ދައުލަތުގެ ފިސްކަލް ޒިންމާގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިއަދު ތަޞްދީޤުކުރައްވައިފިއެވެ. މި ބިލަކީ 2024 ނޮވެންބަރު 27 ވަނަ ދުވަހު ބޭއްވުނު ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރުގެ 55 ވަނަ ޖަލްސާއިން ފާސްކުރެއްވި ބިލެކެވެ.

އެގޮތުން، މި ބިލުގެ މައިގަނޑު މަޤްޞަދަކީ މިހާރު ޢަމަލުކުރަމުންދާ ދައުލަތުގެ ޚަރަދަށް ޒިންމާވުމުގެ ޤާނޫނުގެ ބަދަލުގައި، އެކަށީގެންވާ ގޮތެއްގައި ތަންފީޒުކުރެވޭނެ އައު ފިސްކަލް ނިޒާމެއް ތަޢާރަފުކުރުމެވެ. މީގެ ސަބަބުން ދައުލަތުގެ ފިސްކަލް ކަންކަން ހިންގާނީ ފިސްކަލް ޑިސިޕްލިން ހާސިލުކުރެވޭނެ ފަދައިން، ދެމެހެއްޓެނިވި، ދެފުށް ފެންނަ، އަދި ޒިންމާދާރު ގޮތެއްގައިކަން ކަށަވަރުކުރެވޭނެއެވެ.

މި ބިލުގެ މުހިންމު ނުކުތާތަކުގެ ތެރޭގައި ހިމެނެނީ:

1. ދައުލަތުގެ ކޭޝްފްލޯ މެނޭޖުކުރުމަށް، ވޭތުވެދިޔަ 3 އަހަރުގެ އެވްރެޖް އާމްދަނީގެ 2.5% އަށްވުރެ އިތުރުނުވާ ގޮތަށް ދައުލަތުގެ މަރުކަޒީ ބޭންކުން އެޑްވާންސަށް ދަރަނި ނެގުމުގެ ހުއްދަ ދިނުން.
2. ފިސްކަލް ޒިންމާގެ ޗާޓަރު، ފިސްކަލް ސްޓްރެޓަޖީ ބަޔާން، ބަޖެޓު ނަތީޖާ ބަޔާން، އަދި ފިސްކަލް ހިރާސް ބަޔާން އެކުލަވާލައި ރައްޔިތުންގެ މަޖިލީހަށް ހުށަހެޅުމަށް މިނިސްޓަރ އޮފް ފިނޭންސްއަށް ލާޒިމުކުރުން.
3. ސަރުކާރުން މި ޤާނޫނަށް ޢަމަލުކުރާ މިންވަރު ވަޒަންކުރުމަށް އޮޑިޓަރ ޖެނެރަލް އަހަރީ ރިޕޯޓެއް އެކުލަވާލައި ހުށަހެޅުމަށް ލާޒިމުކުރުން.
4. ރައްޔިތުންގެ މަޖިލީހުން "ފިސްކަލް އިމްޕެކްޓް އެނަލިސިސް" އެއް ހަދައި ސަރުކާރަށް ލަފާދިނުމުގެ މަސްއޫލިއްޔަތު އުފުލުން.

މި ޤާނޫނަށް ޢަމަލުކުރަން ފަށާނީ ދިވެހި ސަރުކާރުގެ ގެޒެޓުގައި ޝާއިޢުކުރާ ތާރީޚުން ފެށިގެން 6 މަސްދުވަސް ފަހުންނެވެ. އަދި މި ޤާނޫނަށް ޢަމަލުކުރަން ފެށުމާއެކު، މިހާރު ޢަމަލުކުރަމުންދާ ދައުލަތުގެ ޚަރަދަށް ޒިންމާވުމުގެ ޤާނޫނު އުވިގެންދާނެއެވެ.