް އެމަނިކުފާނު ވިދާޅުވިއެވެ. އަދި ބޮޑެތި ބާރުތަކުގެ ވާދަވެރިކަމުގެ ސަބަބުން ކުދި ގައުމުތަކުގެ މިނިވަން އިހްތިޔާރުތަކަށް ހުރަސްއެޅިގެން ނުވާނެކަމަށްވެސް އެމަނިކުފާނު ވަކާލާތުކުރެއްވިއެވެ.

މީގެއިތުރުން، މެދުއިރުމަތީގެ މަސްރަހާއި ފަލަސްތީނުގެ ހާލަތަށް އަލިއަޅުއްވާލައްވަމުން، އިސްރާއީލުން ހިންގަމުންދާ ޖަރީމާތައް ކުށްވެރިކުރެއްވިއެވެ. އަދި 1967 ގެ ކުރީގެ ބޯޑަރުތަކުގެ މައްޗަށް ބިނާވެފައިވާ، އިރުމަތީ ގުދުސް ވެރިރަށުގެ ގޮތުގައި އޮތް މިނިވަން ފަލަސްތީނުގެ ދައުލަތެއް ބަލައިގަނެ، އދ. ގެ ފުރިހަމަ މެންބަރުކަން ފަލަސްތީނަށް ދިނުމަށް ދިވެހިރާއްޖެއިން ކުރަމުންދާ ވަކާލާތު އެމަނިކުފާނު ތަކުރާރުކުރެއްވިއެވެ. ހަމައެހެންމެ، ހުރްމުޒް ކަނޑުއޮޅިން ދަތުރުފަތުރުކުރުމަށް އަންނަ ހުރަސްތަކުގެ ސަބަބުން ދިވެހިރާއްޖޭގެ އިގްތިސާދަށާއި ކާބޯތަކެތީގެ ސަޕްލައިއަށް ކުރާ ނޭދެވޭ އަސަރުތައް ފާހަގަކުރައްވައި، ހާލަތު ފިނިކުރުމަށް ބައެއް ގައުމުތަކުން ކުރަމުންދާ މަސައްކަތްތަކަށް ތައުރީފުކުރެއްވިއެވެ.

މޫސުމީ ބަދަލުތަކާ ގުޅޭގޮތުން ވާހަކަފުޅުދައްކަވަމުން، ކުދި ޖަޒީރާ ގައުމުތަކަށް ކަނޑުގެ ލޮނުގަނޑު އުފުލުމަކީ ހަމައެކަނި ތިމާވެށީގެ މައްސަލައެއް ނޫން ކަމަށާއި، އެއީ ގައުމުގެ އިސްތިގްލާލާ ސީދާ ގުޅިފައިވާ ކަމެއްކަމުގައި ރައީސުލްޖުމްހޫރިއްޔާގެ ނައިބު ވިދާޅުވިއެވެ. އަދި 2040 ވަނަ އަހަރަށް ދިވެހިރާއްޖެ ތަރައްގީވެފައިވާ ގައުމަކަށް ހެދުމަށް ގެންގުޅޭ ތަސައްވުރަށް އަލިއަޅުއްވާލައްވަމުން، ބައިނަލްއަގްވާމީ މާލީ ނިޒާމު އިސްލާހުކުރުމާއި، އާޓިފިޝަލް އިންޓެލިޖެންސްގެ ސަބަބުން ކުދި ގައުމުތަކަށް އައު ފުރުސަތުތަކެއް ފަހިވެގެންދާންޖެހޭނެކަން ފާހަގަކުރެއްވިއެވެ.

ތަގްރީރު ނިންމަވާލައްވަމުން އެމަނިކުފާނު ވަނީ އދ. ގެ މުއައްސަސާތައް އިސްލާހުކުރުމަށް ގޮވާލައްވާފައެވެ. އެގޮތުން ސަލާމަތީ މަޖިލިސް ފުޅާކޮށް ސިޑްސް ގައުމުތަކަށް ދާއިމީ ގޮތެއްގައި ގޮނޑިއެއް ލިބޭނެގޮތް ހެދުމަށާއި، ވީޓޯކުރުމުގެ ބާރު އުވާލުމަށް ވަކާލާތުކުރެއްވިއެވެ. އަދި އދ. ގެ ސެކްރެޓަރީ ޖެނެރަލްގެ މަގާމަށް ކުރިއަށް އޮތް ތަނުގައި އަންހެން ބޭފުޅަކު އައްޔަންކުރުމުގެ މުހިންމުކަން ފާހަގަކުރައްވައި، ބައިނަލްއަގްވާމީ ނިންމުންތަކަކީ ގައުމުތަކުގެ މިނިވަންކަމާއި ގާބިލުކަން އިތުރުކޮށްދޭ ފަދަ ނިންމުންތަކަކަށް ހެދުމަށް ގޮވާލެއްވިއެވެ،