ބައިނަލްއަޤްވާމީ ކްރެޑިޓް ރޭޓިންގ އޭޖެންސީ މޫޑީސްއިން ރާއްޖޭގެ މާލީ ހާލަތާ ބެހޭގޮތުން ފާހަގަކޮށްފައިވާ ކަންކަން ބަލައިގަނެ، އެކަންކަން ރަނގަޅު ކުރުމަށް ފިޔަވަޅު އަޅާނެ ކަމަށް ފިނޭންސް މިނިސްޓްރީން މިއަދު ބުނެފިއެވެ.

މޫޑީސްއިން ނެރުނު ބަޔާނެއްގައި، ރާއްޖޭގެ ކްރެޑިޓް ރޭޓިންގ ސީއޭއޭ2 ގައި ދަމަހައްޓާފައިވާކަން ފާހަގަކޮށްފައިވެއެވެ. މިގޮތަށް ރޭޓިންގ ދެމެހެއްޓުމުގައި، ސަރުކާރުން އަޅާފައިވާ މާލީ އިސްލާހީ ފިޔަވަޅުތަކަށް ރިޢާޔަތްކޮށްފައިވާކަން މޫޑީސްއިން ބުންޏެވެ.

މޫޑީސްއިން ބުނީ، މަރުކަޒީ ބޭންކް އެމްއެމްއޭއިން އަލަށް ތަޢާރަފުކުރި ބޭރު ފައިސާއާބެހޭ ގަވާއިދުތަކާއި، ސަރުކާރުން ޓެކްސްއަށް ގެނައި އިސްލާހުތަކުގެ ސަބަބުން ބޭރު ފައިސާގެ ރިޒާވް އިތުރުވުމުގެ ފުރުސަތު ބޮޑުކަމަށެވެ. ނަމަވެސް، ކުރިއަށް އޮތް 12-18 މަސްދުވަހުގެ ތެރޭގައި ބޭރުގެ ދަރަނި އަދާކުރުމަށް ބޮޑު ހޭދައެއް ކުރަންޖެހޭނެކަމަށާއި، ބޭރު ފައިސާ ލިބުމަށް ހުރި ދަތިތައް އަދިވެސް ދެމިގެންދާނެކަމަށް މޫޑީސްއިން ފާހަގަކުރިއެވެ.

މިކަމާ ގުޅިގެން ފިނޭންސް މިނިސްޓްރީން ނެރުނު ބަޔާނެއްގައި، މޫޑީސްއިން ފާހަގަކޮށްފައިވާ ކަންކަން ބަލައިގަނެ، އެކަންކަން ރަނގަޅު ކުރުމަށް ސަރުކާރުން ފިޔަވަޅު އަޅާނެކަމުގެ ޔަގީންކަން ދީފައިވެއެވެ. އަދި ސަރުކާރުގެ އިޤްތިޞާދީ ރިފޯމް އެޖެންޑާގެ ދަށުން އިޤްތިޞާދު ފުޅާވެ، މާލީ ހާލަތު ރަނގަޅުވާނެކަމަށް މިނިސްޓްރީން ބުންޏެވެ.

މީގެއިތުރުން، ބޭރު ފައިސާގެ ގަވާއިދަށް ގެނައި ބަދަލުތަކުގެ ސަބަބުން ބޭންކިންގ ނިޒާމުގެ ތެރޭގައި ބޭރު ފައިސާ ދައުރުވުން އިތުރުވެ، ނެޓް އިންޓަރނޭޝަނަލް ރިޒާވް އިތުރުވެގެންދާނެކަމަށް ބެލެވޭކަމަށާއި، ޑިޕާޗަރ ޓެކުހާއި އެއަރޕޯޓް ޑިވެލޮޕްމަންޓް ފީ ބޮޑުކުރުމާއެކު ބޭރު ފައިސާގެ ލިކުއިޑިޓީ ރަނގަޅުވާނެކަމަށްވެސް މިނިސްޓްރީން ލަފާކޮށްފައިވެއެވެ.

2024 ވަނަ އަހަރުގެ ސެޕްޓެންބަރު މަހު ދިވެހިރާއްޖެއާއި އިންޑިއާއާ ދެމެދު ވެފައިވާ 400 މިލިއަން އެމެރިކާ ޑޮލަރާއި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް އެއްބަސްވުމަކީ ދިވެހިރާއްޖޭގެ މާލީ ހާލަތު ރަނގަޅުކުރުމަށް ކޮށްފައިވާ މުހިންމު ކަމެއްކަމުގައި މޫޑީސްއިން ފާހަގަކުރިއެވެ.