ބޭރުގެ އުޅަނދުތަކުން ހުއްދަނެތި ރާއްޖޭގެ ސަރަޙައްދުގައި ތެޔޮ ވިއްކުމަކީ ބަންކަރިންގ ޚިދުމަތަށް ކުރިމަތިވެފައިވާ އެންމެ ބޮޑު ގޮންޖެހުން ކަމަށާއި، ޤާނޫނާއި ގަވާއިދުތަކުގެ ތެރެއިން އެކަން ހުއްޓުވަން ޖެހޭ ކަމަށް އެސްޓީއޯގެ މެނޭޖިންގ ޑިރެކްޓަރު ޝިމާދު އިބްރާހިމް ވިދާޅުވެއްޖެއެވެ.

އަމިއްލަ މީޑިއާއަކަށް ދެއްވި ބަސްދީގަތުމެއްގައި ޝިމާދު ވިދާޅުވީ ބޭރުގެ އުޅަނދުތަކުން "ޝިޕް-ޓު-ޝިޕް ޓްރާންސްފަރ" ގެ ނަމުގައި ހުއްދަނެތި ރާއްޖޭގެ ސަރަޙައްދުގައި ތެޔޮ ވިއްކާ ކަމަށާއި މިކަމުގެ ސަބަބުން ބަންކަރިންގ ޚިދުމަތަށް އިންވެސްޓްކޮށްފައިވާ ދިވެހި ކުންފުނިތަކަށް ގެއްލުންވަމުންދާ ކަމަށެވެ. އެހެންކަމުން މި މައްސަލަ ޙައްލުކުރުމަށް ކަމާބެހޭ އިދާރާތަކާއެކު މަޝްވަރާކުރަމުންދާ ކަމަށް ވިދާޅުވިއެވެ.

"ބަންކަރިން އެންމެ ބޮޑު ޗެލެންޖަކީ ޝިޕްޓުޝިޕް ޓްރާންސްފާގެ ނަމުގައި ހަމަ ބަންކަރިން އެބަ ޖައްސާ އެހެން ބޭރުގެ ވެސެލްތަކުން މި ތަނަށް އައިސްލާފައި ހުއްދަ ނެތި. ތެޔޮކޮޅު ވިއްކާލާފައި އެ މީހުން ދަނީ، ރާއްޖޭގައި ފްރީ ވަކި މުއްދަތެއްގައި ތިބެވޭތީ. އަނެއްހެން ގްރޭ އޭރިޔާ ވީމާ މި އިންނަ ލޫޕްހޯލް މިކަން ކުރަނީ. މިކަން ގާނޫނާ ގަވައިދު ތެރެއިން ހުއްޓުވާލަން ޖެހޭ،" ޝިމާދު ވިދާޅުވިއެވެ.

މި މައްސަލަ ޙައްލުކުރުމަށް ކަސްޓަމްސް، އިކޮނޮމިކް މިނިސްޓްރީ އަދި ޓްރާންސްޕޯޓް އޮތޯރިޓީއާއެކު މަޝްވަރާކުރަމުންދާ ކަމަށް ޝިމާދު ވިދާޅުވިއެވެ. އަދި މިކަމަށް ޙައްލެއް ލިބޭނެ ކަމަށް އުންމީދުކުރައްވާ ކަމަށް ވެސް އެސްޓީއޯގެ އެމްޑީ ވިދާޅުވިއެވެ.

ޝިމާދު އިތުރަށް ފާހަގަކުރެއްވި ގޮތުގައި ބޭރުގެ އުޅަނދުތަކުން ގެންނަ ތެލަކީ އެންމެ ރަނގަޅު ފެންވަރުގެ ތެޔޮކަން ޔަޤީން ނުކުރެވޭ ކަމަށެވެ. މިކަމުގެ ސަބަބުން ރާއްޖެއިން ދޭ ބަންކަރިންގ ޚިދުމަތާއިމެދު ޝިޕިންގ ލައިންތަކުގެ އިތުބާރު ގެއްލުމުގެ ފުރުސަތު އޮތް ކަމަށް އޭނާ ވިދާޅުވިއެވެ.

ބަންކަރިންގ ސިނާޢަތުގެ މުސްތަޤުބަލާއި ގުޅޭގޮތުން އެކްސްގައި ޝިމާދު ވިދާޅުވީ، "ކޮންމެ އިންވެސްޓްމެންޓެއްގައިވެސް ލައިފްސައިކަލެއް އޮންނާނެ. އަޅުގަނޑުމެން މިތިބީ އެންމެ ފުރަތަމަ މަރުހަލާގައި. ރާއްޖެ އޮތް ތަނުގެ ގޮތުން މިކަން ތަރައްޤީވެ ކުރިޔަށްދާއިރު މިއީ ވަރަށް މުހިންމު ސިނާޢަތަކަށް ވެގެންދާނެ"

ޝިމާދު ވިދާޅުވީ ބަންކަރިންގ ޚިދުމަތް އިތުރަށް ފުޅާކުރުމަށް ސްޓޯރޭޖް ފެސިލިޓީއަކާއެކު ބޮޑެތި އުޅަނދުފަހަރަށް ކައިރިކުރެވޭ ބަނދަރެއް ހެދުމުގެ މަޝްރޫޢެއް ފެށުމަށް ތައްޔާރުވަމުންދާ ކަމަށެވެ. މި މަޝްރޫޢަކީ ބޯޓުފަހަރުން މީހުން ބަނދަރަށް ފައިބައި، އެމީހުންނަށް ބޭނުންވާ އެކިއެކި ޚިދުމަތްތަކާއިއެކު ތަރައްޤީކުރާ އިންޓެގްރޭޓެޑް ޑިވެލޮޕްމަންޓް ޕްރޮޖެކްޓެއް ކަމަށް އޭނާ ވިދާޅުވިއެވެ.

"ދުނިޔޭގެ މަޝްހޫރު ފަންޑަކާ އެއްކޮށް ފުރޭމްވޯކް އެގްމަންޓެއްގައި ވަނީ ސޮއިކޮށްފައި އެ މަޝްރޫއު ހިންގަން. އެ އެގްރިމަންޓުގެ ދަށުން އަޅުގަނޑުމެން ރަސްމީ އެގްރީމަންޓެއް އިރާދަކުރެއްވިއްޔާ ހަ މަސް ތެރޭ ދާން އޮންނަނީ. އެޔަށްވުރެ އަވަހަށް ދެވޭތޯ މިހާރު މަސައްކަތް މި ކުރަނީ،" ޝިމާދު ވިދާޅުވިއެވެ.

މި މަޝްރޫޢުގެ ޑިޒައިނިންގ އަދި ފީސިބިލިޓީ ދިރާސާގެ މަސައްކަތް މިހާރު ކުރިއަށްދާ ކަމަށާއި، ދެން އޮތީ ކޮންޓްރެކްޓް އެވޯޑްކުރުމުގެ މަރުޙަލާ ކަމަށް ޝިމާދު ފާހަގަކުރެއްވިއެވެ. މި މަޝްރޫޢުގެ ސަބަބުން ބަންކަރިންގ ޚިދުމަތް މިހާރަށްވުރެ އެތައް ގުނައެއް ރަނގަޅުވެ، ރާއްޖެއަށް އަންނަ އުޅަނދުފަހަރުގެ ޢަދަދު އިތުރުވާނެ ކަމަށް އުންމީދުކުރައްވާ ކަމަށް ޝިމާދު ވިދާޅުވިއެވެ.