ފްރާންސްގައި ކުރިއަށްދާ އިންޓަނޭޝަނަލް ލަގްޒަރީ ޓްރެވަލް މާކެޓް (އައިއެލްޓީއެމް) ކާންސް 2024 ގައި ދިވެހިރާއްޖެ ބައިވެރިވެ، ރާއްޖޭގެ މަތީފަންތީގެ ފަތުރުވެރިކަން އިޝްތިހާރުކުރަން ފަށައިފިއެވެ. މި ހަރަކާތް ކުރިއަށްދަނީ މިމަހުގެ 2-5 އަށް ފްރާންސްގައެވެ.

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ބުނި ގޮތުގައި، މި ހަރަކާތުގައި ދިވެހިރާއްޖޭގެ ފަތުރުވެރިކަމުގެ ސިނާއަތުގެ 67 ކުންފުންޏެއްގެ 12 މަންދޫބުން ބައިވެރިވެ، އެ ކުންފުނިތަކުގެ ތަފާތު މަތީފަންތީގެ އުފެއްދުންތަކާއި ޚިދުމަތްތައް އިޝްތިހާރު ކުރާނެއެވެ.

އައިއެލްޓީއެމް ކާންސް 2024 އަކީ ފްރާންސްގައި ބާއްވާ ޓްރެވަލް ޓްރޭޑް ފެއަރތަކުގެ ތެރެއިން ދުނިޔޭގެ އެންމެ ބޮޑު އެއް ލަގްޒަރީ ޓްރެވަލް ފެއަރއެވެ. އެމްއެމްޕީއާރުސީން ބުނީ، މި ހަރަކާތުގެ ސަބަބުން ބައިނަލްއަޤްވާމީ މާކެޓްތަކުގެ ތެރެއިން ފްރާންސްގެ އިތުރުން އެހެން މާކެޓްތަކުގެ ލަގްޒަރީ ޓްރެވަލް ޓްރޭޑް މެންބަރުންނާއި ބައްދަލުކުރުމަށް އަގުހުރި ފުރުސަތުތަކެއް ލިބޭނެ ކަމަށެވެ.

މި ފެއަރގައި ވިޔަފާރީގެ ބައްދަލުވުންތަކާއި، ތަޢުލީމީ ސެޝަންތަކާއި، ނެޓްވޯކިންގ އިވެންޓްތައް ކުރިއަށް ގެންދިއުމަށް ރޭވިފައިވެއެވެ. މީގެ މައިގަނޑު މަޤްޞަދަކީ ދިވެހިރާއްޖޭގެ މަތީ ފަންތީގެ ފަތުރުވެރިކަން ވަރުގަދަކުރުން ކަމަށް އެމްއެމްޕީއާރުސީން ފާހަގަކުރިއެވެ.

އެމްއެމްޕީއާރުސީން އިތުރަށް ބުނި ގޮތުގައި، އައިއެލްޓީއެމް ކާންސް 2024 ގައި ރާއްޖޭގެ ސްޓޭންޑް ފަރުމާކުރެވިފައި ވަނީ ރާއްޖޭގެ ލަގްޒަރީ ފަތުރުވެރިކަމުގެ ސިފަތަކާއި އެކުގައެވެ. މި ސްޓޭންޑްގައި ދިވެހިރާއްޖޭގެ ރިސޯޓްތަކާއި ލިވަބޯޑްތަކުގެ އިތުރުން، ރާއްޖޭގެ ޔުނީކް ޖިއޮގްރަފީ ހިމެނޭގޮތަށް ފަރުމާކޮށްފައިވާ ލަގްޒަރީ އުފެއްދުންތަކާއި ތަޖުރިބާތައް ވަރަށް ފުރިހަމައަށް ދައްކުވައިދޭނެކަމަށް އެ ކުންފުނިން ބުންޏެވެ.