އަލަށް ޢަމަލުކުރަން ފެށި ފޮރިން އިންވެސްޓްމެންޓް ޤާނޫނުގެ ދަށުން ރާއްޖޭގައި އިންވެސްޓްކުރުމުގެ ލައިސެންސް ދޫކުރުމުގެ މަސައްކަތް ފަށައިފިއެވެ.

އިޤްތިޞާދީ ވުޒާރާއިން ބުނީ މި ޤާނޫނުގެ ދަށުން ރާއްޖޭގައި އިންވެސްޓް ކުރެވޭނީ އިޤްތިޞާދީ ވުޒާރާއިން ދޫކުރާ ފޮރިން އިންވެސްޓްމެންޓް ލައިސަންސް ލިބިގެން ކަަމަށެވެ.

މިދިޔަ ސެޕްޓެމްބަރު މަހުގެ 3 ވަނަ ދުވަހު ރައީސުލްޖުމްހޫރިއްޔާ ތަސްދީޤުކުރެއްވި މި ޤާނޫނަށް ޢަމަލުކުރަން ފެށުމަށް ހަމަޖެހިފައިވަނީ ގެޒެޓް ކުރާތާ 3 މަސް ދުވަހުގެ ތެރޭގައެވެ. އިންވެސްޓްކުރުމުގެ ޙުއްދަ ހޯދުމަށް އެދި ހުށަހަޅަންޖެހެނީ އިޤްތިޞާދީ ތަރައްޤީއާބެހޭ ވުޒާރާއަށެވެ.

އިންވެސްޓް ކުރުމުގެ ޙުއްދަ ހޯދުމުގެ މަރުޙަލާތަކުގެ ތެރޭގައި ހިމެނެނީ އިންވެސްޓްކުރަން ޝައުޤުވެރިވާ ފަރާތްތަކުން އެކަމަށް އެދި ހުށަހެޅުމާއި، ޝަރުތު ފުރިހަމަވާ ފަރާތްތަކަށް އިޢުތިރާޟެއް ނެތްކަމުގެ ލިޔުން ވުޒާރާއިން ދިނުމާއި، އިންވެސްޓްކުރާ ފަރާތުގެ ވިޔަފާރި ރަޖިސްޓްރީކުރުމާއި، ފޮރިން އިންވެސްޓްމެންޓް ލައިސަންސް ވުޒާރާއިން ދޫކުރުމާއި، ފޮރިން އިންވެސްޓަރާއި އިޤްތިޞާދީ ވުޒާރާއާ ދެމެދު އެއްބަސްވުމުގައި ސޮއިކުރުމެވެ.

މި އައު ޤާނޫނުގެ މަޤުޞަދަކީ ދިވެހިރާއްޖޭގައި ކުރެވޭ ބޭރުގެ އިންވެސްޓްމަންޓްތައް އިތުރުކޮށް، އިންވެސްޓްމަންޓްތައް މެދުވެރިކޮށް ފޮރިން ކެޕިޓަލާއި، ޓެކްނޮލޮޖީއާއި ޢިލްމާއި ހުނަރު ގެނައުމަށް ފަހި މާޙައުލެއް އުފައްދައި، ދިވެހިރާއްޖޭގެ އިޤްތިޞާދު ތަރައްޤީކުރުމަށްޓަކައި ހަރުދަނާ އުޞޫލުތަކެއް ކަނޑައެޅުމެވެ.

ސަރުކާރުން ބުނިގޮތުގައި މި ޤާނޫނާއެކު އިންވެސްޓަރުން ރާއްޖެއަށް ކުރާ އިތުބާރު އިތުރުވެ، ބޭންކްތަކުންނާއި މާލީ އިދާރާތަކުން ފައިސާގެ އެހީ ލިބުމަށް އިތުރަށް މަގުފަހިވެގެންދާނެއެވެ. އަދި މި ޤާނޫނުގެ ސަބަބުން އިންވެސްޓްމަންޓް ޕްރޮޓެކްޝަން ޕްރޮމޯޝަން އެގްރީމަންޓެއް ހެދި، އެ އެގްރީމަންޓް ބަލައިގަތުމުގެ ޖާގަ ފަހިވެގެންދާނެ ކަމަށް ސަރުކާރުން ބުންޏެވެ.