ޑިމޮކްރެޓިކް ރިޕަބްލިކް އޮފް ކޮންގޯގައި ފެތުރެމުންދާ ގޮތްނޭނގޭ ބައްޔެއް ދެނެގަތުމަށް އެހީތެރިވުމަށްޓަކައި ސިއްޙީ މާހިރުން އެ ޤައުމަށް ފޮނުވުމަށް ދުނިޔޭގެ ސިއްޙަތު ޖަމްޢިއްޔާ (ޑަބްލިޔުއެޗްއޯ) އިން ނިންމައިފިއެވެ.
ޑަބްލިޔުއެޗްއޯގެ ސިއްޙީ މާހިރުން ފޮނުވަނީ ކޮންގޯގެ ކުވަންގޯ ޕްރޮވިންސްގެ ހުޅަނގުދެކުނުގައި އޮންނަ ޕެންޒީ ސަރަޙައްދަށެވެ. މި ސަރަޙައްދުގައި ގޮތްނޭނގޭ ބައްޔެއް ޖެހިގެން ގިނަ އަދަދެއްގެ މީހުން މަރުވެފައިވާ ކަމަށް ވަނީ ރިޕޯޓުކުރެވިފައެވެ.
ޑަބްލިޔުއެޗްއޯގެ އެފްރިކާގެ ރީޖަނަލް ޑިރެކްޓަރު މެޓްޝިޑިސޯ މޯޓީ ވިދާޅުވި ގޮތުގައި، މި ބަލީގެ އަސަރުކޮށްފައިވާ މީހުންނަށް އެހީތެރިކަން ފޯރުކޮށްދީ، ބަލި ޖެހޭ ސަބަބާއި ފެތުރޭ ގޮތްތައް ދެނެގަނެ، ވީހާވެސް އަވަހަކަށް އެކަށީގެންވާ ގޮތެއްގައި ބަލިން ރައްކާތެރިވުމަށް މަސައްކަތްކުރަމުންދެއެވެ.
ކޮންގޯގެ ސިއްޙީ ވުޒާރާގެ މަޢުލޫމާތުތަކަށް ބަލާއިރު، މި ބަލި ޖެހިގެން މިހާތަނަށް ރިޕޯޓުކޮށްފައިވާ 394 މީހުންގެ ތެރެއިން 30 މީހުން ވަނީ މަރުވެފައެވެ. ނަމަވެސް ކޮންގޯގެ ބައެއް ރަސްމީ އިދާރާތަކުން ބުނާ ގޮތުގައި، މިދިޔަ މަހުގެ ތެރޭގައި ޕެންޒީ ސަރަޙައްދުން މި ބަލި ޖެހިގެން 143 މީހަކު ވަނީ މަރުވެފައެވެ.
ޑަބްލިޔުއެޗްއޯއިން ބުނެފައިވާ ގޮތުގައި، މި ބަލީގެ އަލާމާތްތަކުގެ ތެރޭގައި ބޮލުގައި ރިހުން، ކެއްސުން، ހުން އައުން، ނޭވާލާން އުނދަގޫވުން އަދި ލޭ މަދުވުން ހިމެނެއެވެ. މި ބަލި ދެނެގަތުމަށް ހަދަމުންދާ ތަހުލީލުތަކަށްފަހު އެއްކުރެވޭ މަޢުލޫމާތުތައް ވަރަށް އަވަހަށް ޙިއްސާކުރާނެ ކަމަށް ޑަބްލިޔުއެޗްއޯއިން ބުނެފައިވެއެވެ.
