ގައުމަށް ބޭނުންވާ މުހިންމު ދާއިރާތަކަށް އީޖާދީ ވިސްނުންތައް ހޯދައިދީ، ޒުވާނުން އިސްނަގައިގެން ތަރައްގީގެ މަސައްކަތްތަކުގައި އަމަލީގޮތުން ބައިވެރިވުމަށް ރައީސުލްޖުމްހޫރިއްޔާގެ ނައިބު އަލްއުސްތާޒް ހުސައިން މުހައްމަދު ލަތީފް އެދިވަޑައިގެންފިއެވެ. އެމަނިކުފާނު މިފަދައިން އެދިވަޑައިގެންނެވީ ރޭ ބޭއްވި ވިލާ ކޮލެޖުގެ ސްޓޫޑެންޓް އެޗީވްމަންޓް އެވޯޑްސް 2026 ހަފުލާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ނައިބު ރައީސްގެ ވާހަކަފުޅުގައި، މުޖުތަމައަށް ދިމާވެފައިވާ ގޮންޖެހުންތަކާއި މައްސަލަތަކަށް ދާއިމީ ހައްލު ހޯދައިދިނުމުގައި ދަސްވެނީންގެ އިލްމާއި ހުނަރުގެ ބޭނުން އިންތިހާއަށް ބޮޑުކަން ފާހަގަކުރެއްވިއެވެ. އަދި ޒުވާނުންގެ ސިކުނޑިތަކުން ނުކުންނަ އައު ހިޔާލުތަކާއި އީޖާދީ ވިސްނުންތަކަކީ ގައުމުގެ ކުރިއެރުމަށް ކޮންމެހެން ބޭނުންވާ ކަމެއް ކަމަށް އެމަނިކުފާނު ވިދާޅުވިއެވެ.
މާދަމާ މަސައްކަތު މާހައުލަށް ނުކުމެ ކުރާ މަސައްކަތްތައް ވެގެންދާނީ ޒިންމާދާރު އަދި ސްޕީޑް އަވަސް މަސައްކަތްތަކަކަށް ކަމަށާއި، މިކަމުގެ ސަބަބުން ރައްޔިތުންނާއި މުއައްސަސާތަކާ ދެމެދު އޮންނަ އިތުބާރު އިތުރަށް ބަދަހިވެގެންދާނެ ކަމަށް އުންމީދު ކުރައްވާ ކަމަށް ވެސް ނައިބު ރައީސް ވިދާޅުވިއެވެ. މީގެއިތުރުން، ރާއްޖެ ފުރިހަމައަށް ތަރައްގީވެފައިވާ ގައުމަކަށް ހެދުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގެންގުޅުއްވާ 2040 ގެ ދުރުރާސްތާ ތަސައްވުރު ހަގީގަތަކަށް ހެދުމުގައި ޒުވާނުންގެ ބައިވެރިވުން މުހިންމުކަމަށް ފާހަގަކުރެއްވިއެވެ.
Advertisement
މި ހަފުލާގައި ޕޯސްޓް ގްރެޖްއޭޓް ޕްރޮގްރާމްގެ ގާސިމް އިބްރާހިމް އެވޯޑް ފޮރ އެކްސެލެންސް ހާސިލްކުރި ދަސްވެނީންނަށް އެވޯޑް ދެއްވީ ރައީސުލްޖުމްހޫރިއްޔާގެ ނައިބެވެ. އަދި އެވޯޑް ހާސިލުކުރި ހުރިހާ ދަސްވެނީންނަށާއި އެ ކުދިންގެ އާއިލާތަކަށް އެމަނިކުފާނު ވަނީ ތަހުނިޔާއާއި މުބާރިކުބާދީ ދަންނަވާފައެވެ.
