އދ. ގެ އާންމު މަޖިލީހުގެ 81 ވަނަ ސެޝަންގެ ހައި-ލެވެލް ހަފުތާގެ ހަރަކާތްތަކުގައި ބައިވެރިވެވަޑައިގަތުމަށް، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް އެމެރިކާގެ ނިއުޔޯކަށް ކުރެއްވި ރަސްމީ ދަތުރުފުޅު ކާމިޔާބުކަމާއެކު ނިންމަވާލައްވައިފި އެވެ.

މި ސަމިޓުގެ ތެރެއިން ބޭއްވުނު އާންމު ބަހުސްގައި ރާއްޖޭގެ ފަރާތުން ގައުމީ ބަޔާން އިއްވަވަމުން، ނައިބު ރައީސް ވަނީ ކޮންމެ ޤައުމަކަށްވެސް އެ ގައުމެއްގެ އަމިއްލަ މުސްތަގުބަލު ބައްޓަންކުރުމުގެ އަސާސީ ހައްގު ލިބިގެންވާކަން ފާހަގަކުރައްވާފަ އެވެ. އަދި ކުދި ގައުމުތަކުގެ ސަލާމަތަށް ކުރިމަތިވަމުންދާ ގޮންޖެހުންތަކަށް އަލިއަޅުއްވާލައްވަމުން، 2040 ވަނަ އަހަރާ ހަމައަށް ރާއްޖެ ތަރައްގީވެފައިވާ ގައުމަކަށް ހެއްދެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަސައްވުރުގެ މުހިންމުކަން އެމަނިކުފާނު ބަޔާންކުރެއްވި އެވެ. މީގެއިތުރުން، 1967 ގެ ކުރީގެ ސަރަހައްދީ އިންތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިރަށް ކަމުގައި ކަނޑައަޅައި، ފަލަސްތީނުގެ މިނިވަން ދައުލަތެއް ގާއިމުކުރުމަށް އެމަނިކުފާނު ވަކާލާތު ކުރެއްވި އެވެ. އަދި އދ. ގެ ސަލާމަތީ މަޖިލީހުން ތަރައްގީވަމުން އަންނަ ކުދި ޖަޒީރާ ޤައުމުތަކަށް ދައުރުވާ ގޮނޑިއެއް ކަނޑައެޅުމަށާއި، އދ. ގެ ނިޒާމަށް ފުރިހަމަ އިސްލާހީ ބަދަލުތަކެއް ގެނައުމަށްވެސް ގޮވާލެއްވި އެވެ.

މޫސުމަށް އަންނަ ބަދަލުތަކާ ގުޅޭގޮތުން ވާހަކަފުޅު ދައްކަވަމުން، ކަނޑުގެ ލޮނުގަނޑު އުފުލުމާ ބެހޭ މަތީ ފަންތީގެ ޕްލެނަރީ ބައްދަލުވުމުގައި ނައިބު ރައީސް ވިދާޅުވީ، ރަށްތައް ގިރަމުންދާ ދިއުމަށް ރާއްޖެއިން ދޭ ޖަވާބަކީ ފަހަތަށް ޖެހުމެއް ނެތި ވިލުންތެރިކަން އިސްކުރުން ކަމުގައެވެ. އަދި މޫސުމީ ބަދަލުތަކަށް ހޭނުމަށް ބޭނުންވާ މާލީ އެހީ އަވަހަށް ލިބުމުގެ މުހިންމުކަން ފާހަގަކުރައްވައި، ކަނޑުގެ ލޮނުގަނޑު އުފުލުމަކީ ގާނޫނީ ގޮތުން ބަލައިގެންފައިވާ ސަރަހައްދީ އިންތައް އުނިވާންޖެހޭނެ ނުވަތަ ދައުލަތެއް ނެތިގެންދާންޖެހޭ ސަބަބެއް ނޫން ކަމަށް ވިދާޅުވި އެވެ.

މި ދަތުރުފުޅުގެ ތެރެއިން ބައިނަލްއަގްވާމީ ގުޅުންތައް ބަދަހިކުރެއްވުމުގެ ގޮތުން، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭސް އާއި ބަންގްލަދޭޝްގެ ބޮޑުވަޒީރު ތާރިގް ރަހްމާން އާއެކު ނައިބު ރައީސް މުހިންމު މަޝްވަރާތަކެއް ބޭއްވެވި އެވެ. އަދި ޗައިނާއިން އިންތިޒާމުކުރި ގްލޯބަލް ޑިވެލޮޕްމަންޓް އިނިޝިއޭޓިވްގައި ބައިވެރިވެވަޑައިގެން ތަގުރީރު ކުރައްވައި، ރާއްޖޭގެ ހާރިޖީ އަދި ތަރައްގީގެ އިސްކަންދޭ ކަންކަން އެމަނިކުފާނު ވަނީ ބައިނަލްއަގްވާމީ މައިދާނުގައި ހާމަކުރައްވާފަ އެވެ.