ތަރައްގީވަމުން އަންނަ ގައުމުތަކަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމަށާއި، އެންމެންނަށްވެސް ބައިވެރިވެވޭފަދަ ހަރުދަނާ، ޝާމިލު އަދި ދެމެހެއްޓެނިވި މުސްތަގްބަލެއް ބިނާކުރުމަށްޓަކައި، ގައުމުތަކުގެ މެދުގައި ގުޅުން ބަދަހިކުރުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުހައްމަދު ލަތީފް ގޮވާލައްވައިފިއެވެ.
އދ. ގެ އާންމު މަޖިލީހުގެ 81 ވަނަ ބައްދަލުވުމުގެ ހަވާސާގައި ޗައިނާއިން އިންތިޒާމުކޮށްގެން ބޭއްވި، ގްލޯބަލް ޑިވެލޮޕްމަންޓް އިނީޝިއޭޓް (ޖީ.ޑީ.އައި) ގެ ހައި-ލެވެލް މީޓިންގައި ވާހަކަފުޅުދައްކަވަމުން އެމަނިކުފާނު ވަނީ މިކަމަށް ބާރުއަޅުއްވާފައެވެ. އަދި މި އިނީޝިއޭޓަށް ދިވެހިރާއްޖެއިން ފުރިހަމައަށް ތާއީދުކުރާކަން ހާމަކުރައްވައި، ތަރައްގީވަމުން އަންނަ ގައުމުތަކަށް ކުރިމަތިވާ ދަތިތަކުން ސަލާމަތްކުރުމަށް ޗައިނާއިން ކުރަމުންދާ މަސައްކަތްތަކަށް ޝުކުރުއަދާކުރައްވާފައިވެއެވެ.
މި ބައްދަލުވުމުގައި ވާހަކަފުޅުދައްކަވަމުން ނައިބު ރައީސް ވަނީ މައިގަނޑު ބައެއް ކަންކަމަށް އަލިއަޅުއްވާލައްވާފައެވެ. އެގޮތުން، ދަރަނީގެ ނުރައްކާތަކުގެ ސަބަބުން ގައުމުތަކުގެ ތަރައްގީއަށާއި ދެމެހެއްޓެނިވި ކަންކަމަށް އިންވެސްޓްކުރުމަށް ހުރަސްއެޅެމުންދާކަން ފާހަގަކުރެއްވިއެވެ. އަދި ހާއްސަކޮށް މޫސުމަށް އަންނަ ބަދަލުތަކުގެ ސަބަބުން ކުދި ޖަޒީރާ ގައުމުތަކަށް ބޮޑެތި ގޮންޖެހުންތަކާ ކުރިމަތިލާންޖެހިފައިވާކަން ފާހަގަކުރައްވައި، ކޮޕް31 ގައި ވެފައިވާ ވައުދުތައް އަމަލީ ސިފައަކަށް ބަދަލުކުރުމުގެ މުހިންމުކަން ބަޔާންކުރެއްވިއެވެ.
Advertisement
މީގެއިތުރުން، އިލްމާއި ޓެކްނޮލޮޖީ އަދި އީޖާދީ ދާއިރާތަކުން، ހާއްސަކޮށް އާޓިފިޝަލް އިންޓެލިޖެންސް ގެ ދާއިރާއިން ބައިނަލްއަގްވާމީ އެއްބާރުލުން އިތުރުކުރަންޖެހޭކަމަށް ވިދާޅުވިއެވެ. އަދި ގާބިލުކަން އިތުރުކުރުމާއި، ޓެކްނޮލޮޖީ ބަދަލުކުރުމާއި، މައުލޫމާތު ހިއްސާކުރުން ހަރުދަނާކުރުމަށް އެމަނިކުފާނު ގޮވާލެއްވިއެވެ.
