ނަމާދަކީ ޤިޔާމަތްދުވަހު އަޅާގެ ޢަމަލުތަކުގެ ތެރެއިން އެންމެ ފުރަތަމަ ސުވާލުކުރެވޭނެ ޢަމަލު ކަމަށް މިއަދުގެ ހުކުރު ޚުޠުބާގައި ބުނެފިއެވެ.

ޚުޠުބާގައި ބުނީ ނަމާދަކީ އިސްލާމްދީނުގެ ތަނބުކަމުގައިވާ، ކޮންމެ މުކައްލަފަކު ކުރުން ވާޖިބުވެގެންވާ އަޅުކަމެއް ކަމަށެވެ. ރަށުގައި ޤާއިމުވެހުރި މީހާއާއި ދަތުރުވެރިޔާއާއި ބަލިމީހާ ވެސް ނަމާދުކުރަން ޖެހޭނެކަމަށް ޚުޠުބާގައި ބުންޏެވެ. އަދި ހަމައެކަނި ބުއްދި ފިލައިގެންދިޔުމުން މެނުވީ ނަމާދު ދޫކޮށްލުމުގެ ފުރުޞަތެއް ނެތްކަމަަށް ޚުޠުބާގައި ފާހަގަކުރިއެވެ.

ޚުޠުބާގައި ބުނީ ނަމާދަކީ ދުނިޔެވީ ކަންކަން ނިމުމުން ކުރާ ކަމެއްގެ ގޮތުގައި ދެކިގެން ނުވާނެ ކަމަށާއި އެއީ އެންމެ އިސްކަންދޭންޖެހޭ ކަންތައް ކަމަށެވެ.

ކީރިތި ރަސޫލާ ޙަދީޘްކުރައްވައިފައި ބަސްފުޅެއް ގައިވެއެވެ. (إِنَّ أَوَّلَ مَا يُـحَاسَبُ بِهِ الْعَبْدُ يَوْمَ الْقِيَامَةِ مِنْ عَمَلِهِ صَلَاتُهُ، فَإِنْ صَلُحَتْ فَقَدْ أَفْلَحَ وَأَنْـجَحَ، وَإِنْ فَسَدَتْ فَقَدْ خَابَ وَخَسِرَ.)[1] މާނައީ: "ހަމަކަށަވަރުން، ޤިޔާމަތްދުވަހުން އަޅާގެ ޢަމަލުތަކުގެ ތެރެއިން އެންމެ ފުރަތަމަ ހިސާބު ބެއްލެވޭހުށީ، އޭނާގެ ނަމާދާ މެދުގައެވެ. ފަހެ، އެ ނަމާދު ރަނގަޅުވެއްޖެ ނަމަ، (އެބަހީ: އޭނާ ފުރިހަމަގޮތުގައި ރަނގަޅަށް ނަމާދުކޮށްފައިވާ ނަމަ) ހަމަކަށަވަރުން، އޭނާ ކާމިޔާބުވެ، ނަޖާވެއްޖެއެވެ. އަދި އެ ނަމާދު ފާސިދުވެއްޖެނަމަ، ފަހެ، ހަމަކަށަވަރުން، އޭނާ ނާކާމިޔާބުވެ، އަބާއްޖަވެރިވެއްޖެއެވެ."

ދިވެހިންނަކީ ބުރަ މަސައްކަތްކުރާ ބަޔަކަށްވެފައި، ގިނަ މީހުން ދުވާލުގެ ގިނަ ވަގުތު ވަޒީފާތަކުގައި އުޅޭކަން ޚުޠުބާގައި ފާހަގަކުރިއެވެ. ނަމަވެސް މަސައްކަތުގެ ބުރަކަމަކީ ނަމާދަށް ފަރުވާކުޑަކުރަން ޖެހޭ ސަބަބެއް ނޫންކަމަށް ޚުޠުބާގައި ބުންޏެވެ.

"ދުނިޔެވީ ކަންކަމުގައި މަޝްޢޫލުވެ ނަމާދާ މެދު ޣާފިލުވެތިބުމަކީ ރަނގަޅު ކަމެއް ނޫނެވެ. ރިޒުޤު ދެއްވަނީ ﷲ ކަން ހަނދާންކުރަން ޖެހެއެވެ." ޚުޠުބާގައި ބުންޏެވެ.

ޚުޠުބާގައި ބުނީ، ނަމާދު ދޫކޮށްލުމަކީ އަޅާއާއި ޝިރުކާއި ކުފުރާ ދެމެދުގައިވާ އިމުކަމަށް ރަސޫލާ ޙަދީޘްކުރައްވާފައިވާ ކަމަށެވެ. އަދި ފަރުޟު ފަސްނަމާދު އަދާކުރުމުން ލިބޭ ފައިދާތަކުގެ ތެރޭގައި ނުބައި ކަންތައްތަކުން ދުރުހެލިވުމާއި ވަގުތަށް ކަމޭހިތުމާއި ﷲ އަށް ބިރުވެތިވުން ހިމެނޭކަމަށް ޚުޠުބާގައި ބުންޏެވެ.

ޚުޠުބާގައި ބުނީ ދިވެހިރާއްޖެއަކީ ސައްތައިން ސައްތަ އިސްލާމީ ޤައުމެއްކަމުގައި ވީހިނދު، ރާއްޖޭގެ ހުރިހާ ކަންކޮޅުތަކެއްގައި ވެސް މިސްކިތްތައް ވަރަށް ގިނަ ކަމަށެވެ. ނަމަވެސް ހިތާމައަކީ އެ މިސްކިތްތަކަށް އަރައި ނަމާދުކުރާ މީހުންގެ ޢަދަދު މަދުވުން ކަމަށް ޚުޠުބާގައި ބުންޏެވެ.

ޚުޠުބާގައި އިތުރަށް ބުނީ ނަމާދަކީ މުސްލިމުންގެ ދިރިއުޅުމުގެ މުހިންމު ބައެއްކަމަށާއި، ދުނިޔެވީ މަސްޢޫލިއްޔަތުތަކުގެ ތެރެއިން ވެސް ނަމާދަށް އިސްކަންދިނުމަކީ ކޮންމެހެން ކުރަންޖެހޭ ކަމެއް ކަމަށެވެ. އަދި މިކަމަށް ސަމާލުކަން ދިނުމަކީ އާޚިރަތުގައި ކާމިޔާބު ހޯދުމަށް މަގުފަހިވެގެންދާނެ ކަމެއްކަމަށް ޚުޠުބާގައި ފާހަގަކުރިއެވެ.

ހުކުރު ނަމާދަށް ސަމާލުކަންދޭ ފަދައިން ފަރުޟު ފަސްނަމާދަށްވެސް ސަމާލުކަން ދިނުމަށާއި އަދި ޒުވާނުންނާއި ފުރާވަރުގެ ކުދިން މިސްކިތްތަކަށް އަރައި ނަމާދުކުރުމަށް ޚުޠުބާ ނިންމަމުން ވަނީ ނަސޭހަތްތެރިވެފައެވެ.